YESAYA 57
57
Ritanroinna assompang barahalaé
1-2Matéi tau makessingngé sibawa matinulué maggama, na dé'gaga majeppuiwi iyaré'ga jampangiwi. Maténana, leppe'i mennang polé ri abalaé sibawa mappésauwi sibawa damé.
3Iyakiya iko, tau madosaé, poléno untu' riadéléki! Dé' mulebbi makessing naiya tukang passéhéré'é, tau iya pojiyéngngi malaweng sibawa cakkuribangngé! 4Niga mucawa-cawai? Niga muwéllé-kéllé? Tenniyakoga wijanna pabbellé sibawa parronta'é? 5Musompai déwata-déwata acommokengngé sibawa leppessangngi alému rikuwasai ri napessummu ri yawana ajukajung makarame'é. Mukuburu'i ana'-ana'mu ri lompo saloé, ri yelle-elle batué. 6Jaji sinnanna paddeppungekko batu-batu malengngo polé kuwaro. Iyanaro bagiyammu! Lao ri batu-batuéttoro tiri'ko anggoro sibawa makkasuwiyangeng gandong. Muwasengngi masennakka sibawa sininnaro? 7Laoko ri tompo-tompo bulué untu' makkasuwiyangeng akkarobangeng sibawa sennangiwi napessummu. 8Mupasangngi dato-dato'mu iya macarépaé ri tau-tau tange'na bolamu. Musalai-Ka. Muludungngi pakéyammu sibawa ménré ri onrong atinrong iya rilowangiyé sibawa canrimmu iya mupéssaroiyé untu' méwako siyatinrong, nainappa musennangi napessummu. 9Pakéko minnya sibawa wangi-wangiyang, nainappa lao sompai déwata Molokh. Kirikko sining suro lao ri wanuwa-wanuwa mabélaé, mala lao ri linona tau maté. 10Teppettu paddennuwakko sipposo-poso sappa déwata-déwata. Muwasengngi mennang naulléi mpérékko sumange baru, angkammu dé' mumancaji malemma.
11Makkedai Puwangnge, “Niga iyaro déwata-déwataé iya mébbuékko métau, angkammu mabbellé sibawa dé'na muwéngngerak-Ka? Dé'naga musompa-Ka nasaba maitta senna'-Ka mammekko? 12Iyakiya Upaissengiko; iyaro atinuluremmu dé' natongeng, sibawa sininna pangkaukemmu dé' nakkéguna untu' alému. 13Rékko gorako, leppessangngi iyaro sining dato-dato'é passalama'ko! Teddéngngi matu naluttureng anging nenniya lennye sibawa séddi seppung nappase! Iyakiya tau iya mallinrungngé ri Iyya namanai matu iyaro wanuwaé sibawa sompa-Ka ri Bola-Ku.”
Majjanciwi Allataala maélo mattulung sibawa pajjappai umma'-Na
14Engka iya makkedaé,
“Ebbuno sibawa passadiyano laleng untu' umma'-Ku,
paddésu'i sininna palawa-lawaiyé.”
15Saba' makkuwaiyé adanna Allataala Iya Pommatanré sibawa mapaccingngé,
iya makuwasaé untu' mannennungeng,
“Monroka ri onrong iya matanré sibawa mapaccingngé,
iyakiya ri yelle'nato sining tau iya mariyawa atié
sibawa iya sesse'éngngi dosa-dosana,
untu' palisui sumange'na sibawa amménasanna mennang.
16Dé' na untu' mannennungeng Upassalai umma'-Ku;
dé' na untu' matteru-teru macai-Ka,
kuwammengngi dé' mennang napettu paddennuwang,
padahal Iyya ritu patuwoi mennang.#Dé' … mennang, iyaré'ga: Iyya ritu patuwoi umma'-Ku, sibawa dé' na untu' mannennungeng mappasala-Ka iyaré'ga macairiwi mennang.
17Dosa angowanna mennang mébbu-Ka macai,
rimakkuwannanaro Uhukkungngi mennang sibawa Usalai.
Iyakiya matedde atiwi mennang
sibawa tette'i piléi lalenna muto.
18Purani uwita kédona mennang,
iyakiya Upajjappa towi matu mennang.
Maélo-Ka pimpingngi sibawa tulungngi mennang
sibawa saléworiwi tau iya messé atié.
19Maélo-Ka mabbéré atennangeng lao risininna tauwé,
muwi macawé'é iyaré'ga mabélaé.
Maélo-Ka pajjappai umma-Ku
20Iyakiya tau majaé iyanaritu pada-padai tasi'é
iya mabbombangngé sibawa dé' naengka natennang.
Solo'na tiwii roppo sibawa bungka.
21Dé'gaga atennangeng untu' tau madosaé,”
adanna Puwangnge.
Currently Selected:
YESAYA 57: LAIBUG
Highlight
Share
Copy
Want to have your highlights saved across all your devices? Sign up or sign in
