AMSAL 23
23
–6–
1Rékko tudakko manré sibawa séddié tomaraja, éngngerangngi niga aléna.#éngngerangngi niga aléna iyaré'ga: pénessaiwi madécéd-décéng aga iya engkaé ri yolomu. 2Rékko mappunnaiko napessu manré iya battowaé, tahangngi iyaro cinnamu. 3Aja' mumabuwaja ri inanré malunra iya napatalaé, naullé maéloi cobako.
–7–
4Aja' muwassussa-sussa untu' mancaji sugi. Aja' mupajajiwi iyaro niya'mu. 5Saba', ri laleng sikédé bawang weddingngi lennye waramparammu, samanna makképannii sibawa luttu ri bitaraé pada-pada kuwajangngé.
–8–
6Aja' musisama manré tau masékké'é. Aja'to muwacinnaiwi inanréna iya malunra'é. 7Saba', makkedai matu, “Laoni mai manré; tatambaipi,” padahal akkattana tenniya makkuwaro. Macenningngi témunna, iyakiya atinna laingngi. 8Matti aga iya puraé muwemme muluwai paimeng, sibawa sininna ada-adammu iya macenningngé lao ri aléna dé'gaga akkégunana.
–9–
9Aja' mupangajariwi tau madonggoé; dé' naangke'i matu iyaro pangajamu.
–10–
10Aja' sises-siseng mupalétté'i pakkaséséng tana manaé iyaré'ga malai tana appunnangenna ana' béué. 11Saba', Puwangnge iyanaritu pappangéwa iya mawatangngé, Aléna ritu méwaiwi matu mennang méwako.
–11–
12Puriyatiwi pappagguruwanna gurummu sibawa agguruno singngéga-égana.
–12–
13Aja' mubata-bata paggurui ana'mu. Rékko muwunrui sibawa raukang, dé' namakkullé maté, 14mala salama'i matu.
–13–
15Ana'ku, masennang senna'ka rékko mapanréko. 16Mabangka'ka rékko uwéngkalingako powadai ada-ada iya teppa'é.
–14–
17Aja' mumangémpuru lao ri tau madosaé. Tuli mapatoko lao ri Allataala 18kuwammengngi na wettu mangolomu tattanggungngi, sibawa amménasammu dé' nateddéng.
–15–
19Engkalingai, ana'ku! Ancajino mapanré. Pénessaiwi mattonget-tongeng cara atuwommu. 20Aja' musiwollompollong sibawa tau mabo'é iyaré'ga tau mabuwajaé, 21saba' mancaji kasiyasiwi matu. Rékko matinroko bawang, dé' namaittana mumappaké sapé-sapé matu.
–16–
22Turusiwi ambo'mu; saba', rékko dé'i dé'tokko gaga. Rékko macowani indo'mu, jellokengngi makkedaé mupakalebbii.
23Pappagguruwang iya tongengngé, pangissengeng, pappagguruwang sibawa pappéjeppué – iya manennaro sipato'i riyelli, iyakiya mangke senna'i untu' ribalu.
24Séddié ambo' marennui matu rékko mappunnaiwi ana'na ampé-ampé iya makessingngé; mabangka'i matu rékko mapanréi ana'na.
25Tennapodo ambo' indo'mu mabangka'i lao ri iko; tennapodo masennangngi makkunrai iya jajiyangngékko.
–17–
26Pénessaiwi madécéd-décéng sibawa contoiwi atuwokku, ana'ku! 27Makkunrai betta iya maccakkuribangngé iyanaritu siyo-siyo mabbahayaé. 28Mangadangngi mennang pada-pada parampo'é sibawa mébbui maéga worowané malaweng.
–18–
29-30Muwissegga aga kajajiyang ri tau iya ménungngé anggoro maéga senna, sibawa biyasa kanyamé énungeng maseri? Iyaro tauwé manrasa-rasai sibawa mapeddii. Tuli massasai sibawa maddaréké. Macella matanna sibawa malo watakkaléna, padahal iya manennaro weddingngi rininiri. 31Aja' muleppessangngi anggoro'é godako, namuni tappana pataré senna'i sibawa paitai millak-killang ri laleng kacaé enrengngé massolo muttama sibawa manyameng ri laleng tigero'é. 32Pappa bajana éléé mupéneddingiwi pada-pada puraé ripitto ri ula mamosoé. 33Reppe-reppe matammu, kacau pikkirammu sibawa maccalépe témummu. 34Mupéneddingiwi pada-pada engkaé ri cappa alliri kappala'é ri tengnga tasi; mapeddi ulummu sibawa tassulus-sulukko. 35Namumakkeda matu, “Samanna naunruka sibawa naleppa tauwé, iyakiya dé' uwulléi méngngerangngi aga iya puraé kajajiyang. Aduh, cakkaruddu senna'ka! Parelluka ménussi!”
