1 Samuwele 28
28
1Ku to maheka ka masiku aale taku, mbimo yi Vafilista va nga sengeleta mabutho a yimbi kasi kuya yimbini, ku yalwa ni va ka Israyeli, Akisi a to khene ka Dhavhidha: Tizive ngu ditshuri taku u na huma ni nani hi tsula wugoveloni, awe ni vathu vako.
2Sekoko Dhavhidha a to khene ka Akisi: Se awe u na tiziva kha kwati ti ti no mahwa ngu txithumi txako. Se Akisi a to khene ka Dhavhidha: Ngu kumaha keto, ni na kuveka kuva muwoneleli wa msungo wangu kala kupinduka.
Sawule e wotisa ka m'huti
3 # Wona ni ka: 1 Sam. 25:1. Ka mbimo yoneyo Samuwele a ti fite, votshe va ka Israyeli va ti mu dite, ve mtshotsha kona Rama, i nga ti didhoropa dakwe; se Sawule a ti tutumisile vahuti ni tiñanga ditikoni.
4Se Vafilista va to sengeletana, veta, ve ta gova Sunemi; se Sawule a to sengeleta votshe va ka Israyeli veya gova Gilibhowa. 5Se mbimo yi Sawule a nga wona wugovelo wa Vafilista, a to thava, e dhudhumela ngutu mbiluni kwakwe. 6Se Sawule a to wotisa ka Mkoma, kambe Mkoma kha mxamula, hambi ngu miloro, mwendo ngu tixolo, hambi ngu vaprofeti. 7Sekoko Sawule a to khene ka sithumi sakwe: Ni laveleni wamsikati wule a ku ni sikwembu, kasiku ni tsula kwakwe ni ya mwotisa. Se sithumi sakwe si to kha sona kwakwe: Wona taku, aho wamsikati a ku ni sikwembu kona Eni-Dhori.
8Se Sawule a to ti hundula ngu ku ambala simwani simaha, e khukha ene ni vamna vambidi veya ka wule wa msikati ni wusiku; a txi ya khene: Nikombela ti to wu ni xaxula ngu sikwembu sako, u ni dhanela wule ani ni no kugela.
9Sekoko wamsikati a to m'gela ku khene: Wona taku awe wa tiziva tile Sawule a nga maha, ta kulovisa ha mafuni vahuti ni va sikwembu; ngu kutxani koko u ni riyela ngu mlawu, kasiku u ni dayisa kani?
10Sekoko Sawule a to xambanya ngu Mkoma, a txi khene: Ni xambanya ngu Mkoma a hanyako, taku kha ku na mbi va ni phango kwako ngu mhakeyo.
11Sekoko wamsikati a to m'gela ku khene: Ni kudhanela mani kani? Se Sawule a nje khene: Ni dhanele Samuwele.
12Se mbimo yile koko wamsikati a nga wona Samuwele, a to peka huwa ngu dipswi do guleka; se wamsikati a to khene ka Sawule: Wu ni kanganyisela txani kani? Awe ngawe Sawule!
13Se mfumeli a to m'gela ku khene: U nga thave; kambe i txani u txi wonako kani? Sekoko wamsikati a to khene ka Sawule: Ni wona sizimu si humako ngu mafuni.
14Se e m'gela ku khene: Nza txiemo muni kani? Se wamsikati a to khene: Didhota di humako di di ambate txyambalo txo lapha ngutu. Se ngako Sawule a di pfisisile ti to i Samuwele a to namisa khohe hahatshi e khizama.
15Samuwele a to khene ka Sawule: U ni xanisela txani ngu ku ni dhana ni huma mafuni kani? Sekoko Sawule a to khene: Ni to pandiseka ngutu, nguko Vafilista valwa ni nani, se Txizimu txi ni lekile, kha txi ni xamuli kambe, hambi ngu ka vaprofeti, hambi ngu ka miloro. Ngu kumaha keto ni kudhani kasi ku ta ni gela ti ni dinganako ku ti maha.
16Sekoko Samuwele a to khene: Se u ni wotisela txani na wu txi ti wona taku Mkoma a ku lekile, ni ti to a mahile mlala wako kani? 17#Wona ni ka: 1 Sam. 15:28. Nguko Mkoma a mahile kwako madingano ni tile a nga kugela ngu txisofu txangu, ni ku Mkoma a vharute mfumo manzani kwako, se a wu ningete ka mungana wako Dhavhidha. 18#Wona ni ka: 1 Sam. 15:3-9. Ngako awe u nga mbi engisa dipswi da Mkoma, ni ku khwa maha ti ti kombisako kuhenya ka Mkoma txitimwi ka Vaamaleki, ngu mhaka yeto Mkoma a mahile eto nyamsi kwako. 19Se Mkoma a na kuningela awe ni va ka Israyeli manzani ka Vafilista, mangwana awe ni vanana vako mi na va ni nani; kambe wugovelo wa va ka Israyeli, Mkoma a na wu ningela manzani ka Vafilista.
20Kunukunuko Sawule a to wa e wombuluka hahatshi, e thava ngutu ngu mhaka ya mapswi ale a Samuwele, aha koza e guma ni mtamo, nguko a sanzi kudya sakudya ka dotshe ditshiku dile ni ka wotshe wusiku wa kona. 21Sekoko wamsikati a to ta ka Sawule, a di woni to Sawule wa thava ngutu, a to m'gela ku khene: Wona taku, txithumi txako txi engisile dipswi dako, ni vekile wutomi wangu manzani kwangu, ni engisile mapswi ale u nga ni gela. 22Konkuwa koko, engisa nawe mapswi a txithumi txako, ni na kuvekela sakudyanyana masoni kwako, udya, kasiku u na mana mtamo wo tsimbila.
23Kambe ene a to lamba, a txi khene: Kha ni na mbi dya. Se sithumi sakwe ni wule wamsikati va to mkurumeta; a to engisa dipswi dawe. Se a to khukha e khalahatshi txitimwi ka mbhedhu. 24Se wamsikati a ti ni dirole do nona m'tini kwakwe, a to kuluveta e di daya, e teka mpupu e wu vhuva e bhika simbwanda sa kwa mbi tshumbelwa. 25Se e si tisa masoni ka Sawule ni ka sithumi sakwe, ve ta dya. Msana keto, va to khukha ve tsula ka wona wusiku wule.
Currently Selected:
1 Samuwele 28: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
