Esteri 5
5
Esteri e ramba mfumeli ni Hamani ka m'buso wa hombe
1Ku to maheka koko tito, ka ditshiku da wuraru, Esteri e ambala syambalo sakwe sa wufumeli, se eya ema mndani ka muhubhe wa nyumbani ka mfumeli, ngu masoni ka nyumba ya mfumeli; kambe mfumeli a ti ti khalahatshile ha txikhaloni txakwe txa wukoma, nyumbani ka wukoma, masoni ka txike txa nyumba. 2Se ku to maheka taku, mfumeli a di woni msikati wakwe Esteri, a di emile mu ka muhubhe, wamsikati a to mana dithomo masoni ka mfumeli; kambe mfumeli a to xungameta Esteri ngu ndonga ya nzalama, a ngadi nayo manzani kwakwe, se Esteri a to tshuketa eya gwesa tshoka ya ndonga. 3Sekoko mfumeli a to khene kwakwe:
Njintxani u ku natxo awe msikati wangu Esteri, niku mwendo njikombelo muni u ku natxo kani? Hambi hafu ya mfumo ni na kuninga.
4Se Esteri a to khene:
Ngako ti txi woneka i di tinene ka mfumeli, a nate mfumeli ni Hamani nyamsi ka m'buso wule ni nga lulamisela mfumeli.
5Sekoko mfumeli a to khene:
Kuluvetani mi dhana Hamani, ti to e maha ti Esteri a nga ruma tona.
A di tile koko mfumeli ni Hamani ka m'buso wule Esteri a nga ti ti wu lulamisete, 6mfumeli a to khene ka Esteri, m'busoni ka vhinya:
Ngu txihi txikombelo txako kani? Se ni na kuninga. Ngu kuhi kuvilela kwako kani? Ni na kuninga, hambi i di hafu ya mfumo.
7Sekoko Esteri a to xamula, a txi khene:
Txikombelo txangu ni kuvilela kwangu ngu siya: 8Ngako ni di mani dithomo masoni ka mfumeli, ni kungako mfumeli a txi ti wona kha kwati ku ni xamula txikombelo txangu ni kuvilela kwangu, a nate mfumeli ni Hamani ka m'buso wa hombe, awu ni no mi lulamisela, se mangwana ni na maha madingano ni kuruma ka mfumeli.
Txikungo txa Hamani txo wukela Mordhekayi
9Sekoko ka ditshiku dile Hamani a to huma a di tsakile kambe a di ni mtamo; kambe mbimo yile Hamani a nga wona Mordhekayi ha txikeni ka mfumeli, na asi khukhi hambi ku ti zinginisa masoni kwakwe, sekoko Hamani a to tala ngu kuhenyela Mordhekayi. 10Kambe Hamani a to ti ñola, e tsula m'tini kwakwe; se a to rumisa kuya dhana vangana vakwe, ni msikati wakwe Zeresi. 11Se Hamani a to va xawutela wudhumo wa tithomba takwe, ni kutala ka vanana vakwe, ni totshe tile mfumeli a ngadi mkulisile ka tona, ni tile a nga ti m'guletisile tona txitimwi ka vathangeli, ni ka sithumi sa mfumeli. 12A to khene kambe Hamani:
Msikati wa mfumeli ene Esteri ni ka kudotho kha ramba mmwani m'thu kuta ni mfumeli ka m'buso wule a nga ti wu lulamisete, hahanze kwangu; ni mangwana kambe, ni rambilwe ngu ngene kumweko ni mfumeli. 13Kambe totshe eto kha ti ni tsakisi, ngako ni txi wona Mujudha wule Mordhekayi a di khalahatshile ha txikeni ka mfumeli.
14Sekoko msikati wakwe Zeresi ni votshe vangana vakwe va to kha vona kwakwe:
Ku na kelelwe phande ya kulapha ka mtxhanu wa magumi a mikono, se mangwana na gela mfumeli taku Mordhekayi e txikitwa ka yona, sekoko u wulela u di tsakile ni mfumeli ka m'buso wa hombe.
Se txikungo etxo txi wonekile i di txatxinene ka Hamani, a to rumisa ti to yi kelelwa phande.
Currently Selected:
Esteri 5: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
