2 Vafumeli 8
8
Wamsikati wa Msunami e tshumelela ditikoni kwakwe
1Se Elixa a to womba ka wule wamsikati a nga m'wusela mwanana, a txi khene: Khukha u tsula, awe ni votshe va mwaya wako, u ya luvela mu u no kumana, nguko Mkoma a dhani nzala, yi nota heta mtxhanu wa malembe ni mambidi. 2Se wamsikati a to khukha e maha madingano ni dipswi da m'thu wa Txizimu; a to tsula ene ni va mwaya wakwe, eya luvela ka ditiko da Vafilista, mtxhanu wa malembe ni mambidi.
3Se ku to maheka taku kugumani ka mtxhanu wa malembe ni mambidi, awule wamsikati a to wuya ngu ditikoni ka Vafislista, na a txi kwangula ka mfumeli, ngu kulava nyumba yakwe, ni mafu akwe. 4Se mfumeli a to gela Gehazi, dijaha da m'thu wa Txizimu, a txi khene: Na ku kombela ti to u ni geletela mithumo ya hombe yi a tolovelako ku yi maha Elizewu. 5Se mbimo yile Gehazi a nga txi geletela mfumeli ati Elixa a nga wusisa tona m'thu wo fa, awule wamsikati a to dila ka mfumeli, ngu mhaka ya nyumba yakwe ni mafu akwe, Gehazi a to khene: Awe mfumeli nyamne wangu, wamsikati wa kona ndiyo, ni mwanana wakwe, wule a nga wuswa ngu Elizewu.
6Kambe mfumeli a to wotisa ka wamsikati, se ene e mxawutela; sekoko mfumeli a to mninga mthenwa, a txi khene: Mmahe e tshumetelwa sotshe si i ngadi sakwe, ni mabhindu a mafu, kukhukhela ditshiku dile a nga huma ditikoni kala kuwa.
Elixa ni mfumeli wa Siriya
7Msana keto, Elixa a to ya Dhamasku, na a txi lwala Bheni-Hadhadhe, mfumeli wa Siriya; se va to m'gela ku kha vona: A bwakile m'thu wa Txizimu. 8Sekoko mfumeli a to khene ka Hazayeli: Teka txiningo manzani kwako, u hingeta m'thu wa Txizimu, a na ku wotisele ka Mkoma, a txi khene: Ina ni na kalamuka ka wulwati wuwa kani?
9Sekoko Hazayeli a to tsula kuya wonana ni Elixa, a to teka txiningo manzani kwakwe, ka sotshe sile i nga ti sa sinene Dhamasku, mune wa magumi a makamelu na ma ti rwate, e ta bwaka masoni kwawe a txi khene: Mwanana wako Bheni-Hadhadhe a ni rumile ku ta wotisa tiya: Ina mwendo ni na kalamuka ka wulwati wuwa kani?
10Se Elizewu a to khene: Tsula u txi ya m'gela ku khawe: Kha ditshuri khu na mbi kalamuka, nguko Mkoma a ni kombile ti to kha ditshuri u na fa.
11Se a to mronolela a txi muwonisisa, eza ewa tingana; se m'thu wa Txizimu, a to dila. 12Se Hazayeli a to wotisa ku khene: Awe nyamne wangu wo dilela txani kani? Se Elixa a to xamula ku khene: Ngu ti to na ziva dikhombo di u no di maha txitimwi ka vanana va ka Israyeli. U na hisa mikhokhola yawe ngu mndilo, u na daya majaha awe ni mahorana ngu ditxhari, ni vafana vawe u na va tshatulela, u bhandelela sirumbu ka vavasikati.
13Se Hazayeli a to wotisa a txi khene: Ina yova txani txithumi txako, txi pindako yimbwa, txo txi nga za txi maha timhaka ta hombe kani? Elixa a to xamula ku khene: Mkoma a ni kombile to awe u na va mfumeli wa Siriya.
14Sekoko a to khukha ka Elixa e tshumelela ka nyamne wakwe, awu a nga khene: Kasi Elixa a ti khene txani kani? A ni gete ku khene kha ditshuri u na kalamuka!
15Ku to maheka taku, ka dimwani ditshiku, Hazayeli, e teka didhamba e di beta matini, e khubhunyeta khoheni ka mfumeli, a txi fa. Se Hazayeli a to fuma ka wukhalo wakwe.
Mfumo wa Jehoramu wa ka Judha
(2 Makronika 21:2-20)
16Se ka dilembe da wutxhanu da kufuma ka Joramu, mwana Akabe, mfumeli wa ka Israyeli, Josafati a txi ngadi e fumela Judha, a to khata kufuma Jehoramu, mwana Josafati, mfumeli wa ka Judha. 17A khatile kufuma a ti ni tanga ya magumi mararu a malembe ni malembe mambidi, a to fumela Jerusalema mtxhanu wa malembe ni mararu. 18Se a to tsimbila ngu tinzila ta vafumeli va ka Israyeli, nga tile va nga mahisa tona va nyumba ya ka Akabe, nguko msikati wakwe i ti ti mwanana wa Akabe wa dihorana, a to maha wubihi masoni ka Mkoma. 19Hambiketo Mkoma kha lava kukhundumusa Judha, ngu kuranda Dhavhidha, txithumi txakwe, nga ha a nga ti m'gete ku khene, a na mninga liwoningo ka vanana vakwe.
20Ka masiku a kufuma ka Jehoramu, va ka Edhomi va to lwisa mfumo wa ka Judha, se ve ti vekela mfumeli txitimwi kwawe. 21Sekoko Jehoramu a to pinda eya Zayiri, ni sotshe sikotxikani sakwe; se ene a to wuka ni wusiku e lwisa va ka Edhomi ni vathangeli va sikotxikani va nga ti ti mrandete, vathu va to tshumelela matendani kwawe.
22Ngu kumaha keto, va ka Edhomi va to venga mfumo wa ka Judha, kala ka ditshiku da nyamsi; sekoko Libhina nene a to vhutuka.
23Kutala ka mithumo ya Jehoramu ni totshe ti a nga maha, ina ti ngava ti sa bhalwa amu ka dibhuku da Matimu a vafumeli va ka Judha kani? 24Se Jehoramu a to fela ka vatate vakwe, e tshotshwa ka vatate vakwe, Didhoropani ka Dhavhidha; se mwanana wa kona Akaziya, a to fuma ka wukhalo wakwe.
Mfumo wa Akaziya, wa ka Judha
(2 Makronika 22:1-6)
25Ka dilembe da digumi ni mambidi da kufuma ka Joramu, mwana Akabe, mfumeli wa ka Israyeli, a to khata kufuma Akaziya, mwana Jehoramu, mfumeli wa ka Judha. 26Akaziya a ti ti ni tanga ya magumi mambidi a malembe ni mambidi, mbimo yile a nga khata kufuma, a to fuma dilembe dimwedo, kona Jerusalema.
27Se a to tsimbila ngu nzila ya nyumba ya ka Akabe, e maha wubihi masoni ka Mkoma, kufana ni nyumba ya ka Akabe, nguko i ti ti mwane wa nyumba ya ka Akabe.
28Se Akaziya a to tsula Ramoti-Gileyadhi, kumweko ni Joramu, mwana Akabe, ku yalwa ni Hazayeli, mfumeli wa Siriya; se Vasiriya va to dayisa Joramu. 29Sekoko mfumeli Joramu a to tshumela eya Jezireyeli kuya thumwa silonda sile a nga vangelwa Rama, na a txi lwa ni Hazayeli, mfumeli wa Siriya; se Akaziya mwana Jehoramu, mfumeli wa ka Judha, a to relela Jezireyeli kuya xola Joramu, mwana Akabe, ngako a nga txi lwala.
Currently Selected:
2 Vafumeli 8: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
