2 Samuwele 10
10
Dhavhidha e xula va ka Amoni ni Vasiriya
(1 Makronika 19:1-19)
1Se ku to maheka taku, msana keto, mfumeli wa vanana va Amoni a to fa, Hanumi mwanana wakwe e fuma ka wukhalo wakwe. 2Sekoko Dhavhidha a to khene: Ni na maha wumbilu ka Hanumi, mwana Nahasi, nga kule tate wakwe a nga ni mahela wumbilu. Se Dhavhidha a to rumela sithumi sakwe kuya thavelela Hanumi, ngu mhaka ya kufelwa ngu tate wakwe; se sithumi sa Dhavhidha si to ta ditikoni ka vanana va Amoni. 3Sekoko vathengeli va vanana va Amoni va to kha vona ka nyamne wawe Hanumi: Ina u alakanya taku, Dhavhidha a rumela vathu vava, ku ta kuthavelela ngu kuranda tate wako kani? Ina Dhavhidha kha rumela sithumi sakwe ku ta xola ni ku ta ziva didhoropa diya, kasi a txi na mana ku di hangalasa kani?
4Sekoko Hanumi a to teka sithumi sa Dhavhidha e si kuyula maletu a didhawa dimwedo, e wila syambalo sa sona kukhukhela hahatshi kala txiwununi, se e si tovela. 5Se vona va to yisa mhaka ka Dhavhidha, ene a to rumela vathu va kuva hingeta, nguko vavamna vava va ti ti ka tingana ta hombe ngutu; se mfumeli a to khene: Zumbani kheyo Jeriko, kala kuza maletu anu me kula, sekoko mi na wuya.
6Mbimo yile koko, vanana va ka Amoni va nga wona taku va vangile livengo la hombe hagari kwawe ni Dhavhidha; vanana va ka Amoni va to rumela kuya ramba 20.000 wa vavamna vo tsimbila ngu mikondo va Vasiriya ka Bheti-Reyobhe ni Vasiriya ka Zobha, ni 1.000 wa vavamna va mfumeli Mahaka, ni 12.000 wa vavamna va Tobhe. 7A di ti pfite Dhavhidha a to ruma Jowabhi ni dotshe dibutho da tindena ta yimbi kuya va wukela. 8Se vanana va ka Amoni va to huma veya fola ha txikeni ka nyumba, kambe Vasiriya va Zobha ni Reyobhe, ni vavamna va Tobhe ni va Mahaka, va ti ngu didhawa ka thembweni.
9Mbimo yi Jowabhi a nga wona to yimbi yi ta ngu masoni ni msana, a to sawula vavamna va mtamo hagari ka totshe tindena ta ka Israyeli, e va folisa kasiku va txi lwa ni Vasiriya. 10Se vathu vamwani e va ningela manzani ka mwanawe Abhixayi, awule a nga va folisa ngu litxhatxha kasiku va txi lwa ni vanana va ka Amoni. 11Se a to khene: Ngako Vasiriya va di ni mtamo ngutu kupinda ani, u nata, u ta ni vhuna, kambe ngako vanana va ka Amoni va di ni mtamo kupinda awe, ni nata ni ta kuvhuna. 12Ngu toneto, koko, tsana, a hi tsaneni hi lwela vathu ni madhoropa a Txizimu txathu; sekoko Mkoma a na mahe ti ti wonekako i di ta tinene masoni kwakwe.
13Sekoko Jowabhi kumweko ni vathu vale a nga ti navo, va to tshuketa ve lwa ni Vasiriya; aniko Vasiriya va to tutuma masoni kwakwe.
14Se mbimo yile vanana va ka Amoni va nga wona taku Vasiriya va tutumile, ni vona va to tutuma masoni ka Abhixayi, ve wulela didhoropani; kambe Jowabhi a to wuya ngu ka vanana va ka Amoni e tshumela eya Jerusalema. 15Mbimo yile koko, Vasiriya va nga wona taku va xutwe masoni ka va ka Israyeli, va to sengeletana kambe. 16Se Hadhadhezeri a to rumela vathu kuya dhana Vasiriya, vale va nga ti ti mtxhatuko ka mnambo, kambe vona va to ta Helami; se Sobhaki mthangeli wa dibutho da yimbi da Hadhadhezeri, a ti thangete masoni kwawe. 17A dite pfite Dhavhidha, a to sengeleta votshe va ka Israyeli, e txhatuka Jordhani, eya Helami; kambe Vasiriya va to emeka ve wukela Dhavhidha, se ve lwa nayo. 18Kambe Vasiriya va to tutuma masoni ka va ka Israyeli, se Dhavhidha a to daya 700 wa tsimbitisi va sikotxikani ni 40.000 wa vavamna va vagadhi va mahantxhi; e daya ni Sobhaki, mthangeli wa dibutho da yimbi e fela koneho. 19Va di ti woni koko, votshe vafumeli, sithumi sa Hadhadhezeri, ti to va xutwe ngu va ka Israyeli, va to kombela kudikha kumweko ni va ka Israyeli, ve va thumela; se Vasiriya va to thava kuvhunetela kambe vanana va ka Amoni.
Currently Selected:
2 Samuwele 10: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
2 Samuwele 10
10
Dhavhidha e xula va ka Amoni ni Vasiriya
(1 Makronika 19:1-19)
1Se ku to maheka taku, msana keto, mfumeli wa vanana va Amoni a to fa, Hanumi mwanana wakwe e fuma ka wukhalo wakwe. 2Sekoko Dhavhidha a to khene: Ni na maha wumbilu ka Hanumi, mwana Nahasi, nga kule tate wakwe a nga ni mahela wumbilu. Se Dhavhidha a to rumela sithumi sakwe kuya thavelela Hanumi, ngu mhaka ya kufelwa ngu tate wakwe; se sithumi sa Dhavhidha si to ta ditikoni ka vanana va Amoni. 3Sekoko vathengeli va vanana va Amoni va to kha vona ka nyamne wawe Hanumi: Ina u alakanya taku, Dhavhidha a rumela vathu vava, ku ta kuthavelela ngu kuranda tate wako kani? Ina Dhavhidha kha rumela sithumi sakwe ku ta xola ni ku ta ziva didhoropa diya, kasi a txi na mana ku di hangalasa kani?
4Sekoko Hanumi a to teka sithumi sa Dhavhidha e si kuyula maletu a didhawa dimwedo, e wila syambalo sa sona kukhukhela hahatshi kala txiwununi, se e si tovela. 5Se vona va to yisa mhaka ka Dhavhidha, ene a to rumela vathu va kuva hingeta, nguko vavamna vava va ti ti ka tingana ta hombe ngutu; se mfumeli a to khene: Zumbani kheyo Jeriko, kala kuza maletu anu me kula, sekoko mi na wuya.
6Mbimo yile koko, vanana va ka Amoni va nga wona taku va vangile livengo la hombe hagari kwawe ni Dhavhidha; vanana va ka Amoni va to rumela kuya ramba 20.000 wa vavamna vo tsimbila ngu mikondo va Vasiriya ka Bheti-Reyobhe ni Vasiriya ka Zobha, ni 1.000 wa vavamna va mfumeli Mahaka, ni 12.000 wa vavamna va Tobhe. 7A di ti pfite Dhavhidha a to ruma Jowabhi ni dotshe dibutho da tindena ta yimbi kuya va wukela. 8Se vanana va ka Amoni va to huma veya fola ha txikeni ka nyumba, kambe Vasiriya va Zobha ni Reyobhe, ni vavamna va Tobhe ni va Mahaka, va ti ngu didhawa ka thembweni.
9Mbimo yi Jowabhi a nga wona to yimbi yi ta ngu masoni ni msana, a to sawula vavamna va mtamo hagari ka totshe tindena ta ka Israyeli, e va folisa kasiku va txi lwa ni Vasiriya. 10Se vathu vamwani e va ningela manzani ka mwanawe Abhixayi, awule a nga va folisa ngu litxhatxha kasiku va txi lwa ni vanana va ka Amoni. 11Se a to khene: Ngako Vasiriya va di ni mtamo ngutu kupinda ani, u nata, u ta ni vhuna, kambe ngako vanana va ka Amoni va di ni mtamo kupinda awe, ni nata ni ta kuvhuna. 12Ngu toneto, koko, tsana, a hi tsaneni hi lwela vathu ni madhoropa a Txizimu txathu; sekoko Mkoma a na mahe ti ti wonekako i di ta tinene masoni kwakwe.
13Sekoko Jowabhi kumweko ni vathu vale a nga ti navo, va to tshuketa ve lwa ni Vasiriya; aniko Vasiriya va to tutuma masoni kwakwe.
14Se mbimo yile vanana va ka Amoni va nga wona taku Vasiriya va tutumile, ni vona va to tutuma masoni ka Abhixayi, ve wulela didhoropani; kambe Jowabhi a to wuya ngu ka vanana va ka Amoni e tshumela eya Jerusalema. 15Mbimo yile koko, Vasiriya va nga wona taku va xutwe masoni ka va ka Israyeli, va to sengeletana kambe. 16Se Hadhadhezeri a to rumela vathu kuya dhana Vasiriya, vale va nga ti ti mtxhatuko ka mnambo, kambe vona va to ta Helami; se Sobhaki mthangeli wa dibutho da yimbi da Hadhadhezeri, a ti thangete masoni kwawe. 17A dite pfite Dhavhidha, a to sengeleta votshe va ka Israyeli, e txhatuka Jordhani, eya Helami; kambe Vasiriya va to emeka ve wukela Dhavhidha, se ve lwa nayo. 18Kambe Vasiriya va to tutuma masoni ka va ka Israyeli, se Dhavhidha a to daya 700 wa tsimbitisi va sikotxikani ni 40.000 wa vavamna va vagadhi va mahantxhi; e daya ni Sobhaki, mthangeli wa dibutho da yimbi e fela koneho. 19Va di ti woni koko, votshe vafumeli, sithumi sa Hadhadhezeri, ti to va xutwe ngu va ka Israyeli, va to kombela kudikha kumweko ni va ka Israyeli, ve va thumela; se Vasiriya va to thava kuvhunetela kambe vanana va ka Amoni.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.