Mithumo 26

Paulo a txi ti xamulela masoni ka Agripa

1Se Agripa a txi khene ka Paulo: “U nga ti wombawombela.” Se a to gwimba diwoko, e ti angulela, a txi khene: 2“Ka totshe timhaka ti ni mangalwako ngu tona ngu Vajudha, awe mfumeli Agripa, ni khani ni katekile, ngako ni txi ti xamulela masoni kwako nyamsi; 3nguko awe wa ma zivisisa otshe mahanyelo a txijudha ni totshe timhaka ti va kanetisanako ngu txona. Ngu konaho, na ku kombela u txi ni engisa kha kwati. 4Ati ni nga hanyisa tona ditikoni ka Jerusalema, kukhukhela ha wananani kwangu, votshe Vajudha va tiziva. 5#Wona ni ka: Mith. 23:6; Vaf. 3:5. Vona va tiziva ngu kale, va nga fakaza ngako va txi ti lava, ani ni hanyile ngu mlayo wa wufarisi, awu i ku wa wunene ngutu ka wukholwa wathu. 6Se konkuwa ni maneka hawa ni txi lamulwa ngu mhaka ya kuverela txithembiso txi txi nga mahwa ngu Txizimu ka vatate vathu, 7i ku txithembiso txi tihunzu tathu ta digumi ni timbidi ti verelako ku txi mana, na ti txi khutalela kukhozela Txizimu wusiku ni mitshikari. Mfumeli Agripa, ni mangalelwa ngu Vajudha ngu mhaka ya txona txithembiso txiya. 8Ngu kutxani va si kholwi vathu hagari kwanu ti to Txizimu txi nga wusa vakufa kani?”

9 # Wona ni ka: Mith. 8:3; 22:4-5. “Nanani kale ni ti pimisile kulwa ngu totshe tinzila kasi kudaya ditina da Jesu wa Nazareta. 10Kha ditshuri ni mahisile toneto Jerusalema, ni sekela mkorani vasawuleki votala, ngu mtamo wu ni nga ningwa ngu vaphaxeli va hombe; ni mbimo yi va nga ti ningelwa kuya dawa, nani ni ti tumela ku va na dawe. 11Sikhati sasingi, mbimo yi ni nga ti tsimbilatsimbila ka otshe masinagoga, ngu tshofu ni ti va kurumeta kuruketela Txizimu; se ngu kuhenya ko pindisa, ni ti va xanisa hambi madhoropani ka mamwani matiko.”

Paulo e xawutela ta kuhunduluka kwakwe

(Mithumo 9:1-19; 22:6-16)

12“Ti di mahile eto, ni tsute Dhamasku, ni di ni mtamo wotshe wa kuningwa ngu vaphaxeli va hombe. 13Ni di ha nzila, ngu mbimo ya dhina, mfumeli, ni to wona liwoningo la hombe, la kuta ngu nzumani, lo phatima ngutu kupinda ditambo, ali li nga ni randela kumweko ni va ni nga ti navo. 14Konaho, hi to wela hahatshi hotshethu; se ani ni to engisa dipswi di txi womba-womba ngu Txihebheru, di txi kha dona: ‘Sawule, Sawule, u ni xanisela txani kani? Ta pandisa kwako kukhava tshoka ya mndombo.’ 15Se ni txi khani: ‘Ngawe mani, Mkoma kani?’ Mkoma a txi khene: ‘Ngani Jesu, wu awe u mu xanisako. 16Aniko khukha u txi ema, nguko ni ti wonekisile kwako, ni kusawute kasiku u txi maha mthumeli ni fakazi ya ti ni nga ti wonekisisa tona kwako, ni ya ti ni no ti wonekisisa tona kambe kwako. 17Ni na kuhulukisa manzani ka vathu va ditiko diya, ni ka vamatiko vava ni ku rumelako kwawe; 18Kasi kuya tula maso awe ni ku va humisa mtemani, ve wuya livaningoni, ni ku va humisa nfumoni ka Sathani, ve wuya ka Txizimu, kasiku ve amukela divalelo ya sionho, ni kuavelwa thomba kumweko ni vasawuleki ngu kukholwa ditinani kwangu.’ ”

Paulo a txi txhamusela ta nthumo wakwe

19“Ngu toneto, mfumeli Agripa, ani kha na lamba txiwoniso txiya txa nzumani: 20#Wona ni ka: Mith. 9:20,28-29. Aniko kukhata ni txhumayete ka va Dhamasku, ni va Jerusalema, ni va dotshe ditiko da Judheya, kala ka vamatiko, ti to ve phinduka ve wuya ka Txizimu, va txi maha mithumo yi yi dinganako kuphinduka kwawe. 21Ngu toneto, Vajudha va nga ni ñola ngu tona Dithepeleni, ve zama ku ni daya. 22Kambe, ngu kuvhunwa ngu Txizimu, ni tsanisete kala ditshiku da nyamsi, ni txi fakaza ka va vavadotho ni ka va va hombe; kha na womba timwani hahanze ka tiya Mosi ni Vaprofeti va nga womba ku ti na humelela, 23ti to Kristu a na xaniswa, ni tito, ngukuva a di thangile ene e wuka ka vakufa, a fanete kunuwela liwoningo ka vathu va ditiko diya ni ka vamatiko.”

Paulo a txi laya Agripa kasiku e kholwa

24Paulo, a di ngadi a txi ti angulela ngu mapswi awa, Festo a to gula dipswi, a txi khene: “Wa xanga, mo Paulo! Sigondo si sako sasingi sa kuxangisa!” 25Paulo a txi khene: “Ani kha na xanga, mfumeli Festo; kambe ni womba mapswi a ditshuri ni a wuzivi. 26Hakunene, mfumeli wu a ni tsanisako ni txi womba-womba masoni kwako, wa tiziva totshe tiya, txi walo ni txa tximwetxo a txi timelelako, nguko kha ta mahwa kusisalani. 27Ina wa kholwa ka Vaprofeti kani, mfumeli Agripa kani? Ani na tiziva ti to wa kholwa.” 28Agripa a to khene ka Paulo: “Ngu kadotho u pimisa ti to u nga ni maha mkristu!” 29Paulo a txi khene: “Ngu kadotho mwendo ngu ka kungi, ni kombela ka Txizimu ti to i si nga awe dwe, kambe ni votshe va va ni engisako nyamsi, mi txi fanana ni nani, kuleka ngu titxhini ti ni nga sungwa ngu tona.” 30Konaho mfumeli a to khukha kumweko ni mthangeli, ni Bhernike, ni va va nga ti khalahatshile kumweko navo. 31Ngako va di humile, va to bhula va txi kha vona: “M'thu wuwa kha maha txilo txi txi fanelwako ngu lifo hambi titxhini.” 32Se Agripa a txi khene ka Festo: “M'thu wuwa a ndi na thuswa, idiku a sa kombela kulamulwa ngu Khezari.”

Currently Selected:

Mithumo 26: BEC2016

Highlight

Compare

Copy