Mithumo 17

Vhilinganya yi yi nga humelela Tesalonika

1Paulo ni Silasi, va to tsimbila ngu nzila yi yi pindako ngu Amfipoli ni Apoloniya, ve hoka Tesalonika, ahawa Vajudha va nga ti ni disinagoga. 2Se Paulo, ngako i ku toloveto yakwe, ati ya tshangana navo konemo, a txi heta Masabbata mararu, a txi bhulisana navo, ngu Mibhalo. 3A ti va txhamusela ni ku va kombisa ti to Mesiya a ti fanete kuxaniseka ni kuwuka ka vakufa; se a txi khene: “Jesu wu ni mi zivisako, ngene Mesiya.” 4Se vamwani hagari kwawe va to kholwa, ve ti patanisa ni Paulo ni Silasi, kumweko ni dibutho da hombe da Vagriki va va khozelako Txizimu ni vavasikati votala va kuxonipheka. 5Aniko Vajudha va to tala ngu wukwele, ve kujetela vavamna vokari va migewu, ava va nga ramba dibutho ve wusa dizunga didhoropani; se ve randela nyumba ya Jasoni, va txi lava Paulo ni Silasi kasi ku va yisa masoni ka vathu. 6Se ngako va di va pwati, va to ruruvisa Jasoni ni vanawe vokari, ve va yisa masoni ka tinduna ta didhoropa, veya kwangula va txi kha vona: “Vathu va va nga wusa vhilinganya ka dotshe ditiko va hokile ni kona muwa kwathu, 7se Jasoni a va amukete m'tini kwakwe, kasi vona votshe va kanyisa mlayo wa Khezari, va txi kha vona waho mmwani mfumeli, i ku Jesu!” 8Diguwa diya di to xamukisa dibutho ni tinduna ta didhoropa, ati ti nga pfa timhaketo. 9Va to mu kurumeta Jasoni ni vamwani ti to ve humisa txivhika-mnandu, se ve va leka ve tsula.

Vapostoli va di Bhereya

10Vanawe va to kuluveta ve teka Paulo ni Silasi ni wusiku, ve va tsutisa Bhereya. Ngako va di hokile koneyo, va to ya wulela disinagogani ka Vajudha. 11Vona va ti ni mialakanyo ya yinene kupinda ya Vatesalonika. Va amukete dipswi ngu yotshe mbilu. Ditshiku ni ditshiku va ti gonda dibhuku, kasi kuwonisisa ditshuri da totshe timhaka.

12Se vavangi hagari kwawe va to kholwa, kumweko ni vavasikati vo xonipheka va Vagriki, ni vavamna votala. 13Kambe Vajudha va Tesalonika, ngako va txi pfa ti to dipswi da Txizimu da txhumayelwa ngu Paulo ni kona Bhereya, va to tsula koneyo veya wusa vhilinganya ni livengo hagari ka dibutho. 14Konaho, vanawe va to kuluveta ve humisa Paulo ve mu yisa lineneni. Kambe Silasi ni Timoti va to sala. 15Se ava va nga txi heleketa Paulo, va to mu hokisa Atena; se ve tshumela ni txileleto txo ta gela Silasi ni Timoti, kasiku ve kuluveta ve tsula kwakwe.

Paulo a di Atena

16Ngako Paulo a di ngadi a txi va wonelela Atena, moya wakwe wu txi pandiseka ngu kuwona didhoropa di di tate ngu sithombe si si khozelwako. 17Se a ti kanetisana disinagogani ni Vajudha ni va va khozelako Txizimu, e mahisa toneto ha banza otshe masiku, ni va va nga ti dhuka va txi maneka kona. 18Hambi vazivi vokari va gondo ya Epikuru ni ya Txitoyiki va ti kanetisana nayo. Se vamwani va txi kha vona: “A lava ku hi gela to txani nyamuwombe wuwa kani?” Vamwani va txi kha vona: “Awuwa ngu nga m'gondisi wa sizimu so mbi ziwa!” Nguko a ti ti txhumayela ngu Jesu ni kuwuka ka vafi. 19Se ve mñola, ve mu yisa dibanzani ka Areyopago, va txi kha vona: “Ina hi nga yi ziva ti to i gondo muni ya yiphya, yi u yi wombako kani? 20Nguko u womba-womba tinzeveni kwathu timhaka to hambana: Ngu toneto, hi lavako kuziva ti to ti txhamusa txani.” 21Kunene votshe va Atena ni vawuyi va va nga ti zumba kona va ti si thumi txilo, hahanze ka kuwomba ni kuengisa timhaka ta tiphya. 22Se Paulo a to ema hagari ka dibanza da Areyopago, a txi khene: “Vavamna va Atena, ka tihi ni tihi, ni wona ti to mi vakhongeli va hombe ngutu. 23Nguko, ngako ni txi tsimbila, ni wona magandelo anu, ni mani txiluvelo txi txi nga ti bhatwe tito: ‘Ka Txizimu txi txi si ziwiko.’ Se ani ni tela ku ta mi zivisa Txizimu txi anu mi txi gandelako mi si txi zivi. 24Txizimu txi txi nga va nga mafu ni sotshe si si ku ka ona, i ku txona Mkoma wa nzuma ni mafu; kha txi zumbi mathepeleni ka kuakwa ngu manza a vathu; 25kha txi thumelwi ngu manza a vathu, txi txi nga txo pwata txilo, nguko txona txipune ngu txona txi ningako sotshe ka votshe, wutomi ni kuhefemula ni sotshe simaha#Wona ni ka: Isa. 42:5. . 26Na txi txi khukhela ka m'thu mmweyo, txi vangile totshe tixaka ta vathu, kasiku ve eneta otshe mafu, txi va vekela tinyango ti ti nga sawulwa ngu txona ni mihingano ya muwa va fanelako kuzumba kona: 27Txi mahela ti to vathu ve lava Txizimu mwendo ve maha ngu kumbumbutela veza ve txi mana, hambiko Txizimu txi ku si nga kule ka mmweyo ni mmweyo wathu, 28nguko ka txona ha hanya, ha tsimbila-tsimbila, hiho: Nga kuwa vamwani vabhali vanu va nga womba, va txi kha vona: ‘Nanathu hi va liveleko la Txizimu.’ 29Se hi di va liveleko la Txizimu, kha hi faneli kupimisa ti to wuzimu wu nga fananiswa ni nzalama, mwendo silivhela mwendo dirigwi do vatwa ngu wutxhari ni mapimo ya vathu. 30Hambi keto. Txizimu txi lekile kupimisa ngu ta mbimo ya kupwata kuziva yi nga pinda, se konkuwa txi zivisa votshe vathu va otshe matiko tito, va na hunduluke. 31Nguko Txizimu txi vekile ditshiku di txi no lamula mafu ngu dona, ngu malamulelo o lulama, ngu m'thu wu txi nga ti sawulela ene, txi tsanisa mhaka yiya ka votshe ngu ku mu wusa ka vakufa.” 32Kambe vona, ngako va txi pfa mhaka ya kuwuka ka vafi, vamwani va to seka, vamwani va txi kha vona: “Hi ngadi hi txi na tshumela hi kuengisa kambe ka mhakeyo.” 33Se Paulo a to khukha hagari kwawe. 34Aniko vamwani vathu va to ti patanisa nayo, ve kholwa: Hagari kwawe ku ti ni Dhiyoniziyo muareyopago ni wamsikati wu a dhanwako ku i Dhamarisi ni vamwani kambe.

Currently Selected:

Mithumo 17: BEC2016

Highlight

Compare

Copy