Mithumo 24

Ta mnandu wu Paulo a mangalelwako ngu wona

1Ngako ku di pindile mtxhanu wa masiku a to relela mphaxeli wa hombe Ananiya kumweko ni madhota okari, ni muemeli wu a dhanwako ku i Tertulo; se veya ka mfumeli kuya mangala Paulo; 2Ku ti ngako va di dhani Paulo, Tertulo a to khata ku mu mangala, a txi khene: “Ngu kona hawa ka wuzivi wako, ni milayo ya yiphya u nga yi humisa, ya kuvhuna ditiko, athu ha mana kudikha ko enela. 3Mkoma Felikisi, hani ni hani, ni yotshe mbimo, athu ha amukela ngu litsako la hombe mathomo awa. 4Kambe, kasiku ni si ku tekeli mbimo, ni na komisa mahungu, na ni txi kukombela ku u txi hi engisa ngu wunene wako wu hi wu zivako. 5Hi mani m'thu wuwa i ku mtungu a wusako mazunga hagari ka votshe Vajudha va ditiko. Ene i mthangeli wa mtxawa wa Vanazareta. 6Kambe a duketile kunyenyezisa Dithepele, aniko hi mu ñote, se hi ti dhunda ku mu lamula ngu mlayo wathu. 7Kambe Lisiya, mthangeli wa hombe, a humelete e hi honyola manzani kwathu ngu nyala ya hombe, 8se e gela vale va nga mu mangala, ti to ve ta kwako. Nanawe upune, u txi mu wotisa, u nga sikota kuziva ditshuri da totshe tiya hi mu mangalako ngu tona.” 9Se Vajudha ni vona va to ema nayo, va txi kha vona: “Kha ditshuri ngu toneto.”

Paulo ngako a txi ti xamulela masoni ka Felikisi

10Paulo, ngako mfumeli a di mu kwesetile kasiku e womba-womba, a to xamula, a txi khene: “Ngu kuziva ti to u na ni malembe amangi na u txi fuma ngu kululama ditiko diya ni na ti angulela ngu kuthemba, ka mhaka yangu. 11U nga setxha mhaka upune: Kha ku nzi kupinda digumi da masiku, na ni di kwete Jerusalema kuya khongela kona. 12Kambe kha va ni mana ni txi kanetisana ni m'thu, mwendo kuwusa dizunga Dithepeleni hambi masinagogani, ni didhoropani. 13Ni kadotho kha va na kusikota kukomba ditshuri da mhaka yi va ni wukelako ngu yona konkuwa. 14Ditshuri di ni di zivako ngu diya: Ani ni thumela Txizimu txa vatate vathu, madingano ni Nzila yi vona va ku kha vona njo timeta, kasi ani ni kholwa ka totshe ti ti nga bhalwa mu ka Mlayo ni Vaprofeti. 15Txithembo txi ni ku natxo ka Txizimu, ni vona va natxo: Ti to vo lulama ni va ku ambi lulama va na wuka ka vakufa. 16Ngu konaho, yotshe mbimo ni khutalako kutsimbila ngu nzila yo lulama masoni ka Txizimu ni ka vathu.”

17 # Wona ni ka: Mith. 21:17-28. “Se msana ka malembe o tala, ni wuyisile miningelo ka va ka kwathu ni ku ta phaxa timhamba. 18Ngu yoneyo mbimo va nga ta ni mana Dithepeleni na ni di ti basisile: Ku ti si nga ni dibutho hambi diguwa. 19Aniko Vajudha vokari va Aziya, evo ngu vona va nga ti fanete kuta masoni kwako va ta ni mangala, idiku va woni txisolo kwangu. 20Ni vona vava va ku kona hawa, va na wombe txihoxo txi va nga txi wona, mbimo yi ni nga ya emiswa hagari ka dibanza, 21#Wona ni ka: Mith. 23:6. ahanti mwendo i di dipswi di ni nga womba ngu mtamo masoni kwakwe, ni txi khani: ‘Nyamsi na lamulwa ngu mhaka ya kuwuka ka vafi.’ ”

Paulo ngako a txi siwa mkorani

22Sekoko Felikisi, ngako a di yi mani kha kwati mhaka ya Nzila yileya, a to vhala dibanza, a txi khene: “Ngako mthangeli wa hombe Lisiya a di relete a txi ta kheno, ngu kona ni nota wila mhaka yanu.” 23Se ene a to leleta mthangeli wa dizana kasiku e woneleta Paulo, a txi mninganyana kupepa ni kuva ku si tsimbwi vathu ku ta mxola.

24Ngako ku di pindile masiku okari, Felikisi a to ta, a di ni Drusila, msikati wakwe, wa Mujudha. A to dhana Paulo, e ta mu engisa a txi womba-womba ngu likholo ka Kristu. 25Kota ngako a nga txi womba ngu ta kululama ni ta kutiñola, ni ta kulamulwa ku kutako, Felikisi a to dhuka, se a txi khene: “Tsula; ni na kudhana ngu yimwani mbimo.” 26Hahanze keto, ene a ti themba ti to Paulo a na mninga male; ngu konaho a nga ti wuyelela ku m'dhana a ta womba-womba nayo. 27Kambe, ngako ku di pindile malembe mambidi, Porkiyo Festo a to fuma, e tsiveta Felikisi. Kasi Felikisi a ti lekile Paulo mkorani, ngu kuranda kutsakisa Vajudha.

Currently Selected:

Mithumo 24: BEC2016

Highlight

Compare

Copy