Esteri 1
1
Mfumeli wa txisikati Vhasta e phikizana ni mfumeli Xerexesi
1 # Wona ni ka: Ezr. 4:6. Se ku to maheka tito, ka masiku a Asuwero (awuwa i Asuwero wule a fumela 127 wa matiko a hombe; kukhukhela Indiya kala Etiyopiya); 2ka ona masiku ale, mbimo yile mfumeli Asuwero a nga ti khalahatshile ka txikhalo txa wukoma wakwe, txi ku mkhokholani ka Susani, 3ka dilembe da wuraru da kufuma kwakwe, a to ramba votshe vathangeli vakwe ni sithumi sakwe (mitamu a Persiya ni Medhiyani, ni vathangeli va hombe va matiko a hombe, va ti ti ho masoni kwakwe), 4kasi ku ta va komba tithomba ta wudhumo wa mfumo wakwe, ni kuphatima ka lisima la wuhombe wakwe, ngu masiku amangi, i ku 180 wa masiku.
5Se ma di gumile masiku ale, mfumeli a to ramba votshe vathu vale va nga txi maneka mkhokholani ka Susani, kukhukhela ka wa hombe kala ka wam'dotho, amu ka mtxhanu wa masiku ni mambidi, mthandani ka thembwe ya nyumba ya wukoma. 6Ku ti ti tshurisetwe ngu nguwo yo basa, ni ya mkungu ni ya mkuxe wa nzuma, ti di hayekilwe ka tingoti ta linyu yo hehuka ni ya txiwunguwungu, ni sikhweketo sa silivhela, ni ka tiphande ta marigwi a lisima; mibhedhu i ti ti ya nzalama ni ya silivhela, txitimwi ka marigwi o basa, ni a lisima, ni ya alabhastru, ni ya marigwi a lisima. 7Se va ti ti ningela sa kusela ngu mu ka magombe a nzalama, na i di magombe o hambana mamwewo ni mamwani; kambe ku ti ti ni vhinya yayingi, madingano ni zumbelo ya mfumeli. 8Se ku ti ti selwa ngu mlayo, ku si kurumetwi m'thu; nguko mfumeli a ti ti leletile ka votshe vahombe va nyumbani kwakwe, ti to ve mahisa ti mmwani ni mmwani a ti lavisako tona.
9Nene Vhasta mfumeli wa txisikati, a to mahela m'buso vavasikati nyumbani ka wukoma, ka mfumeli Asuwero.
10Se ka ditshiku da wutxhanu ni mambidi, na mfumeli a di tsakile ngu vhinya, a to ruma Mewumani, Bhizita, Haribhona, Bhigita, Abhagita, Zetari, ni Karika, i ku mtxhanu wa mithenwa ni yimbidi, yile yi nga ti thumela mfumeli Asuwero, 11ti to ve tisa mfumeli wa txisikati Vhasta masoni ka mfumeli, na a di ni m'bhoti wa wufumeli, kasi ku ta kombisa kutshura kwakwe, masoni ka vathu ni ka vathangeli, nguko a ti ti tshurile ngutu. 12Kambe Vhasta mfumeli wa txisikati, a to lamba kuta madingano ni dipswi da mfumeli, ngu dianza da mithenwa; ngu kumaha keto mfumeli a to henya ngutu, se txiviti takwe txi tura.
13Sekoko mfumeli a to wotisa ka titxhari tile ti nga tiziva timbimo (nguko ti txi mahiswa toneto timhaka ta mfumeli, masoni ka votshe vale va nga tiziva mlayo ni fanelo; 14se vale va nga ti ti thumisana nayo ngu vava: Karisena, Setari, Adhimata, Tarxixi, Meresi, Marisena, Memukani, mtxhanu wa vathangeli ni vambidi va Vaperesi, ni va Vamedhi, vale va nga ti wona khohe ya mfumeli, ni kukhalahatsha kumweko nayo ha mfumoni) 15tito, madingano ni mlayo wu wu nga ti fanela kumahelwa mfumeli wa txisikati Vhasta, ngu kule a nga mbi londeta kuruma ka mfumeli Asuwero, ngu dianza da mithenwa.
16Sekoko Memukani a to khene masoni ka mfumeli ni ka vathangeli:
Mfumeli wa txisikati Vhasta kha onhela mfumeli dwe, aniko a onhete votshe vathangeli, ni votshe vathu va otshe matiko a hombe a mfumeli Asuwero. 17Nguko mahungu awa ma nga mahwa ngu mfumeli wa txisikati, ma na hoka ka votshe vavasikati, aha ka kuva na eyisa vamna vawe, ngako ku txi na wombwa taku: Mfumeli Asuwero a rumile kudhana mfumeli wa txisikati Vhasta kuta masoni kwakwe, kambe Vhasta khata. 18Se ka dona ditshiku diya da dimwedo, vasikati va vathangeli va Persiya, ni va Medhiya, va na womba toneto ni vona ka votshe vathangeli va mfumeli, mbimo yi va na pfa ti ti nga mahwa ngu mfumeli wa txisikati; ngu mhaka yeto, ku nava ni txieyiso txa hombe ni kuhenyisana. 19Ngako mfumeli a txi ti tsakela, ku na hume txileleto txa mfumo ngu kwakwe, txi bhalwa ka milayo ya Vapersa ni ya Vamedhi, kambe ku nga txitxwe ti to Vhasta asi swi kambe e veka mkondo wakwe masoni ka mfumeli Asuwero, aniko mfumeli a na ningele mfumo wa Vhasta, ka wamsikati wule a no va wa txhuko kupinda Vhasta. 20Se mbimo yi ku no pfiwa txileleto txi a no txi maha mfumeli ka wotshe mfumo wako (ngako i ku wa hombe), votshe vavasikati va na va ni txithavo ka vamna vawe, kukhukhela ka wa hombe kala ka wam'dotho.
21Se mapswi ma to woneka i ti amanene masoni ka mfumeli ni ka vathangeli; kambe mfumeli a to maha madingano ni dipswi da Memukani. 22Sekoko mfumeli a to rumela mapapilo ka otshe matiko a hombe a mfumeli, ka ditiko dimwani ni dimwani da hombe ni mibhalo ya dona, ni ka vathu vamwani ni vamwani ngu lidimi lawe: Taku wamwamna mmwani ni mmwani a na fumele nyumba yakwe; ni ku eto ti na ziviswe ka votshe vathu, madingano ni lidimi la mmwani ni mmwani.
Currently Selected:
Esteri 1: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
