2 Samuwele 21
21
Kudawa ka liveleko la Sawule
1Se ka masiku a Dhavhidha ku to maneka nzala mndani ka malembe mararu o londetelana; kambe Dhavhidha a to wotisa ka Mkoma, aniko Mkoma a to khene kwakwe: I mhaka ya Sawule ni nyumba yakwe ya wudayi, nguko va theketile mnoha wa Vagibheyoni.
2 # Wona ni ka: Jox. 9:3-15. Sekoko mfumeli a to dhana Vagibheyoni e ta khene kwawe: (Vagibheyoni i si nga va vanana va ka Israyeli, kambe i ti miboti ya Vaamori; aniko vanana va ka Israyeli va ti va xambanyete, nguko Sawule a lavile ku va daya ngu kupandisekela, vanana va ka Israyeli, ni va ka Judha). 3Dhavhidha a to khene koko, ka Vagibheyoni: Mi lava ku ni mimahela txani kani? Ni ku ni nga midihela ngu txani kasi ku mi katekisa thomba ya Mkoma kani?
4Sekoko Vagibheyoni va to kha vona kwakwe: Mhaka yathu ni Sawule ni va nyumba yakwe hi nga ya silivhela mwendo nzalama; ni ka kudotho kha hi lavi kudaya m'thu ni wammweyo wa ka Israyeli. Se Dhavhidha a to khene: Njitxani koko, mi txi lavako ku ni mimahela kani?
5Se va to kha vona ka mfumeli: Hi lava wamwamna wule a nga hi xasela, ni kumaha makungo o hi fuvisa, kasiku ku si sale ni wammweyo wathu ka yotshe mihangano ya ka Israyeli, 6ka vanana vakwe hi ninge mtxhanu wa vavamna ni vambidi, kasiku hi va txikita masoni ka Mkoma, kona Gibheya ka Sawule, wule a nga sawulwa ngu Mkoma. Se mfumeli a to khene: Ni na mi ningeta.
7 # Wona ni ka: 1 Sam. 20:15-17; 2 Sam. 9:1-7 Kambe mfumeli a to felela Mefibhosete mwana Jonatani, mwana Sawule, ngu mhaka ya txixambanyo txa Mkoma, txi txi nga ti tiho kwawe, hagari ka Dhavhidha ni Jonatani, mwana Sawule. 8#Wona ni ka: 1 Sam. 18:19. Sekoko mfumeli a to teka vanana vambidi va Risipa, mwana Ayiya, vale a nga veleka ni Sawule, i ku Arimoni ni Mefibhosete, e teka kambe mtxhanu wa vanana va mwanawe wa Mikali, mwana Sawule, awule a nga veleka ni Adriyeli, mwana Bharizilayi, mmeyolati. 9Se a to va ningela manzani ka Vagibheyoni, avale va nga va txikita mmangoni masoni ka Mkoma; se votshe va mtxhanu ni vambidi va to fa ngu mbimo yimweyo; Va to dawa ka masiku a kuelula, i ku masiku o khata, kukhatani ka kuelula ka Sevhadha.
10Sekoko Risipa, mwana Ayiya a to teka nguwo yo khwaxa, e yi anjala txitimwi ka dirigwi, kukhukhela kukhatani ka kuelula kala ku mati a nzumani me khata ku vanela, kha leka sinyana sa nzumani si tshuketa hafuhi kwakwe ni mitshikari, hambi sihari sa txitinga ni wusiku.
11Se va to ya gela Dhavhidha, a tile ti nga mahwa ngu Risipa, mwana Ayiya, msikati wam'dotho wa Sawule. 12#Wona ni ka: 1 Sam. 31:8-13. Sekoko Dhavhidha a to tsula eya teka marambu a Sawule, ni marambu a Jonatani, mwanakwe, ka va zumbi va Jabhesi-Gileyadhi, ale va nga ti ti ma pite ka nzila ya Bheti-Seyani, ani Vafilista va nga ti ti mahayekile kona, mbimo yile Vafilista va nga daya Sawule kona Gilibhowa. 13Se a to wuyisa ngu kheyo marambu a Sawule ni marambu a mwanakwe Jonatani; ve pata ni marambu avale va nga txikitwa. 14Va to ya tshotsha marambu a Sawule ni a mwanakwe Jonatani, ditikoni ka Bhenjamini, kona Zela, ka dithitha ta Kisi, tate wakwe, se ve maha totshe tile mfumeli a nga va leleta; kambe msana keto, Txizimu txi to pfa kudila ka ditiko.
Kulwa ko wukela vanyasihakate va Vafilista
(1 Makronika 20:4-8)
15Vafilista va to engeta kambe velwa ni va ka Israyeli; se Dhavhidha a to relela ni sithumi sakwe, ve yalwa ngutu ni Vafilista, aha koza Dhavhidha e karala. 16Se Isibhi-Bhenobhi, mmweyo ka vanana vanyasihakate, awule kunemela ka ditxhari dakwe i nga ti ti ka 300 wa maxekele a koporo, a nga ti ti sungile ditxhari da diphya, a to alakanyela kudaya Dhavhidha. 17#Wona ni ka: 1 Vafu. 11:36; Mas. 132:17. Kambe Abhixayi, mwana Zeruiya, a to mlamulela ngu kuthola Mufilista e m'daya; sekoko vathu va Dhavhidha va to mxambanyela, va txi kha vona: Khu na mbi ngadi kambe u tsula ni nathu yimbini, kasiku u si timi dilambu da ka Israyeli.
18Msana keto, ku to maheka tito, kumaneka yimbi yimwani yo wukela Vafilista, kona Gobhe; sekoko Sibhekayi, Muhusati, a to daya Safe, i nga ti ti mmweyo ka vanana vanyasihakate.
19Ku to maneka yimwani yimbi yo wukela Vafilista kona Gobhe; se Elani, mwana Jahari-Oregimi, wa Bhetlehema, a to daya Goliya, mugeti, wule tshoka ya mseve wakwe yi nga ti ti fana ni mtanda wa mluki.
20Ku to maneka yimwani yimbi kona Gati, eyo ku nga ti ti ni wamwamna wo lapha ngutu, a nga ti ni mtxhanu wa titiho ni limwelo ka dianza dimwedo ni dimwani ni mtxhanu wa titiho ni limwelo ka mkondo wumwewo ni wumwani; totshe i ti magumi mambidi a titiho ni mune, nene a velekilwe ngu vanyasihakate. 21Se ene a ti ti ruketela va ka Israyeli; kambe Jonatani, mwana Simeya, mwanawe wa Dhavhidha, a to m'daya.
22Avava va mune va velekilwe ngu vanyasihakate kona Gati; se va to dawa ngu dianza da Dhavhidha, ni dianza da sithumi sakwe.
Currently Selected:
2 Samuwele 21: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
