AWATINGENG 5
5
Sempajang méllau paressé babuwa
1Engngerangngi, oh Puwang, aga kajajiyangngé ri idi.
Tiroki, sibawa itani atunatta.
2Sempé'ni waramparang manata ri limanna tau laingngé,
sining bolata naonroini tau laingngé.
3Purani riyuno ambo'ta ri balié;
makkekkuwangngé jandani indo'ta, sibawa béuki.
4Uwai rinungngé sibawa aju tunungngé
harusu'ki melliwi.
5Pada-pada olokolo'é, ripassa majjama matane,
posoki, iyakiya dé' nawérékki wettu mappésau.
6Laoki maréllau-éllau ri Maséré,
méllauki inanré ri Asyur.
7Madosai toriyolota,
dé'ni gaga makkekkuwangngé;
iyakiya harusu'ki manrasa-rasa,
nasaba dosa-dosana mennang.
8Naparéntaki sining tau iya dé'é nalebbi naiya ataé;
dé'gaga makuwasa paleppe'ki polé ri mennang.
9Ri saliweng kota, mallamparengngi pabbunoé;
riyancangngi nyawata wettutta sappa inanré.
10Manrasa-rasaki alupureng,
angkanna mabbara olita pada-pada addellangengngé.
11Rigau' majariwi sining makkunrai Siongngé.
Napéjariwi sining ana'daraé ri désa-désana Yéhuda.
12Ritikkengngi sining pamimpitta sibawa rigattung,
sining tomacowata dé'na naripoji.
13Napassai mappallaung sining kallolota ri allélurengngé,
ana'-ana' worowané ritenre'i ri éssang ajunna angkanna marenne.
14Sining tomatowaé dé'na naddeppungeng ri pintu gerbang kotaé,
dé'na napaéngkalingana musi'é ri yelle'na kalloloé.
15Ateddéngenni asennangeng;
tappinrani séré-séré mancaji abbaratang.
16Dé'ni gaga abangkaketta,
macilakaki nasaba madosaki.
17-18Masino-sinoni Bulu Sion sibawa risalai;
mallampareng asu ale'é kuwaro.
Rimakkuwannanaro ancuru'ni atitta,
teriki narapi massalawu pakkitatta.
19Iyakiya Iko, oh Puwang, tette'ki makuwasa,
mapparénta-Ko mannennungeng.
20Masa Musalaiki makkuwaro ittana?
Makkulléga Muwallupaiki sillampé wettué?
21Oh Puwang, tiwiki lisu ri alé-Mu;
maéloki lisu ri alé-Mu!
Palisuni keadaatta pada-pada riyolo.
22Iyaré'ga purani Muwabbéyang siseng?
Dé'ga paggangkanna cai-Mu lao ri idi?
Currently Selected:
AWATINGENG 5: LAIBUG
Highlight
Share
Copy
Want to have your highlights saved across all your devices? Sign up or sign in