AYUB 15
15
ASSIPABBICARANG MADUWAE
15:1–21:34
Elifas
1-3Namappébali Elifas,
“Omong kosong, Ayub, dé' tongeng bettuwanna bicarammu!
Dé'gaga tau mapanré iya mappébaliyé pada-pada ikoé,
dé' namaélo méwai aléna
sibawa ada-ada iya dé'é gaga bettuwanna.
4Akkalarapanna iyaro ada-adammu riturusiwi,
dé' muwi séddi tau métau iyaré'ga massempajanna lao ri Allataala.
5Ada-adammu pabuttiwi makkedaé pasalako,
iyakiya mutongkoi jamu sibawa lécco-lécco ada.
6Dé' naparellu uteppuko sibawa upassala,
saba' polé ri ada-adammu muto nariyappissengekko.
7Muwasengngi iko tolino mammulang iya rijajiyangngé?
Engkakoga wettunna ripancaji sining bulué?
8Muwéngkalingaga Allataala mébbui rancana-Na?
Aga ikoga bawang mappunnai pangissengeng tolino?
9Sininna iya muwissengngé, muwi idi riisseng towi;
sininna iya mupahangngé, manessa towi ri idi.
10Iyaé pangissengengngé ritarimai polé ri tau iya maubengngé;
engka mémenni mennang ri wettu dé'napa narijajiyang ambo'mu!
11Magi mutarimai passaléwona Allataala?
Mabbicaraki sibawa sabbara nenniya malemma ri laleng asen-Na.
12Iyakiya ménré'i pellamu, makkaca-kaca matammu;
13macaiko lao ri Allataala sibawa bantai.
14Naulléga tolinoé dé' sises-siseng napasala?
Weddigga ripattongeng ri yolona Allataala?
15Mala muwi lao ri malaéka'é dé'to natepperiwi Allataala;
dé' mennang namapaccing ri pakkitan-Na.
16Apalagi tolinoé iya majaé sibawa marota'é,
iya memme'éngngi jaé pada-pada uwai bawang.
17Engkalingai Ayub, upakatajangekko matu séuwa,
18iya nappagguruwangngé tau mapanré lao ri iyya.
Iyaro pappagguruwangngé natarimai polé ri toriyolona,
nanapatterui sibawa sukku lao ri wija-wijanna.
19Iyaro wettué dé' gaga tau laing ri wanuwanna mennang;
dé' gaga papusai mennang polé ri Allataala.
20Tau maja iya tenre'éngngi pada-padanna,
manennengngi matu sillampé atuwonna.
21Oni-oni maseroé licco'i dauccilinna;
ri wettu amangngé poléi parampo'é gasai.
22Dé'gaga addénnuwangeng ri aléna léssériwi pettangngé,
saba' peddanna paunoé lellungngi ri tungke' wettu.
23Manu'-manu' nasar-é tajengngi wettu amaténna,
maéloi mennang memme'i ujuna.
Namainge'na
makkedaé massalawuni esso mangolona.
24Abalaé padai arung poré,
sadiyani maélo tikkengngi.
25Makkuwaniro totona tau iya méwaéngngi Allataala,
sibawa barani méwai Iya Pommakuwasaé.
26-27Nasibawang atempong nagasai sibawa naéwai Allataala;
naakkai kaliyawona, pémmali cau.
28Mattette'i ri kota-kota iya tassiya-siyaé,
risining bola iya dé'é gaga monroiwi.
Iyaro kota-kotaé purani ripattentu
untu' tette mancaji ruttungeng.
29Asugirenna iyaro tauwé teddéngngi matu temmabbaté;
waramparanna cappu sisengngi matu.
30Dé' naleppe matu polé ri pettang kape'é;
nangurengngi matu api cura'-cura'na.
Ancuru'i matu
nasaba warungeng bawana Allataala.
31Rékko mateppe'i lao ri iya dé'é nakkéguna,
ribengnguwanni matu;
sibawa pamale iya natarimaé matu,
dé' tona akkégunana.
32Ri wettu dé'napa narapii wettunna, matéi#Siyagangngaré bettuwang mariyoloé: matéi, Ibrani: mallise. matu,
pada-pada takké makelle iya dé'énna naulléi manyilana.
33Pada-padai pong anggoro iya madduttungngénna buwana,
pada-pada pong zaitung iya maddunué unganna.
34Tau majaé dé' matu nabbija;
cappui nanré api bola iya ripatettongngé polé ri wassélé pasoso'na.
35Iyanaro mennang iya rancanaéngngi jaé sibawa pogau'i,
tuli tattampu'i bellé ri laleng atinna.”
Currently Selected:
AYUB 15: LAIBUG
Highlight
Share
Copy
Want to have your highlights saved across all your devices? Sign up or sign in
