YESAYA 25

Elong pappojiyang

1 Puwang, Iko ritu Allataalaku,

upakaraja-Ko sibawa upojiwi asem-Mu.

Saba' ébbu-ébbu-Mu mappabengnga senna;

mappammulai riyolo Murancanai,

sibawa pogau'i sibawa matinulu.

2Purani Muancuru iyaro kotaé;

iyaro kota mabbénténgngé mancajini ruttungeng.

Saoraja iya napatettongngé tau laingngé ancuru'ni,

sibawa dé' naripatettonna untu' mannennungeng.

3Ripojiko matu ri bangsa-bangsa iya mawatangngé,

sibawa riyétauri ri kota-kotana bangsa-bangsa iya mabecco'é.

4Saba' mancaji-Ko angungsingeng untu' tau malemmaé,

onrong iya amangngé untu' tau kasiyasié ri laleng aperisengngé.

Iko ritu allinrungeng polé ri anginrajaé,

accinaungeng polé ri pella matire'é.

Saba' maggasai tau mabecco'é pada-pada anginrajaé ri wettu pabosié,#Naullé bettuwanna: anginraja ri wettu pabosié; manuru basa Ibrani: anginraja kennai bombangngé.

5pada-pada anging pellaé ri tana makabuttué.

Iyakiya Muwébbui balitta mammekko,

Mupappajai gora-gorana sining tau mabecco'é,

pada-pada accinaungeng ellungngé patteddéngngi pella matire'é.

Allataala passadiya perjamuwang pésta

6Ri Bulu Sion, Puwang Iya Pommakuwasaé passadiya matu perjamuwang untu' sininna bangsaé ri linoé. Napatalai inanré iya kaminang malunra'é sibawa anggoro iya ripilé. 7Ri yasé'na bulu-buluéro natimpa'i matu ellung amesséngngé iya sampoéngngi bangsa-bangsaé. 8Puwang Iya Pommakuwasaé pabbinasai matu amaténgngé untu' mannennungeng! Nasussui matu uwai mataé polé ri tungke rupaé, sibawa pabélaiwi atunang iya natanggungngé umma'-Na ri sininna linoé. Puwangnge pura mabbicara, na iyaro gau'é pasti kajajiyangngi.

9Ri wettuéro makkedai matu tauwé,

“Sitongenna, Aléna ritu Allataalata;

Aléna ritu tatajeng,

kuwammengngi naripassalama'ki.

Tongeng, iyanaé Puwang;

Aléna ritu tatajeng.

Makkekkuwangngé gorani marennu,

saba' purani Napassalama.”

Allataala hukkungngi matu Moab

10 Puwangnge linrungiwi matu Bulu Sion, iyakiya Moab riléjja'-léjja'i matu pada-pada daramé ri onrong warowoé. 11Naloro'i matu limanna pabbanuwana pada-pada tau maéloé nangé. Iyakiya Puwangnge pakariyawai matu atemponna mennang angkanna dé' pakkullénna. 12Sining bénténna Moab silaong sining témbo'na iya matanré Naruttungngi matu sibawa Naggeppuwangngi ri tanaé angkanna ancuru pada-pada awué.

Currently Selected:

YESAYA 25: LAIBUG

Highlight

Compare

Copy