HOSEA 1

1Iyanaé paseng iya nabbéréyangngé Puwangnge lao ri Hoséa ana' Bééri wettunna akkarungenna Yéhuda matturu-turusengngi riparénta ri Arung Uzia, Yotam, Ahas, enrengngé Hizkia, sibawa akkarungenna Israélié riparéntai ri Yérobéam ana' Yoas.

Bainéna sibawa ana'-ana'na Hoséa

2Wettunna bunge'-bunge' mabbicara Puwangnge lao ri bangsa Israélié sibawa naolaka, makkedai Puwangnge, “Hoséa, kawingiwi séddi tau iya pojiyéngngi maccakkuribang, na ana'-ana'mu mancaji towi matu pada-pada aléna. Umma'-Ku pada-padai bainémuro; dé' namatinulu mennang lao ri Iyya, sibawa nasalai-Ka.”

3Naukawingini séddi makkunrai riyasengngé Gomér ana'na Diblaim. Najajiyannana ana'ta bunge'é, séddi ana' worowané, 4makkedai Puwangnge lao ri iyya, “Asengngi ana'muro Yizreel saba' dé'na namaittana Uhukkungngi matu arunna Israélié nasaba abbunowang iya napogau'é Yéhu, toriyolona, ri Yizreel.#Yizreel: Ri kotaéro Yéhu mpunoi arunna Israél sibawa sininna kaluwargana arungngéro. Nainappa Yéhu mancaji arung mammulangngé polé ri assossoreng mabarué. Ri laleng basa Ibrani, Yizreel bettuwanna: Allataala mampo. Jaji iyaro adaé majjello'i lao ri atuwongngé sibawa adécéngengngé. Upaccappa'i matu apparéntanna wijanna Yéhu.#apparéntanna wijanna Yéhu iyaré'ga: Akkarungeng Israél.

5Iyaro wettué ri Lompo Yizreel Uwancuru'i matu awatangenna tentara Israélié.”

6Nainappa iyaro bainéku najajiyang ana'ta iya maduwaé, séddi ana' makkunrai. Makkedai Puwangnge lao ri iyya, “Hoséa, asengngi ana'muro ‘Iya Dé'é Nariyamaséi’, nasaba dé'na Uwamaséiwi matu bangsa Israélié, sibawa dé' sises-sisenna Uwaddampengengngi mennang. 7Iyakiya bangsa Yéhuda Uwamaséiwi matu. Iyya Puwang, Allataalana, passalama'i matu mennang, iyakiya tenniya sibawa musu, tenniyato sibawa peddang iyaré'ga pana iyaré'ga anyarang sibawa tonangiyéngngi.”

8Risalla'nana susu ana'ta maduwaé, mattampu'si bainéku nanajajiyang séddi ana' worowané. 9Makkedai Puwangnge lao ri iyya, “Asengngi iyaro ana'mu ‘Tenniya Umma'-Ku’, saba' tau Israélié tenniya umma'-Ku, sibawa Iyya tenniya Allataalana mennang.”

Ripalisui matu paimeng keadaanna Israélié

10Mancajiwi matu bangsa Israélié singngéga kessi'é ri tasi'é, angkanna dé' nawedding riyukkuru iyaré'ga ribilang. Makkekkuwangngé makkedai Allataala lao ri mennang, “Tenniyako umma'-Ku,” iyakiya narapii matu wettunna makkedai matu lao ri mennang, “Iyya ritu Allataala iya tuwoé na iko ana'-ana'-Ku!” 11Bangsa Yéhuda sibawa bangsa Israélié ripasséddiwi matu paimeng. Makkai matu séddi tau pamimping, namabbijai matu mennang sibawa madécéngngi paimeng ri wanuwanna mennang. Tongeng, essona Yizreel mancajiwi matu esso iya battowaé!

Currently Selected:

HOSEA 1: LAIBUG

Highlight

Copy