RUT 1
1
Létté'na Elimélékh sibawa kaluwargana ri Moab
1-2Riyolo ri wettu dé'napa nappunnai Israélié séddi arung, wanuwa Kanaan nakennai abala akkadéreng. Iyaro wettué engka séddi tau worowané riyaseng Elimélékh. Poléi ri appanna Efrata, sibawa monroi ri Bétléhém ri daérana Yéhuda. Nasaba abala akkadérengngéro, laoni ri wanuwa Moab silaong bainéna, Naomi, sibawa iya duwa ana'na iya worowané: Mahlon sibawa Kilyon. Nanaonro mennang kuwaro. Wettunna mennang kuwamupiro, 3matéi Elimélékh. Nanaonrona Naomi silaong iya duwa ana'na. 4Iya duwa ana'-ana'naro kawingngi sibawa ana'-ana' dara Moab, iya riyasengngé Orpa sibawa Rut. Seppulo taung ri munrinna, 5iya duwa ana' worowanéna Naomiro, maté towi, angkanna ateddéngeng Naomi lakkainna sibawa iya duwa ana'na.
Lisunna Naomi sibawa Rut ri Bétléhém
6Siyagangngaré wettu rimunrinna naéngkalingani Naomi makkedaé nabarakkakini Puwangnge umma Israélié sibawa wassélé éngngalang iya makessingngé. Rimakkuwannanaro Naomi sibawa iya duwa ménéttunna mangujuni untu' salaiwi Moab. 7Joppani mennang massibawa lisu ri Yéhuda. Ri tengnga laleng 8makkedani Naomi lao ri iya duwa ménéttunnaro, “Lisu bawanno ri bolana indo'mu. Tennapodo Puwangnge makessingngi lao ri iko pada-pada makessimmu lao ri iyya sibawa lao ri mennang iya matéénnaro. 9Tennapodo napuwéloi Puwangnge mpérékko oki kuwammengngi muwallaibinéngeng paimeng.”
Purana napowada makkuwaro, massimanni Naomi lao ri mennang sibawa bauwi. Iyakiya Orpa sibawa Rut teriwi maladde, 10sibawa makkeda lao ri Naomi, “Dé', Indo'! Maccowéki silaong Indo' lao ri bangsana Indo'.”
11Nappébali Naomi, “Aja' ana'! Lebbi kessing muwi lisuko. Untu' aga muwaccowérika? Dé'na naweddikka jajiyang ana' untu' mancaji lakkaimmu?#Dé'na … lakkaimmu?: Manuru ade'na tau Yahudié, rékko séddié worowané maté temmappunnai ana' worowané, jandana harusu'i kawing sibawa padaorowanéna lakkainna. Itai Ulg. 25:5-6. 12Lisuno na', saba' macowa senna'na untu' kawissi. Na akkalarapanna engka mupa amménasakku untu' kawing iyato wenniéwé sibawa lolongeng ana' worowané, 13aga maélokoga mattajeng narapi mennang battowa? Masa nasaba gau'éro nadé' mukawing sibawa tau laingngé? Dé', ana'ku, aja' muwappakkuwaro! Messéka lao ri aga iya harusu'é mupéneddingi nasaba pahukkungenna Puwangnge lao ri iyya.”
14Terisi maladde-ladde Rut sibawa Orpa nainappa massimang Orpa nanabau towi matuwanna nainappa lisu.#Manuru séddié bettuwang mariyoloé: nainappa lisu; ri laleng basa Ibrani dé'gaga iyaro ada-adaé. Iyakiya Rut dé' namaélo massarang polé matuwannaro. 15Makkedani Naomi lao ri aléna, “Rut, itani! Lisuni lagomu ri bangsana sibawa ri déwata-déwatana. Lao tono, na', accowériwi lisu!”
16Iyakiya mappébaliwi Rut, “Indo', aja' tasuroka Indo' lisu sibawa salaiwi Indo'! Maéloka maccowé silaong Indo'. Kégi-kégi Indo' lao, kuwatokka'ro lao. Kégi-kégi Indo' monro, kuwatokka'ro maélo monro. Bangsana Indo', iyanaritu bangsaku. Allataala iya nasompaé Indo', maéloto usompa. 17Kégi-kégi Indo' maté, kuwatoro maéloka maté sibawa rikuburu. Tennapodo nahukkukka Puwangnge sitane-tane'na, rékko maéloka massarang polé ri Indo', sangadinna amaténg passarakki!”
18Naitani Naomi makkedaé mattedde'i Rut untu' maccowé, jaji, dé'na nakkeda aga-agana.
19Nanapatteruni mennang joppana lettu ri Bétléhém. Lettu'na muwa kuwaro, héranni sininna pabbanuwana kotaéro. Pada makkedani sining makkunraié kuwaro, “Tongegga iyaro Naomi?”
20Nakkeda Naomi, “Aja'na muwobbika Naomi, obbi bawanna Mara,#Naomi … Mara: Ri laleng basa Ibrani Naomi bettuwanna “mappésennang” sibawa Mara bettuwanna “mapai”. saba' Allataala Iya Pommakuwasaé pura leppessakka tuwo penno sibawa apaireng. 21Wettukku lao polé kuwaé engkaka ri laleng agennekengngé, iyakiya makkekkuwangngé natiwika lisu Puwangnge sibawa lima kosong. Rimakkuwannanaro aja'na muteppuka Naomi, nasaba Puwang Iya Pommakuwasaé pura hukkukka sibawa maéga anrasa-rasang!”
22Makkuwaniro curitana pékkugi Naomi lisu polé ri Moab silaong Rut ménéttunna iya tau Moab-éro. Lettu'ni mennang ri Bétléhém ri pammulanna wettu éngngalang gandongngé.#gandongngé: Iya nakkattaiyé kuwaé iyanaritu gandong iya matasa'énna duwa minggu iyaré'ga siuleng lebbi mariyolo naiya gandong iya riissengngé. Iyaé gandongngé ripakéi untu' olokolo'é, iyakiya nanré towi tau kasiyasié, nasaba masémpoi. Iyaé gandongngé muttama'i gandong nomoro duwa, céddé bawang sisalana sibawa gandong biyasaé, sangadinna lebbi malampéi gemme'na.
Currently Selected:
RUT 1: LAIBUG
Highlight
Share
Copy
Want to have your highlights saved across all your devices? Sign up or sign in