2 Makronika 31
31
Wuveketeti wu nga mahwa ngu Ezekhiya
1Msana ka kuva va di gwitile kumaha Pasika, votshe va ka Israyeli va to khukha veya ka madhoropa a va ka Judha va txiya fayetela marigwi awe a wukhongeli va txi wilela ni tiphande tawe, va khundumusela ni makhalo awe o guleka ni siluvelo ka ditiko dotshe da va ka Judha ni da va ka Bhenjamini, ni da va ka Efrayime ni da va ka Manasi, kala kuza va txi heta sotshe. Se votshe vanana va ka Israyeli va ta tshumelela madhoropani kwawe.
2Mfumeli Ezekhiya a to veka mitxawa ya vaphaxeli ni ya va ka Levhi madingano ni mithumo yawe, mmweyo ni mmwani ka mthumo wakwe; ahawa vaphaxeli ni Valevhi va nga ti fanela kuningela mningelo wa kuhiswa ni miningelo ya kudikha, va txi bonga ni kudhumisa Mkoma ngu tindando ha sikenini sa wugoveloni kwakwe. 3A to katekisa txyavelo txa thomba ya mfumeli txi maha mhamba yo hiswa mixo ni minova, ni mhamba yo hiswa ngu m'longiso ni m'buso wa kumekani ka mtxima, madingano ni ti ti nga bhalwa amu ka Mlayo wa Mkoma.
4 # Wona ni ka: Mit. 18:12-13,21. A to ruma vathu, vahanyi va Jerusalema kuningela txyavelo ka vaphaxeli ni Valevhi kasiku ve mana mtamo wo khatalela Mlayo wa Mkoma. 5Msana ka kuva txiziviso txi di zivilwe ngu vanana va ka Israyeli va to tisa fulaho yayingi yo khata, ni vhinya ya yiphya, ni mtona ni wulombe ni simwani ngu kutala ka sona sa thembweni ve ningela ni sa wugumi wa simaha sotshe si va nga funyela tithembweni kwawe. 6Se vanana va ka Israyeli ni va ka Judha ava va nga aka madhoropani ka Judha va to tisa sa wugumi ngu tihomu ni tinvuta ni wugumi wa silo si si nga basiswa sa Mkoma, Txizimu txawe, va txi si wungeletela si txi maha tindunduma. 7Va to khata ku si wungeletela ngu mtxima wa wuraru, ve heta ngu mtxima wa wutxhanu ni wumbidi. 8Ezekhiya ni vathangeli vakwe va tota wona tindunduma, se ve dhumisa Mkoma, ni kubonga va ka Israyeli vathu vakwe. 9Se Ezekhiya a to wotisa vaphaxeli ni va ka Levhi ngu mhaka ya tindunduma tile ta sakudya. 10Se Azariya mphaxeli wa hombe wa nyumba ya Zadhoki a to mu gela a txi khene:
Kukhukhela mbimo ayi va nga khata ngu yona kuningela mningelo Nyumbani ka Mkoma, hi dyite, hi khura si tshumela si sala sakudya sasingi, nguko Mkoma a katekisile vathu vakwe, se ngu mamahelo eyo ku to sala sakudya sasingi ngutu.
11Ezekhiya a to leleta kuva txi longisa sinyumbana Nyumbani ka Mkoma, se ve maha toneto. 12Va to wuletisela ka sona miningelo ni sa wugumi ni silo so sawuleka; totshe ti txi thangelwa ngu Konaniya, Mulevhi, ni Simeyi mnanda wakwe. 13Jeyeli, ni Azariya, ni Nahati, ni Asayeli, ni Jerimoti, ni Jozabhadhi, ni Eliyeli, ni Ismakiya, ni Mahate, ni Bhenaya i ti ti vawoneleti hahatshi ka mlayo wa Konaniya ni mnanda wakwe Simeyi, madingano ni kuruma ka mfumeli Ezekhiya, ni ka Azariya, mthangeli wa Nyumbani ka Txizimu. 14Ni Kora, mwana Imina, Mulevhi, muwoneleli wa txike txa didhawa da wutxani, i ti ti mxayisi wa miningelo ya kuranda kwawe, ayi yi ningelwako ka Txizimu, ni mphakeli wa miningelo yo sawuleka ya Mkoma ni simaha so sawuleka ngutu. 15Vavhuneteli vakwe i ti ti Edheni, ni Miniyamimi, ni Jesuwa, ni Semaya, ni Amariya, ni Sekaniya, vathu vava i ti ti vo thembeka va ti vekilwe madhoropani ka vaphaxeli, kasi kuve phakela vanawe sakudya, ngu mitxawa yawe, vahombe ni vavadotho. 16Hahanze ka vanana va vafana ava va nga balwa, va malembe mararu kuya masoni, ka votshe ava va wulelako Nyumbani ka Mkoma ngu mthumo wa ditshiku ni ditshiku kutisa mithumo yawe ngu mitxawa yawe. 17Ni va va nga maha bhalela ya kubalwa ngu tihunzu ta vaphaxeli, madingano ni tinyumba ta vatate vawe, ni Valevhi, va tanga ya magumi mambidi a malembe kuya masoni, madingano ni mitxawa yawe. 18Wotshe msengeletano wu ti fela kuya ku bhalisani ni votshe vanana vawe vavadotho, ni vasikati vawe, ni vanana vamahorana, ni vanana va mazambi, nguko va ti sawulekisile ka sotshe so sawuleka. 19Hambi ka vanana va Aroni, vaphaxeli ava va nga aka ka tithembwe ta hahanze ka madhoropa awe, va ti ti ni vathu ava va nga dhanwa ngu matina awe, kasi kuve phakela votshe vavamna va vaphaxeli ni Valevhi votshe avale va nga balwa.
20Ezekhiya a to mahisa toneto ka ditiko dotshe da Judha, e maha ta tinene, ni to lulama, ni ta ditshuri masoni ka Mkoma Txizimu txakwe. 21Ka wotshe mthumo wu a nga wu khata wa Nyumba ya Txizimu, ni wa mlayo, wa sileleto, kasi ku a txi lava Txizimu txakwe ngu mbilu yakwe yotshe, a to kateka.
Currently Selected:
2 Makronika 31: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
