YESAYA 63
63
Apakalanna Puwangnge lao ri bangsa-bangsaé
Panganrowangngé
1“Niga engka polé ri Bozra ri Edom?
macella wajunna, mattappa pakéyanna;
joppai#Manuru siyagangngaré bettuwang mariyoloé: joppa; manuru basa Ibrani: cuku'. sibawa barani.”
Puwangnge
“Iyya'na Puwang iya mullééngngi mappassalama
sibawa polé tiwi karéba apakalang.”
Panganrowangngé
2“Magi namacella makkuwaro pakéyammu,
pada-pada wajunna pappara buwa anggoro'é?”
Puwangnge
3“Alé-alé-Ku muttama ri onrong apparakeng anggoro'é
ri yelle'na umma'-Ku dé'gaga tuluk-Ka.
Uléjja-léjja'i bangsa-bangsaé ri laleng cai-Ku,
pada-pada léjja-léjja'i buwa anggoro'é.
Tapporo darana mennang rica'i wajuk-Ku,
rotakiwi sininna pakéyak-Ku.
4Purani urancana esso akkabalekengngé,
sibawa wettu appaleppekengngé untu' umma'-Ku.
5Massappaka, iyakiya dé'gaga mattulung,
Hérakka nasaba dé'gaga mabbantu.
Nainappa awatangeng ri alé-Ku tuluk-Ka,
cai-Ku bantu-Ka.
6Ri laleng cai-Ku iya malluwa-luwa'é,
Uléjja-léjja'i bangsa-bangsaé;
Upabbinasai mennang,
sibawa darana mennang Utuppa'i ri tanaé.”
Akessingenna Allataala untu' Israélié
7Maéloka mabbirittangngi pammaséna Puwangnge
sibawa pojiwi nasaba sininna pangkauken-Na.
Nabarakkakiwi umma'-Na sibawa maona,
nasaba mapparessé babuwai na pammasé-Na dé' paccappurenna.
8Makkedai Puwangnge, “Tongeng, mennang iyanaritu umma'-Ku,
ana'-ana' iya dé'é namappéjulé.”
Namancajiwi Pappassalama'na mennang,
9Aléna paimeng nakenna asussanna mennang.#Aléna … mennang; iyaré'ga: polé ri sininna asussanna mennang.
Dé' nakiring Puwangnge suro iyaré'ga duta;
Aléna ritu paleppe'i mennang
nasaba pammasé sibawa paressé babuwa-Na.
Tuli napiyarai mennang
riyolopa nariyolo.
10Iyakiya maronta'i mennang
sibawa pamesséiwi atinna Puwangnge.
Nagiling mancaji balinna mennang
Aléna muto mammusu méwai mennang.
11Nanaéngngeranni mennang#Naullé bettuwanna: mennang; manuru basa Ibrani: aléna. wettu riyolo,
wettunna Musa, atanna Puwangnge.
Makkutanai mennang, “Kégani Puwangnge
iya dulungngéngngi sining pamimpinna umma'-Na molai tasi'é?
Kégani Puwangnge
iya mabbéréyangngéngngi akuwasan-Na lao ri mennang?
12Kégani Puwang iya ranrengngéngngi Musa
sibawa liman-Na iya mawatangngé naporé
sibawa puwé'éngngi uwaié ri yolona mennang
kuwammengngi nakalabba asen-Na mannennungeng?
13Kégani Puwang iya dulungngéngngi mennang
joppa molai uwai iya maliyungngé?
Pada-pada anyarangngé molai padang kessi'é,
dé' naengka mennang natabbuttu.”
14 Puwangnge tiwii mennang ri onrong appésaungengngé,
pada-pada olokolo ritinrosiyé untu' mabbella ri padangngé.
Makkuwaniro Aléna pimpingngi umma'-Na,
kuwammengngi naripakaraja asen-Na.
Sempajang méllau paressé babuwa sibawa bantuwang
15Oh Puwang, itaki polé ri surugaé,
polé ri onrom-Mu iya mapaccingngé sibawa malebbié.
Kégani pammasé-Mu sibawa aporéngem-Mu?
Kégani pammasé-Mu sibawa paressé babuwamu?
Aja' mutahangngi iyaro polé ri idi.
16Tenniyaga Iko Ambo'ta?
Abraham sibawa Yakub dé' naissekki.
Iyakiya Idi oh Puwang, iyanaritu Ambo'ta,
Pappassalama'ta riyolopa nariyolo.
17Oh Puwang, magi Muleppessakki pusa?
Magi Mupateddekiwi atitta
angkanna dé' tamétau ri Iko?
Lisuno nasaba ata-atam-Mu,
nasaba umma'-Mu, appunnangeng mana-Mu.
18Magi Muleppessangngi balié léjja-léjja'i Bola-Mu,
sibawa sining tauwé carépaiwi bulu-bulu-Mu iya mapaccingngé?#Ri laleng basa Ibrani iyaé aya'é dé' namanessa bettuwanna.
19Mugaukekki
samanna dé' naengka Mukuwasaiki;
samanna dé' naengka tamancaji umma'-Mu.
Currently Selected:
YESAYA 63: LAIBUG
Highlight
Share
Copy
Want to have your highlights saved across all your devices? Sign up or sign in
