MATIUS 1
1
Assossorenna Yésus Kristus
(Luk. 3:23-38)
1Iyanaé assossorenna néné-nénéna Yésus Kristus, wijanna Daud, wijanna Abraham. Polé ri Abraham lettu ri Daud tarokii aseng-ngaseng makkuwaéwé:
2-6aAbraham,
Ishak,
Yakub,
Yéhuda sibawa silessu-silessurenna,
Pérés sibawa Zéra (indo'na mennang riyaseng Tamar),
Hézron,
Ram,
Aminadab,
Nahason,
Salmon,
Boas (indo'na iyanaritu Rahab),
Obéd (indo'na iyanaritu Rut),
Isai,
sibawa Arung Daud.
6b-11Polé ri Daud lettu ripalina tau Israélié ri Babél tarokii aseng-ngaseng makkuwaéwé:
Salomo (indo'na iyanaritu bainéna riyolo Uria),
Réhabéam,
Abia,
Asa,
Yosafat,
Yoram,
Uzia,
Yotam,
Ahas,
Hizkia,
Manasyé,
Amon,
Yosia,
Yékhonya sibawa silessu-silessurenna.
12-16Polé ri wettunna bangsa Israélié ripali ri Babél lettu ajajiyanna Yésus tarokii aseng-ngaseng makkuwaéwé:
Yékhonya,
Séaltiél,
Zérubabel,
Abihud,
Elyakim,
Azur,
Zadok,
Akhim,
Eliud,
Eléazar,
Matan,
Yakub,
Yusuf lakkainna Maria.
Napolé ri Maria jajiwi Yésus iya riteppué Kristus.
17Jaji polé ri Abraham lettu ri Daud, iya manenna engka seppulo eppa assossoreng. Polé ri Daud lettu ri wettu ripalina bangsa Israélié ri Babél engkato seppulo eppa assossoreng. Polé ri wettu ripalina bangsa Israélié ri Babél lettu ajajiyanna Kristus, engkato seppulo eppa assossoreng.
Ajajiyanna Yésus Kristus
(Luk. 2:1-7)
18Makkunié curitana passalenna ajajiyanna Yésus Kristus. Indo'-Na iyanaritu Maria, mattunangangngi sibawa Yusuf. Iyakiya riwettu dé'napa mennang nakawing, mattampu'ni Maria. Dé' naissengngi Yusuf rékko mattampu'i Maria nasaba akuwasanna Rohna Allataala. 19Iyaro Yusuf tunanganna, iyanaritu séddiwi tau iya tuli turusiyéngngi hukkunna agamaé. Jaji maéloi pettuiwi attunanganna, iyakiya dé' narukkangngi, kuwammengngi dé' namasiri Maria ri yolona tau maégaé. 20Mattengngangngi Yusuf timbat-timbangngi iyaro gau'é, mannippiwi. Ri laleng nippinnaro, naitai séddi malaéka'na Puwangngé makkeda lao ri aléna, “Yusuf wijanna Daud, aja' mumétau kawingi Maria; saba' iyaro ana' engkaé ri laleng tampu'na, jajiwi polé ri akuwasanna Rohna Allataala. 21Najajiyangngi matu Maria séddi ana' worowané. Iyaro ana'é harusu'i muwéréng aseng Yésus, nasaba Napassalama'i matu umma'-Na polé ri dosana mennang.”
22Iya manennaro kajajiyangngi makkuwaro kuwammengngi nakajajiyang aga iya napowadaé Puwangngé naolai nabin-Na, iyanaritu, 23“Mattampu'i matu séddié ana'dara nanajajiyang séddi ana' worowané. Iyaro ana'é riyasengngi matu Immanuél.” (Immanuél iyanaritu ada Ibrani iya bettuwannaé, “Allataala engka sibawakki”.)
24Moto'nana Yusuf, napogau'ni aga iya napowadaé iyaro malaéka'na Puwangngé lao ri aléna. Kawinni sibawa Maria. 25Iyakiya riwettu dé'napa najajiyangngi Maria iyaro ana'é, dé' nasilureng Yusuf sibawa Maria. Jajinnana iyaro ana'é, Nasenni Yusuf Yésus.
Currently Selected:
MATIUS 1: LAIBUG
Highlight
Share
Copy
Want to have your highlights saved across all your devices? Sign up or sign in