YESAYA 38
38
Malasana Arung Hizkia sibawa ripajjappana
(2 Arg. 20:1-11; 2 Taw. 32:24-26)
1Ri seddéna wettuéro nakennai lasa Hizkia sibawa céddé'i maté. Nabi Yésaya ana' Amos, célléngiwi sibawa makkeda, “Mappasengngi Puwangnge kuwammengngi napappuraiwi Datu sininna urusanna, saba' dé' najjappa matu Datu. Dé'na namaitta namaté Datu.”
2Gilinni Hizkia ri témbo'é, nainappa massempajang, 3“Puwang, éngngerangngi makkedaé iyya'é purana mattumani ri alému sibawa matinulu nenniya malempu. Tuli makkuragaka turusiwi élomu.” Nainappa teri Hizkia sibawa mapeddi.
4Laonana Yésaya, risuroni ri Puwangnge 5lisu ri Hizkia sibawa palettu'i iyaé pasengngé, “Iyya, Puwang, Allataala iya nasompaé Daud toriyolomu, naéngkalingani sempajammu sibawa naitani uwai matammu. Maélo-Ka tambaiwi umuru'mu sibawa seppulo lima tauppa. 6Iko sibawa kota Yérusalém Upaleppe'i matu polé ri arung Asyur. Iyaé kotaé tette'i matu Ulinrungi.”
21Nainappa Yésaya suroi tauwé peppé buwa ara nanabbabekengngi ri lettanna Hizkia kuwammengngi najjappa. 22Makkutanani Arung Hizkia, “Aga tanranna makkedaé maéloi Puwangnge pajjappaka sibawa weddikka lao ri Bolana Puwang-ngéssi?”#Aya' 21 sibawa 22 ritaroi kuwaé, ri pallawangenna aya' 6 sibawa 7.
7Nappébali Yésaya, “Iyanaé tanrang iya nabbéréyangngé Puwangnge lao ri Datu makkedaé Narupaiwi jancin-Na. 8Ri pajjello jang mata esso ebbuna Arung Ahas, naébbui matu Puwangnge soro wajo-wajona seppulo jori.” Nasorona iyaro wajo-wajoé seppulo jori.
9Majjappanana Hizkia, naokini iyaé élong pappojiyangngé:
10“Adakku, nappai sitengnga umuru uharusu lao,
paccappui sésana atuwokku ri linona tau maté.
11Adakku, dé'na uwitai matu Puwangnge ri linoé,
iyaré'ga mitai tolinoé ri linoéwé.
12Pettui nyawaku, narapini ajjalekku,
pada-pada kéma pakkampi iya ribongkara'é;
pada-pada kaing rirette'é polé ri pessaé;
uwasengngi Allataala maéloni paccappa'i atuwokku.#Naullé bettuwanna: uwasengngi … atuwokku.
13Puppu benni kelli'ka nataro peddi,
samanna buku-bukukku rireppo ri sikajué singa;
uwasengngi Allataala maéloni paccappa'ni atuwokku.#Ri laleng basa Ibrani iyaé aya'é dé' namanessa bettuwanna.
14Pédé massalawu saddakku sibawa malemma,
pada-pada jangang-jangangngé maddaréké.
Matekko matakku nasaba céngai ri langié,
Puwang, paleppe'ka polé ri asussangngéwé.
15Aga wedding upowada? Iyaé pangkaukenna Puwangnge;
dé' uwulléi matinro nasaba messéka.
16Oh Puwang, wérékka atuwong
nasaba ada-adammu sibawa pangkaukem-Mu,
leppessanni tuwoka untu' alé-Mu bawang.#Ri laleng basa Ibrani aya' 15 sibawa 16 dé' namanessa bettuwanna.
17Apeddirekku tappinrai matu mancaji atennangeng,
Mupassalama'ka#Manuru siyagangngaré bettuwang mariyoloé: Mupassalama'ka; manuru basa Ibrani: Aléna mamaséiwi. polé ri bahayaé;
pura manenni Muwaddampengeng dosa-dosaku.
18Ri linona amaténgngé dé'gaga poji-Ko,
tau maté dé' nawedding maddennuwangiwi atinulurem-Mu.
19Banna tau tuwoé iya pojiyék-Ko,
pada-pada iya upogau'é iyaé essoé.
Tomatowaé nacuritai lao ri ana'na
temmaka tinulu-Mu, oh Puwang.
20 Puwang, puraka Mupajjappa,
natamakkélong pappojiyang ri Bolamu
sibawa getti kacapi,
gangka tuwota.”#Aya' 21 sibawa 22 ritaroi purana aya' 6.
Currently Selected:
YESAYA 38: LAIBUG
Highlight
Share
Compare
Copy
Want to have your highlights saved across all your devices? Sign up or sign in
