2 Vafumeli 24
24
1Ka masiku a Jehoyakimi, ku to humelela Nabhukodhonozori, mfumeli wa Bhabhilona, e xoma yimbi yo wukela Jehoyakimu e mmaha khumbi yakwe mndani ka malembe mararu; msana keto a to phemberuka e m'wukela.
2Se Txizimu txi to rumela Vakaldheya kuya lwisa Jehoyakimu, ni masotxhwa a Vasiro, ni masotxhwa a va ka Mowabhi, ni masotxhwa a vanana va Amoni; a to va rumela kuya lwisa Judha, kasi kuya va fuvisa, madingano ni dipswi dile Mkoma a nga ngadi womba, ngu mthumoni ka sithumi sakwe, i ku vaprofeti. 3Kha ditshuri madingano ni kuruma ka Mkoma, eto ti mahekile ditikoni ka Judha, a nga mthavisa masoni kwakwe ngu mhaka ya sionho sa Manasi, sotshe sile a nga si maha, 4kumweko ni mnoha wo mbi na mnandu, wu nga theketwa walo, ku txi tala Jerusalema ngu mnoha wo mbi na mnandu; ngu mhaka yeto, Mkoma kha tumela ku m'divalela.
5Kasi ngu wungi wa mithumo ya Jehoyakimu, ni totshe tile a nga ti maha, ina ti ngava ti sa bhalwa ka dibhuku da Matimu a vafumeli va ka Judha kani? 6Jehoyakimu a otete ka vatate vakwe; se mwanana wakwe Jowakimu a to fuma ka wukhalo wakwe.
7Se mfumeli wa Egipta kha nga nga huma ngu ditikoni kwakwe; nguko mfumeli wa Bhabhilona a honyote sotshe si i ngadi sa mfumeli wa Egipta, kukhukhela mnamboni ka Egipta kala ka mnambo wa Ewufrate.
Mfumeli Jowakimu wa ka Judha, e tekwa eya Bhabhilona
(2 Makronika 36:9-10; Jeremiya 27:19-20)
8Jowakimu a ti ti ni tanga ya digumi da malembe ni mtxhanu ni mararu mbimo yile a nga khata kufuma, a fumela Jerusalema mitxima yiraru; ditina da mame wakwe i ti ti Newusta, mwana Elinata, wa Jerusalema. 9Se a to maha wubihi masoni ka Mkoma, ku nga totshe tile a nga mahisa tona tate wakwe.
10Ka yona yile mbimo si to kwelela sithumi sa Nabhukodhonozori, mfumeli wa Bhabhilona, si tsula Jerusalema, se didhoropa di to randelwa. 11Kambe Nabhukodhonozori a tile, mfumeli wa Bhabhilona, e ta lwisa didhoropa, mbimo yile sithumi sakwe si ngadi randela. 12Sekoko a to huma Jowakimu, mfumeli wa ka Judha, eya ka mfumeli wa Bhabhilona, kumweko ni mwamwakwe ni sithumi sakwe, ni madhota akwe, ni mithenwa yakwe; se mfumeli wa Bhabhilona a to mñola, ka dilembe da wutxhanu ni mararu da kufuma kwakwe. 13A to thavisa totshe tithomba ta Nyumbani ka Mkoma ni ta nyumbani ka mfumeli; a to fayetela sotshe siya sa nzalama si nga ti ti mahilwe ngu Solomoni mfumeli wa Israyeli, dithepeleni ka Mkoma, madingano ni tile a nga ti wombile Mkoma. 14Nabhukodhonozori a to teka votshe va Jerusalema, kumweko ni votshe vathangeli, ni votshe vavamna va lisima, 10.000 wa tikhumbi, ni votshe vavati ni vanyatisimbi; ku to sala sisiwana dwe ditikoni mule.
15 # Wona ni ka: Eze. 17:12. Sekoko, Nabhukodhonozori a to ñola Jowakimu e mtsulisa Bhabhilona, ni mame wa mfumeli, ni vasikati va mfumeli, ni mithenwa yakwe, e teka ni vanyamitamo va ditiko ngu Jerusalema kala Bhabhilona. 16Se votshe vavamna va tindena vo dingana 7.000, vavati ni vanyatisimbi kala 1.000, votshe vale i ku zikhuzu sa yimbini, a to va teka votshe mfumeli wa Bhabhilona kota tikhumbi Bhabhilona.
17Se mfumeli wa Bhabhilona, a to fumisa Mataniya i ku tatanyani wa Jowakimu, e mninga ditina daku i Zedhekiya.
Kufuma ka Zedhekiya, wa ka Judha
(2 Makronika 36:11-12; Jeremiya 52:1-3)
18 # Wona ni ka: Jer. 27:1-22; 28:1-17. Zedhekiya a ti ti ni tanga ya magumi mambidi a malembe ni dimwedo, mbimo yile a nga khata kufuma, se a to fumela Jerusalema digumi da malembe ni dimwedo; se ditina da mwamwakwe i ti ti Hamutali, mwana Jeremiya, wa ditikoni ka Libhina. 19Se a to maha wubihi masoni ka Mkoma, kufana ni totshe tile a nga mahisa tona Jowakimu. 20Se ti mahisile tiya ngu mhaka ya txiviti txa Mkoma txitimwi ka Jerusalema ni ka Judha, eza e va nyenya masoni kwakwe; se Zedhekiya a to wukela mfumeli wa Bhabhilona.
Currently Selected:
2 Vafumeli 24: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
