Ekleziyaste 9
9
1Ni tikaratile kupfisisa totshe timhaka tiya mbiluni kwangu, kasi ku ni ziva kha kwati totshe tiya: Ti to valulami, ni titxhari, kumweko ni mithumo yawe, va manzani ka Txizimu, ni ti taku m'thu kha zivi lirando, hambi livengo; totshe ti pinda ngu masoni kwakwe. 2Totshe ti humelela ngu kufana masoni ka votshe: toneto, ta humelela ka wo lulama ni ka wo biha, ka wamnene ni ka wo sawuleka, kufana ni ka wo mbi sawuleka; ngu toneto ka wule a ti karatako, kufana ni ka wu asi ti karatiko; ka wamnene kufana ni ka muonhi; ka wule a xambanyako kufana ni ka wule a thavako kuxambanya. 3Awuwa mbubihi wu wu ku hagari ka totshe ti ti mahwako hahatshi ka ditambo: I ku tito, ka votshe, kuhumelela to fana; ni ti to, timbilu ta vanana va vathu ti tate ngu wubihi; wupumbu wu mu ka timbilu tawe, amu kuhanyani kwawe, ngu magwito vaya kufani. 4Awule aku hagari ka vo hanya ana ni kuthemba (nguko i txhuko yimbwa yo hanya, kupinda ngonyamo yo fa). 5Nguko avale va hanyako va tiziva ti to va nafa, aniko vofa kha va zivi txilo ni txa tximwetxo, hambi kuva ni txhatxhazelo ni ka kudotho, kambe mapimo awe ma kudivalani. 6Hambi lirando lawe ni livengo lawe, ni wukhuxu wawe, se si fuvile; kha ve ngadi ni txyavelo ni txatximweto ka diya ditiko, ka ni txihi txi txi mahwako hahatshi ka ditambo.
7Tsula koko, u yadya sakudya sako ngu kutsaka, u sela vhinya yako ngu mbilu ya yinene, nguko Txizimu se txa tsaka ngu mithumo yako. 8Ambala syambalo so basa mbimo yotshe, ku nga thuke kupwateka mafura ha msungo kwako. 9Hanya ni msikati wu umrandako, otshe masiku a kuhanya ka wukanganyisi wako; aale Txizimu txi nga kuninga hahatshi ka ditambo, otshe masiku a wukanganyisi wako; nguko atxiya ngu txona txyavelo txako kuhanyani kwako, ni ka mthumo wako, awu u nga wu maha hahatshi ka ditambo. 10Ni txihi txi dianza dako di txi kotako kumaha, txi mahe madingano ni mtamo wako, nguko dithithani, amu awe uyako kona, kha ku na mthumo, hambi makungo, hambi wuzivi, hambi wutxhari ni wawumwewo.
11Se ni to tshumela ni wona hahatshi ka ditambo tito, kututuma hi nga ka wa livilo, hambi kuxula hi nga ka tindena, ni ka kudotho sakudya kha si lumbi va vo txhariha, ni thomba kha yi lumbi va vavanene, ni kudhundeka hi nga ka va mapimo, kambe mbimo ni kukateka si lumba votshe. 12Ni ti to m'thu kha yi zivi mbimo yakwe; kufana ni sihaka si dawako ngu likoka, ni kufana ni sinyana si bzwetwako ngu mlawu, ngu toneto va bzwetiswako tona vanana va vathu, ka mbimo yo biha, va txi welwa ngu dikhombo ngu txidhukisa.
Mapimiselo madingano ni wutxhari
13Kambe ni woni wutxhari hahatshi ka ditambo, i ku tximaha txa hombe kwangu. 14Ku ti ti ni didhoropa da didotho, di nga ti ti ni vathu vavadotho, se di to telwa ngu mfumeli wa hombe, e ta di randela, ngu kumaha diguma da hombe do di bhiyela. 15Se ka dona ku ti ti ni txhari yimweyo ya txisiwana, yile yi nga hulukisa didhoropa dile, ngu wutxhari wa yona, kambe ku si nga ni wammweyo a nga ti ngadi e txi alakanya txisiwana txile. 16Sekoko ani ni to khani: I txhuko wutxhari kupinda mtamo, hambi ku wutxhari wa txisiwana wu nga eyiswa, ni mapswi a txona kha ma pfiwa ngu m'thu.
17Mapswi a titxhari, ma dingana kuengiselwa kha kwati, kupinda diguwa da wule a khozisako siphukuphuku.
18I txhuko wutxhari kupinda matxhari a yimbi, aniko muonhi mmweyo wa onha somaha so tala.
Currently Selected:
Ekleziyaste 9: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
