2 Vafumeli 17
17
Kufuma ka Hoseya, wa ka Israyeli
1Ka dilembe da wugumi ni mambidi da kufuma ka Akazi, mfumeli wa ka Judha, Hoseya, mwana Ela, a to khata kufumela Israyeli na a di Samariya, mtxhanu wa malembe ni mune. 2Se a to maha wubihi masoni ka Mkoma; hambi keto kha nga vale va nga khata ve fumela Israyeli, na asi se fuma ene. 3A to lwiswa ngu Salmanaseri, mfumeli wa Asiriya, se Hoseya a to maha khumbi yakwe, ni ku mluva. 4Hambi keto, mfumeli wa Asiriya a mani txikungo txa Hoseya, nguko a ti rumete mitumi ka So, mfumeli wa Egipta, asi ngadi e luva kambe ka mfumeli wa Asiriya dilembe ni dilembe, nga kale; sekoko mfumeli wa Asiriya a to mkhotela mkorani.
Vasiriya ve xula Samariya
5Nguko mfumeli wa Asiriya a to fumela dotshe ditiko kala kuya hoka Samariya, e di randela malembe mararu. 6Ka dilembe da digumi ni mune, da kufuma ka Hoseya, mfumeli wa Asiriya a to honyola Samariya, se va ka Israyeli a to va tsulisa Asiriya, kota tikhumbi, eya va veka Hala ni Habhori, hafuhi ni mnambo wa Gozani, ni mu ka madhoropa a Vamidhiyani.
7Ti mahekile tiya ngu ku vanana va ka Israyeli, va nga onha ka Mkoma, Txizimu txawe, awu a nga va humisa ngu ditikoni ka Egipta, hahatshi ka dianza da Faro, mfumeli wa Egipta; se va to khozela simwani sizimu. 8Se va to tsimbila ngu sileleto sa mifumo yile, Mkoma a nga yi thavisa kule ka vanana va ka Israyeli, ya sihena sa vafumeli va ka Israyeli. 9Se vanana va ka Israyeli, ngu kusisala, va to maha ti i nga ti si nga ta tinene masoni ka Mkoma, Txizimu txawe; va to aka siluvelo ka otshe madhoropa awe, kukhukhela ka txitezi txa vawoneleli, kala ka didhoropa da mtamo. 10#Wona ni ka: 1 Vafu. 14:23. Va to aka sithombe, ni so vatwa, ka sotshe siluvelo sa mimangoni, ni hahatshi ka yotshe mindonga yo nakana. 11Se va to hisa dibaselo ka sotshe siluvelo, madingano ni mifumo yile Mkoma a nga yi tutumisa masoni kwawe; kambe va to maha to biha kasi kuwusa kuhenya ka Mkoma. 12Kambe va thumete sithungulu sile Mkoma a khalako ku va gela a txi khene: Mi nga ti maheni eto.
13Se Mkoma a to wukela Israyeli ni Judha, ngu dipswi da votshe vaprofeti, ni votshe vahuti, a txi khene: Hundulukani ka tinzila tanu to biha, mi vekisa milayo yangu ni sileleto sangu, madingano ni Milayo yotshe ni nga ninga vatate vanu, kambe ni nga rumela kwanu ngu sithumi sangu, i ku vaprofeti. 14Hambiko kha va mu engisa; va to ti nemelisa kuthumani kwawe, nga mathumelo a vatate vawe, va nga mbi kholwa ka Mkoma, Txizimu txawe. 15Se va to lamba sileleto ni txitumelelano a nga ti txi mahile ni vatate vawe, ni wufakazi wule va nga ti mahile vatate vawe, va to tsimbila ngu wukanganyisi, na i ti maphanga, kufana ni mifumo yile yi nga ti ti madhawani kwawe, ayile Mkoma a nga ti ti va gete ku va nga yi londete. 16Se va to leka yotshe milayo ya Mkoma, Txizimu txawe, ve maha sithombe so tshulwa sa marole mambidi; kambe va to maha txithungulu txo vatwa, ni ku khizamela dotshe dibutho da nzumani, ve thumela Bhahali. 17#Wona ni ka: Dhewut. 18:10. Kambe va to phindisa ngu ha ka mndilo vanana vawe vavafana ni vamahorana, ve ti ningetetela amu ko xaxuva, ni kudhunda wuñanga, va txi ti xavisa, ngu kumaha tile i ku to biha masoni ka Mkoma, kasi ku mu wusela txiviti. 18Ngu mhaka yeto, Mkoma a to henyela Israyeli, e mthavisa masoni kwakwe; kha ka sala ni wammweyo, hahanze ka lihunzu la ka Judha.
19Hambi Judha kha vekisa milayo ya Mkoma, Txizimu txakwe; aniko a to tsimbila ngu sileleto sile si nga mahwa ngu Israyeli. 20Ngu kumaha keto, Mkoma a to nyenya yotshe mbewu ya ka Israyeli, e va tsindaveta, ni ku va ningela manzani ka vakhozisi, kala kuza e va thavisa masoni kwakwe.
21Nguko msana ka kule Mkoma a nga abanisa Israyeli ka nyumba ya Dhavhidha, va to fumisa Jerobhowamu mwana Nebhate; Jerobhowamu a to hambukisa Israyeli amu ka kulondisa Mkoma, e va maha ve onha txionho txa hombe. 22Ngu kumaha keto, vanana va ka Israyeli, va to maha sotshe sionho sile Jerobhowamu a nga ti si mahile; kha va nga nga hambuka ka sona. 23Kala kuza Mkoma e thavisa Israyeli masoni kwakwe, nga kule a nga nga womba ngu sithumi sakwe, i ku vaprofeti; a tekisilweto Israyeli e tsuliswa Asiriya, emo a manekako kona kala ka ditshiku da nyamsi.
Vasiriya va na ya zumba kona Israyeli
24Se mfumeli wa Asiriya a tisile vathu ngu Bhabheli, ni Kuta, ni Avha, ni Hamati, ni Sefarivhayimi, e ta va akisa madhoropani ka Samariya, wukhaloni ka vanana va ka Israyeli; va to teka Samariya e maha thomba yawe, ve zumba ka madhoropa a kona. 25Se ku to maheka taku, kukhukhela ve khata kuzumba muleya, kha va nga ninga txithavo ka Mkoma; se Mkoma a to rumela tingonyamo hagari kwawe, ti txi ya daya vokari kwawe. 26Veza ve womba ka mfumeli wa Asiriya va txi kha vona: Vathu vale u nga va tisa ve ta zumba madhoropani ka Samariya, kha va zivi sihena sa Txizimu txa mafu awa; wona ku txi va rumete tingonyamo, sekoko ta va dayela, nguko kha va zivi kukhozela Txizimu txa mafu awa. 27Sekoko mfumeli wa Asiriya a to rumisa dipswi do khene: Tekani mmweyo wa vaphaxeli vale mi nga ya va teka niya; a na tshumele eya zumba koneyo, e va gondisa txihena txa Txizimu txa mafu.
28A tile koko, mmweyo wa vaphaxeli vale va nga ti va tekile Samariya, e ta zumba Bheteli, a to va gondisa ti va nga txi dingana kuthavisa tona Mkoma.
29Eko ko, mfumo ni mfumo wu ti mahete sizimu sa wona, wu txi si veka ka makhalo o sawuleka, ale va nga ti mahela Vasamariya, vathu ni vathu ka madhoropa awe, emo va nga txi zumba ka ona. 30Se va Bhabheli va to maha Sukote-Bhenote; va Kuta va to maha Nergali; va Hamati va to maha Asima; 31se va Avhewu va to maha Nibhazi ni Taritake; se Vasefarivha va txi hisa vanana vawe mndiloni, masoni ka Adrameleki ni ka Anameleke, sizimu sa Sefarivha. 32Ngu kumaha keto, va to thava Mkoma, se avale vo ti namisa ngutu, ve va maha vaphaxeli, ka makhalo o sawuleka, i ku vona va nga txi maha mithumo tinyumbani ko sawuleka. 33Ngu kumaha keto, va ti ti ni txithavo ka Mkoma, ni kuthumela sizimu sawe, madingano ni sihena sa mifumo yile va nga ti tekilwe ka yona.
34 # Wona ni ka: Gen. 32:28; 35:10. Kala ka ditshiku da nyamsi, va maha sona sihena sile sa kukhata; kha va thavi Mkoma, kambe kha va londisi sileleto sakwe ni silayelo sakwe, hambi milayo, ni sirumo sile Mkoma a nga ruma vanana va Jakobe, awule a nga mninga ditina da Israyeli.
35Hambi keto, Mkoma a ti ti mahile navo txitumelelano, a txi va ruma ku khene: Mi nga thaveni simwani sizimu, hambi kukhizama masoni ka sona, mwendo ku si thumela, mi nga si phaxeleni. 36Aniko ka Mkoma, a nga mi humisa ngu mtamo wa hombe ditikoni ka Egipta, ni diwoko do nawulutwa, mi na thava enewu, ni ku mkhizamela, mi phaxela kwakwe. 37Se sileleto ni sirumo ni silayelo ni milayo yile a nga mi bhalela, mi na khatalela ku yi emela otshe masiku; kha mi na mbi thava simwani sizimu. 38Kha mi na mbi divala txitumelelano txile ni nga maha ni nanu; kha mi na mbi thava simwani sizimu. 39Aniko mi na thava Mkoma, Txizimu txanu, se ene a na mi hulukisa manzani ka votshe valala vanu.
40Hambi keto, vona kha va pfisisa; va to maha tolovelo yile yawe yo khata. 41Ngu kumaha keto, mifumo yiya yi txi thava Mkoma, ni kuthumela sithombe sawe so vatwa; nga tile va nga maha vatate vawe; va mahisa toneto ni vona vanana vawe, ni vanana va vanana vawe, kala ka ditshiku da nyamsi.
Currently Selected:
2 Vafumeli 17: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
