ABBILANGENG 2
2
Onronna tungke' sukué ri laleng akkémangngé
1Makkedai Puwangnge lao ri Musa sibawa Harun: 2“Wettunna tau Israélié patettong akkémang, tungke' tau harusu'i makkéma mattulilingiwi bandéra passéddiyanna mennang sibawa lambang appanna muto. Sininna akkémangngéro harusu'i ripatettong mattulilingiwi Kéma-Ku, iyakiya mabéla-béla céddé polé ri aléna.”
3-9Ri seddé alauna, tentara iya maccinaungngé ri yawa bandéra passéddiyanna Yéhuda, harusu'i makkéma situru pasukang sibawa pamimpinna tungke'-tungke' ri laleng susunangngéwé:
| Suku | Pamimpinna | Jumella taunna |
|---|
| Yéhuda | Nahason ana' Aminadab | 74.600 |
| Isakhar | Nétaneel ana' Zuar | 54.400 |
| Zébulon | Eliab ana' Hélon | 57.400 |
| Iya manenna: | 186.400 |
Passéddiyanna Yéhuda harusu joppa kaminang riyolo. 10-16Ri seddé yattanna, tentara iya maccinaungngé ri yawa bandéra passéddiyanna Rubén, harusu'i makkéma situru pasukang sibawa pamimpinna tungke'-tungke' ri laleng susunangngéwé:
| Suku | Pamimpinna | Jumella taunna |
|---|
| Rubén | Elizur ana' Syédéur | 46.500 |
| Siméon | Sélumiél ana' Zurisyadai | 59.300 |
| Gad | Elyasaf ana' Réhuél | 45.650 |
| Iya manenna: | 151.450 |
Passéddiyanna Rubén harusu' joppa selaku maduwaé. 17Purairo, ri tengnga-tengngana sininna tentarana Israélié, joppani suku Léwié sibawa mpuléi Kémana Puwangnge. Pada-pada mennang makkéma, makkuwatoro mennang joppa, tungke'-tungke' ri onronna situru sining bandérana mennang.
18-24Ri seddé yajang, tentara iya maccinaungngé ri yawa bandéra passéddiyanna Efraim harusu'i makkéma situru pasukang sibawa pamimpinna tungke'-tungke' ri laleng susunangngéwé:
| Suku | Pamimpinna | Jumella taunna |
|---|
| Efraim | Elisama ana' Amihud | 40.500 |
| Manasyé | Gamaliél ana' Pédasur | 32.200 |
| Bényamin | Abidan ana' Gidéoni | 35.400 |
| Iya manenna: | 108.100 |
Passéddiyanna Efraim harusu'i joppa ri munrinna suku Léwi. 25-31Ri seddé manorang, tentara iya maccinaungngé ri yawa bandéra passéddiyanna Dan harusu'i makkéma situru pasukanna sibawa pamimpinna tungke'-tungke' ri laleng susunangngéwé:
| Suku | Pamimpinna | Jumella taunna |
|---|
| Dan | Ahiézer ana' Amisyadai | 62.700 |
| Asyer | Pagiél ana' Okhram | 41.500 |
| Naftali | Ahira ana' Enan | 53.400 |
| Iya manenna: | 157.600 |
Passéddiyanna Dan joppai selaku paccappureng. 32Jumellana tau Israél iya naokié ri laleng passéddiyanna situru pasukanna tungke'-tungke', iyanaritu 603.550 tau. 33Pada-pada napparéntangngé Puwangnge lao ri Musa, tau Léwié dé' naridaftar silaong sining tau Israél iya laingngé.
34Napogau'ni tau Israélié sininna iya napparéntangngé Puwangnge lao ri Musa. Tungke'-tungke' makkéma mattulilingiwi bandérana muto, sibawa joppa situru appanna enrengngé kaluwargana.
Currently Selected:
ABBILANGENG 2: LAIBUG
Highlight
Copy
Compare
Share
Want to have your highlights saved across all your devices? Sign up or sign in