2 Makronika 35
35
Kumahwa ka M'buso wa Pasika
(2 Vafumeli 23:21-23)
1Josiya a to maha Pasika ya Mkoma kona Jerusalema, ve daya txihambana txa Pasika ngu ditshiku da wugumi ni mune da mtxima wo khata. 2Josiya a to veka vaphaxeli ka mithumo yawe a txi va tsanisa ka mthumo wa Nyumbani ka Mkoma. 3A to gela Valevhi vava ti ningetako ka Mkoma avale va nga basiswa, va nga ti ni mthumo wo gondisa votshe va ka Israyeli, a txi khene:
Wuletisani dibhokiso do sawuleka ka nyumba yi yi nga akwa ngu Solomoni, mwana Dhavhidha, mfumeli wa Israyeli; kha mi na mbi va ni mrwalo wuwa makatani kwanu. Konkuwa thumelani Mkoma, Txizimu txanu, ni vathu va txona va ka Israyeli. 4#Wona ni ka: 2 Vafu. 8:14. Tilongiseleni madingano ni tinyumba ta vatate vanu ni ngu mitxawa yanu madingano ni ti ti nga bhalwa ngu Dhavhidha, mfumeli wa Israyeli, ni mwanakwe Solomoni. 5Zumbani ha kusawulekani madingano ni tinyumba ta vatate va vananu, vanana va vathu, ku nave ni txyavelo txa tinyumba ta vatate va va ka Levhi. 6Mahani Pasika mi ti basisa mi yi longisela vananu, mi maha madingano ni dipswi da Mkoma a di a nga mi ninga ngu Mosi.
7Josiya a to ningela ka dianza da vanana va vathu 30.000 wa sivuntana ni tiphongo kasi kumaha ngu sona Pasika ya votshe va va nga titiho, ni 3.000 wa tihomu ti nga huma ka sifuyo sa mfumeli. 8Ni vona vathangeli va to ningela mningelo ka vathu ni ka vaphaxeli ni ka Valevhi ngu kuranda kwawe: Hilikiya, ni Zakariya, ni Jeyeli mthangeli wa Nyumbani ka Txizimu, va to ninga vaphaxeli 2.600 wa sifuyo sa sidotho ni 300 wa tihomu. 9Se Konaniya, ni Semaya ni Nathaniyele vanawe, ni Hasabhiya ni Jeyeli, ni Jozabheti vathangeli va Valevhi, va to ninga Valevhi 5.000 wa sifuyo sa sidotho ni 500 wa tihomu kasi kuva txi maha ngu sona Pasika. 10Se va di gwitile kulongisela mthumo wotshe vaphaxeli va to zumba ka makhalo awe ni vona Valevhi va to zumba ngu mitxawa yawe madingano ni kuruma ka mfumeli.
11Sekoko va to daya sihari sa Pasika, se vaphaxeli va to amukela mnoha manzani ka Valevhi ve wutheletela txitimwi ka txiluvelo, Valevhi vona va to khutela sihari sa kona. 12Va to veka ngu didhawa mningelo wo hiswa kasi kuve ninga vanana va vathu madingano ni tinyumba ta vatate, kuva txi ningela ngu sona ka Mkoma madingano ni ti ti nga bhalwa amu ka dibhuku da Mosi; va to maha toneto ngu tihomu ni tona. 13#Wona ni ka: Eks. 12:8-9. Va to yoka nyama ya sihari sa Pasika ha mndiloni, madingano ni sileleto sa kona, se nyama yimwani va to yi bhika ngu mu ka tikhadi, ni mu ka mabhota ni mu ka magalangu, se va di vitusile va to phamela votshe vathu. 14Msana keto, Valevhi va to longisa sakudya sawe ni sa vaphaxeli, nguko vaphaxeli vanana va Aroni, va mahile mthumo wo ningela mningelo wo hiswa ni wa mafura kala kuza di txiswa. Ngu kumaha keto, Valevhi va to longisa sakudya sawe ni sa vaphaxeli, vanana va Aroni.
15Se vaembeleli, vanana va Asafe, va ti ti ha wukhaloni kwawe madingano ni kuruma ka Dhavhidha ni Asafe, ni Hemani ni Jedhutumi, m'huti wa mfumeli, ni vawoneleli va sike kha va khukha ha makhaloni kwawe, nguko vanawe va ka Levhi va va longisete sakudya sawe.
16Ka donedo ditshiku ku to longiselwa mthumo wotshe wa Mkoma kasi ku ku txi mahwa Pasika ni kuningela mningelo wo hiswa txitimwi ka txiluvelo txa Mkoma, madingano ni kuruma ka mfumeli Josiya. 17#Wona ni ka: Eks. 12:1-20. Ka yoneyo mbimo vanana va ka Israyeli avale va nga maneka va diho, va to maha Pasika ni m'buso wa mapuwu o mbi tshumbelwa, mndani ka mtxhanu wa masiku ni mambidi. 18Kukhukhela ka masiku a mprofeti Samuwele, kha ku khali kumaheka Pasika yo fana ni yile ditikoni da Israyeli, hambi ka vafumeli va ka Israyeli, kha va khali kumaha Pasika yo fana ni yi yi nga mahwa ngu Josiya, ni vaphaxeli, ni va ka Levhi, ni votshe va ka Judha, ni va ka Israyeli, avale va nga maneka va diho, kumweko ni vahanyi va Jerusalema. 19Pasika ya kona yi mahilwe ngu dilembe da wugumi ni mtxhanu ni mararu, a kufuma ka Josiya.
Magwito a kufuma ka Josiya
(2 Vafumeli 23:28-30)
20Msana ka kuva Josiya a di hetile kulongisela Nyumba ya Mkoma, Neko, mfumeli wa Egipta, a to kwelela ni yimbi kasi ku a txi yalwa ni Karkemixe, hafuhi ni Ewufrate. 21Sekoko, Neko a to rumela mitumi a txi khene:
I ntxani ni ku natxo ani ni nawe, mfumeli wa va ka Judha kani? Ani ni ya tela kutalwa ni nawe nyamsi, kambe ni ta wukela nyumba yi ni lwako nayo; se Txizimu txi ti kha txona ni na kuluvete: Leka kulwa ni Txizimu, txi txi ku ni nani, kasi ku txi si kulovisi.
22Kambe Josiya kha tshembereka e wona msana; aniko a to tihunda, a txi yalwa ni Neko; kha engisa mapswi a Neko, ale ma nga huma ngu txisofuni ka Txizimu; a to ta lwa ni Neko mkovani ka Megidho. 23Se va malaho va to fula mfumeli Josiya; sekoko, mfumeli a to khene ka sithumi sakwe:
Ni thaviseni ahawa, nguko ni dawisilwe ngutu.
24Se sithumi sakwe si to mu humisa txikotxikani, veya m'beta ka txikotxikani txa wumbidi va nga ti natxo, ve mu tsulisa Jerusalema; se a to fa, e tshotshwa mathithani ka vatate vakwe; se votshe va ka Judha ni Jerusalema va to dila Josiya.
25Se Jeremiya a to maha txidilo txo dila Josiya; se votshe vaembeleli vavamna ni vavasikati va to womba-womba ngu timhaka ta Josiya tindandoni kwawe, kala ka ditshiku da nyamsi; nguko va ti mahile txileleto ka Israyeli; wonani taku “ti bhatwe ka dibhuku da sidilo.”
26Sekoko mithumo yimwani ya Josiya, ni wunene wakwe, madingano ni tile ti nga bhalwa ka Mlayo wa Mkoma, 27ni mithumo yakwe yo khata ni yo gwita, yi bhatwe amu ka dibhuku da matimu a vafumeli va Israyeli ni va Judha.
Currently Selected:
2 Makronika 35: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
