ZAKHARIA 4
4
Pakkitang passalenna ajé pajjennangengngé
1Malaéka' iya puraé mabbicara lao ri iyya'ro polési sibawa tedduka pada-pada teddué tau matinro. 2Makkutanani, “Aga muwita?”
Mappébalika, “Séddi ajé lampu polé ri ulawengngé. Ri cappa yasé'na engka onrong minnya'na, sibawa ri mattulilinna engka pitu lampu, iya tungke'-tungke'é mappunnai pitu onrong sumbung. 3Ri seddé atau sibawa abéyona ajé lampuéro engka duwa pong zaitun.”
4Nainappaka makkutana lao ri malaéka'éro, “Aga iya ripulambangngé ri barab-barangngéro, Puwang?”
5“Dé'ga muwissengngi?” pakkutanana lao ri iyya.
Pappébalikku, “Dé' Puwang.”
10bMakkedai iyaro malaéka'é lao ri iyya, “Iya pitu lampuéro iyanaritu iya pitu matanna Puwangnge iya jagaiyéngngi sininna tompo'na linoé.”#Aya' 10b lettu aya' 14 ripalétté'i ri onrongngéwé polé ri paccappurenna passalengngé kuwammengngi nasicoco' assiturusenna kajajiyangngé.
11Nainappaka makkutanasi ri aléna, “Aga bettuwanna iya duwa pong zaitungngé ri atau abéyona lampuéro? 12Aga topa bettuwanna takké zaitun ri benrénna iya duwa pipa ulaweng iya passolo'éngngi minnya zaitungngéro?”
13Pappébalinna ri iyya, “Dé'ga muwissengngi?”
“Dé' Puwang.” pappébalikku.
14Makkedani, “Iyaro iyanaritu duwa tau iya puraé napilé Puwangnge sininna alangngé sibawa rijello untu' Tumaningiwi.”
Jancinna Puwangnge lao ri Zérubabél
6Iyaro malaéka'é nasuroka palettu'i lao ri Zérubabél pasenna Puwang-ngéwé, “Tenniya nasibawang awatangeng tentara sibawa tenniyato nasibawang awatangeng riyalé mumallolongeng matu, sangadinna nasibawang Roh-Ku. 7Muwi pallawa silloppoé bulué maddésu'to matu polé ri yolomu. Mupatettongngi matu paimeng Bola-Ku, na wettunna mupalénne batu iya mapongngé ri onronna, gorai matu sining tauwé, ‘Anengka makkuwa gellona!’ ”
8Nainappa polési paseng iya laingngé polé ri Puwangnge. 9Adan-Na, “Purani napalénne Zérubabél pandaménna Bola-Ku, sibawa napattépui matu sininna bolaéro. Rékko kajajiyangngi iyaro, naissengngi matu umma'-Ku makkedaé Iyya ritu pura suroko Zakharia lao ri mennang. 10aEngka dé' nabati-batiwi iyaé kajajiyangngé. Iyakiya naitai matu mennang Zérubabél patterui appatettongenna Bola-Ku, sibawa marennui matu mennang.”
Currently Selected:
ZAKHARIA 4: LAIBUG
Highlight
Copy
Compare
Share
Want to have your highlights saved across all your devices? Sign up or sign in
