2 Makronika 21
21
1Msana keto, Josafati a to otela ni vatate vakwe, e tshotshwa ka wukhalo wumwewo ni vatate vakwe, Didhoropani ka Dhavhidha; se mwanana wakwe Jehoramu a to fuma ka wukhalo wakwe.
Kufuma ka Jehoramu, wa ka Judha
(2 Vafumeli 8:16-24)
2Se a ti ti ni vanawe, i ku vanana va Josafati: Azariya, Jeyelini, Zakariya, Azariyawu, Mikayeli ni Sefatiya; votshe va va i ti ti vanana va Josafati mfumeli wa ka Israyeli. 3Kambe tate wawe a va ningile tithomba tatingi, ta silivhela, ni ta nzalama, ni simwani simaha sa lisima, ni madhoropa a mikhokhola ya va ka Judha, se wukoma a to ninga Jehoramu, nguko ngene matiwula. 4Se ngako Jehoramu a di khalahatshile ka wukoma wa tate wakwe ni ngako a di tsani, a to daya voshe vanawe ngu ditxhari e daya ni vathangeli vamwani va ka Israyeli. 5Jehoramu a khatile kufuma a ti ni tanga ya magumi mararu a malembe ni malembe mambidi, a to fuma Jerusalema mtxhanu wa malembe ni mararu. 6Se a to tsimbila ngu tinzila ta vafumeli va ka Israyeli, nga tile va nga mahisa tona va nyumba ya ka Akabe; nguko msikati wakwe i ti ti mwanana wa Akabe, a to maha wubihi masoni ka Mkoma. 7#Wona ni ka: 1 Vafu. 11:36. Hambi keto, Mkoma kha ti lava kukhundumusa nyumba ya ka Dhavhidha, ngu mhaka ya txitumelelano a txi a nga ti tximahile ni Dhavhidha, nga ha a nga ti m'gete ku khene a na mninga liwoningo la masiku otshe ene ni vanana vakwe.
8Ka masiku a Jehoramu, va ka Edhomi va to lwisa mfumo wa ka Judha, se ve ti vekela mfumeli txitimwi kwawe. 9Sekoko Jehoramu a to pinda ni vathangeli vakwe, ni sotshe sikotxikani sakwe; se ene a to wuka ni wusiku e lwisa va ka Edhomi ni vathangeli va sikotxikani va nga ti ti mrandete. 10Ngu maha yeto, va ka Edhomi va to wukela mfumo wa ka Judha kala ka ditshiku da nyamsi; ka yoneyo mbimo Libhina nene a to vhutuka, nguko Jehoramu a ti ti lekile Mkoma Txizimu txa vatate vakwe. 11A to maha makhalo o guleka amu mimangoni ka va ka Judha, a kujetela vathu va Jerusalema kuva txi onha ni va ka Judha e va yisa ka toneto.
12Sekoko mprofeti Eliya a to bhalela Jehoramu, a txi khene:
Mkoma, Txizimu txa tate wako Dhavhidha a khene: U lekile kutsimbila ngu tinzila ta Josafati tate wako ni ta Asa mfumeli wa Judha, 13kambe u tsimbila ngu tinzila ta vafumeli va Israyeli, u mahile ti to va ka Judha ni vahanyi va Jerusalema va txi onha, ve londeta wubihi kufana ni va nyumba ya ka Akabe; kambe u date ni vananu, va nyumba ya tate wako, ava i nga ti ti vavanene kupinda awe. 14Ngu toneto, Mkoma a na ku wuyisela wulwati wa hombe ngutu, hagari ka vathu vako, ni ka vanana vako, ni ka vasikati vako ni ka sotshe asi u ku naso. 15Na nawe, u na lwala ngu wulwati wa hombe wa mndani, awu wu no kula kala kuza masembe ako me huma.
16 Mkoma a to maha ti to Vafilista ni Vaarabhi, va va hanyako hafuhi ni Vaetiyopiya, ve wukela Jehoramu. 17Va to kwelela veya ditikoni da Judha, veya lwisa Jehoramu, va to teka yotshe thomba ya nyumbani ka mfumeli, ve ñola vasikati vakwe ni vanana vakwe; ve siya dwe Jehohakazi, mwanana wakwe wo gwita.
18Se msana ka totshe tiya, Mkoma a to peka Jehoramu ngu wulwati wo thisa wo mbi thumwa. 19Se ku to maheka tito, ku di pindile masiku o tala, kugumani ka dilembe da wumbidi, a to huma masembe ngu kukula ka malwati, se efa a txi lwala ngutu; kambe vathu vakwe kha va muhiselo dibaselo, kufana ni kule va nga hisela vatate vakwe.
20A khatile kufuma a ti ni tanga ya magumi mararu a malembe ni malembe mambidi, a to fuma Jerusalema mtxhanu wa malembe ni mararu; a to fa, asi dilwi ngu m'thu, ve mtshotsha Didhoropani ka Dhavhidha, hambi keto, kha ya tshotshwa ka mathitha a vafumeli.
Currently Selected:
2 Makronika 21: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
