1 Makronika 29
29
Miningelo yo aka Dithepele
1 # Wona ni ka: 1 Mak. 22:5. Dhavhidha a to womba kambe ka wotshe msengeletano a txi khene: Mwanana wangu Solomoni, ngene ekha a nga sawulwa ngu Txizimu, i ngadi mfana, kha se va ni mtamo, na kona mthumo wuwa mbwa hombe; nguko nyumba hi nga ya m'thu kambe nja Mkoma Txizimu. 2Ani koko, ni ti karatile ngu mtamo wangu wotshe, ni longisela Nyumba ya Txizimu txangu, nzalama ka mthumo wa nzalama, silivhela, ka sa silivhela, koporo ka sa koporo, simbi ka sa simbi, mapulango ka sa mapulango, ni marigwi a onekisi, ni marigwi a engaste ni marigwi o tshurisa ngu ona, ni yotshe mixowo ya marigwi a lisima, ni marigwi o rithimuka amangi ngutu. 3Se ngu kudhunda kwangu Nyumba ya Txizimu txangu, ni na ningela nzalama ni silivhela, ni si ningela Nyumbani ka Txizimu txangu, hahanze ka sotshe siya ni nga lulamisela nyumba yo sawuleka. 4I ku 3.000 wa titalenta ta nzalama, ta nzalama ya Ofiri, ni 7.000 wa titalenta ta silivhela yo hehuka, kasi kubhama ngu yona maseta a tinyumba; 5nzalama ka siya sa nzalama, silivhela ka siya sa silivhela, ka wotshe mthumo wa manza a vathumi. I mani koko, a nga tatako dianza dakwe ngu siningo e ningela ngu kuranda kwakwe nyamsi ka Mkoma kani? 6Sekoko vathangeli va vatate, ni vathangeli va tihunzu ta ka Israyeli, ni vathangeli va magumi a mazana ni va mazana, kala ka vathangeli va mthumo wa mfumeli va nga senga ngu kuranda kwawe, 7va to ningela ka mthumo wa Nyumba ya Txizimu 5.000 wa titalenta ta nzalama, ni 10.000 wa madrakima, ni 10.000 wa titalenta ta silivhela, ni 18.000 wa titalenta ta koporo, ni 100.000 wa titalenta ta simbi. 8Se ava va nga maneka va di ni marigwi a lisima, va to ma ningela kuva thomba ya Nyumbani ka Mkoma, manzani ka Jeyeli, mugerisoni. 9Se vathu va to tsaka ngu kule va nga ninga ngu kuranda kwawe, nguko va ningete ka Mkoma ngu mbilu to hetiseka; nene mfumeli Dhavhidha, a to tsaka ngu kutsaka ka hombe.
Dhavhidha e dhumisa Txizimu
10Ngu kumaha keto, Dhavhidha a to dhumisa Mkoma masoni ka wotshe msengeletano, a txi khene: Bongwa awe Mkoma Txizimu txa tate wathu Israyeli, ka yotshe mbimo. 11#Wona ni ka: Mat. 6:13. Wudhumo ni mtamo, ni nduma, ni kuxula ni wuhombe, nzako Mkoma; nguko sotshe si si ku nzumani ni ha mafuni nzako, mfumo mbwako Mkoma, kambe awe u ti guletile txitimwi ka votshe, kuva mthangeli. 12Se tithomba ni wudhumo si ta ngu kwako, awe wa fuma txitimwi ka sotshe, mtamo ni wukoma si manzani kwako; wa kulisa ni kuninga mtamo ka sotshe ngu manza ako. 13Konkuwa koko, awe Txizimu txathu, ha ninga kubonga ni kudhumisa ditina da wudhumo wako. 14Nguko ngani mani ani, ni vathu vangu mba mani, vaku hi nga sikota kuninga simaha so fana ni siya, ngu kuranda kwathu kani? Nguko sotshe sita ngu kwako, se ha si ningela manzani kwako. 15Nguko hi valuveli masoni kwako, hi vapfumba kufana ni vatate vathu; masiku athu ha mafuni ma fana ni mtsudi, kha ku nga ni yimwani themba. 16Mkoma, Txizimu txathu, kutala ka sotshe si hi nga lulamisela kasi ku akela nyumba ditina dako do sawuleka, sita ngu manzani kwako, sotshe nzako. 17Awe Txizimu txangu, ani na tiziva kha kwati tito, awe wa xola timbilu, niku u tsakiswa ngu wunene; ani nani ni ningete sotshe simaha siya ngu kutsaka ni kuranda ka mbilu yangu; se konkuwa ni woni ngu kutsaka taku vathu vako, va manekako hawa, va ningela ngu kuranda kwakwe. 18Mkoma Txizimu txa vatate vathu, Abrahamu, ni Isaake, ni Israyeli, vekisa eto mbimo yotshe, kunavela ka mipimiso ya timbilu ta vathu vako; u rendekelisa timbilu tawe kwako. 19Se ka Solomoni, mwanana wangu, mninge mbilu yo hetiseka, yo vekisisa sileleto sako, ni mithetho yako, ni milayo yako; yo maha totshe, ni kuaka nyumba yiya ya wukoma, yi ni nga yi lulamisela. 20Sekoko Dhavhidha a to khene ka wotshe msengeletano: Konkuwa, dhumisani Mkoma Txizimu txanu. Sekoko wotshe msengeletano wu to dhumisa Mkoma, Txizimu txa vatate vawe; va to khizama masoni ka Mkoma ni masoni ka mfumeli. 21Se ka ditshiku dimwani va to maha timhamba ka Mkoma, ve ningela miphaxo ya kuhiswa, ka Mkoma: Ngu 1.000 wa marole, ni 1.000 wa tihamba, ni 1.000 wa sivuntana, ni sa kusela sa kona, ni timhamba to tala ka dotshe ditiko da ka Israyeli. 22Se ka ditshiku donedo, va to dya ni kusela masoni ka Mkoma, ngu kutsaka ka hombe; se va to fumisa Solomoni, mwana Dhavhidha, ka wumbidi, ve mtota ngu mafura a Mkoma kuva mthangeli, ni Zadhoki kuva mphaxeli. 23#Wona ni ka: 1 Vafu. 2:12. Se Solomoni a to khalahatsha ha txikhaloni ka Mkoma, mfumeli ka wukhalo wa Dhavhidha, tate wakwe, se a to humelela; kambe votshe va ka Israyeli va to mu engisa. 24Se votshe vathangeli ni vahombe, kala ka votshe vanana va mfumeli Dhavhidha va to ti veka hahatshi ka mfumeli Solomoni. 25Se Mkoma a to kulisa Solomoni, ngutu-ngutu masoni ka votshe va ka Israyeli; e kulisa mfumo wakwe, kupinda wa vafumeli votshe vale va nga maneka ka Israyeli.
Kufa ka Dhavhidha
26Se Dhavhidha, mwanana wa Jese, a to fuma txitimwi ka dotshe ditiko da Israyeli. 27#Wona ni ka: 2 Sam. 5:4-5; 1 Mak. 3:4. Se Dhavhidha a to fuma mune wa magumi a malembe txitimwi ka Israyeli: A to fuma kona Hebroni, mtxhanu wa malembe ni mambidi, se e fuma magumi mararu a malembe ni mararu kona Jerusalema. 28Se a fite a di kumbile ngutu, a di ni masiku amangi, ni tithomba ni wudhumo; kambe mwanakwe Solomoni a to fuma ka wukhalo wakwe. 29Mithumo koko ya mfumeli Dhavhidha, yo khata hambi yo gwita, yi bhatwe ka matimu a Samuwele, m'huti, ni ka matimu a mprofeti Nathani, ni ka matimu a Gadhi, m'huti, 30kumweko ni wotshe mfumo wakwe, ni mtamo wakwe, ni ti ti nga maheka ka timbimo takwe, ni txitimwi ka Israyeli, ni txitimwi ka yotshe mifumo ya matiko ale.
Currently Selected:
1 Makronika 29: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
