1 Makronika 14
14
Mfumo wa Dhavhidha wa tumelwa ngu Hiramu
(2 Samuwele 5:11-12)
1Sekoko Hiramu mfumeli wa Tiro, a to rumela mitumi ka Dhavhidha, ni mapulango a mikedhari, ni vaaki va tinyumba, ni vavati, kasi ku ta muakela nyumba. 2Se Dhavhidha a to pfisisa taku Mkoma a mmahile mfumeli txitimwi ka Israyeli; nguko a guletile ngutu mfumo wakwe, ngu kuranda vathu vakwe va ka Israyeli.
Vanana va Dhavhidha vo velekwa Jerusalema
(2 Samuwele 5:13-16; 1 Makronika 3:5-9)
3Se Dhavhidha a to teka kambe vamwani vasikati kona Jerusalema; Dhavhidha a to veleka kambe vamwani vanana va mazambi ni vamahorana. 4Se matina a vanana vale a nga ti navo Jerusalema ngu awa: Samuwa, ni Sobhabhi, ni Nathani, ni Solomoni, 5ni Ibhari, ni Elisuwa, ni Elipeleti, 6ni Noga, ni Nefegi, Jafiya, 7ni Elisama, ni Bheheliyadha, ni Elifeleti.
Dhavhidha e xula Vafilista
8Mbimo yile koko, Vafilista va nga pfa taku, Dhavhidha a totilwe kuva mfumeli txitimwi ka dotshe ditiko da Israyeli, votshe Vafilista va to kwelela kuya lava Dhavhidha; se Dhavhidha a di ti pfite, koneko a to huma e yalwa navo. 9Se va di hokile Vafilista, va to hangalaka ngu mkova wa Refayime. 10Sekoko Dhavhidha a to wotisa ka Txizimu, a txi khene: Ni na kwelela ni yalwa ni Vafilista, ina u na va ningela manzani kwangu kani? Se Mkoma a to khene: Kwelela, nguko ni na va ningela manzani kwako.
11Se a di kwelete eya Bhahali-Perazimi, Dhavhidha a to va dayela koneyo; se a txi khene: Ngu dianza dangu, Txizimu txi hangalasile valala vangu, ku nga kuhangalaka ka mati. Ngu kumaha keto, wukhalo wule wu to dhanwa ku i Bhahali-Perazimi.
12Se va to siya sizimu sawe koneho; kambe Dhavhidha a to leleta taku si hiswa ngu mndilo.
13Kambe Vafilista va to tshumela veya xoma yimbi mkovani. 14Se Dhavhidha a to engeta kambe e wotisa ka Txizimu; se Txizimu txi m'gela ku kha txona: Khu na mbi va londeta; aniko va randele ngu msana kwawe, u na ya tshangana navo ngu masoni ka mimora; 15se mbimo yi mi no pfa sigingi sa mikondo amu ka mazokoro a mimora, sekoko huma u yalwa; nguko Txizimu txi na va txi di thangete masoni kwako, txi dayela dibutho da yimbi da Vafilista.
16Se Dhavhidha a to maha nga tile Txizimu txi nga mleletisa tona; a to dayela dibutho da yimbi da Vafilista, kukhukhela Gibheyoni kala Gezeri. 17Ngu kumaha keto, ditina da Dhavhidha di to hangalaka ka otshe matiko ale; se Txizimu txi to maha taku, e thaviseka txitimwi ka votshe vathu vale.
Currently Selected:
1 Makronika 14: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
