YEHEZKIEL 25

Boto passalenna pahukkungengngé untu' Amon

1Mabbicarai Puwangnge lao ri iyya, 2“Eh tolino dé'é namannennungeng, tanroiwi wanuwa Amon. 3Suroi bangsaéro méngkalingai aga Iyya, Puwang Iya Pommatanré Upowada lao ri mennang, ‘Masennakko mitai ricarépai Bola-Ku sibawa risolangi tanana Israélié enrengngé bangsa Yahudié ritiwi ri appalirengngé. 4Rimakkuwannanaro Uleppessakko ricau ri suku-suku bangsa polé ri padang kessi Alau. Patettongngi matu mennang sining akkémang ri wanuwammu nainappa mattette kuwaro. Nanréi matu buwa-buwamu sibawa naénungngi dadi olokolo'mu. 5Upinrai matu kota Raba mancaji onrong makkampi unta, sibawa sininna wanuwa Amon mancaji onrong makkampi bimbala. Namuwissengngi matu makkedaé Iyya ritu Puwang.’ ”

6Makkedai Puwang Iya Pommatanré, “Mappaleppa'ko namuséréto marennu. Mupakariyawai tanana Israélié. 7Narimakkuwannanaro Uwabbéréyakko matu lao ri maéga bangsa iya rampo'ékko matu sibawa rampasa'i sininna appunnangemmu. Upabbinasako matu makkuwaro rupanna, angkanna dé'na mumancaji séuwa bangsa nenniya dé'to muwappunnai wanuwa riyalé. Namuwissengngi matu makkedaé Iyya ritu Puwang.”

Boto passalenna pahukkungengngé untu' Moab

8Makkedai Puwang Iya Pommatanré, “Napowadai Moab#Siyagangngaré bettuwang mariyoloé: Moab Ibrani: Moab sibawa Séir. makkedaé iyaro Yéhuda padai bangsa-bangsa laingngé. 9Rimakkuwannanaro kota-kota iya mattahangengngéngngi sining pakkasésénna wanuwa Moab Uleppessangngi matu rigasa ri balié muttama'ni kota-kota iya kaminang magelloé, iyanaritu: Bét-Yésimot, Baal-Méon sibawa Kiryataim. 10Uleppessangngi matu suku-suku bangsa polé ri padang kessi Alau caui Moab#Naullé bettuwanna: Moab Ibrani: Amon. silaong wanuwa Amon, angkanna Moab dé'na naddupa séuwa bangsa. 11Uhukkungngi matu Moab, nanaissengngi mennang makkedaé Iyya ritu Puwang.”

Boto passalenna pahukkungengngé untu' Edom

12Makkedai Puwang Iya Pommatanré, “Purani mébbu asalang battowa bangsa Edongngé nasaba kédo mabecco senna'i lao ri Yéhuda, selaku tindakang makkabale. 13Rimakkuwannanaro Uwappallebbangengngi makkedaé Iyya hukkungngi matu Edom sibawa mpunui tungke tauwé sibawa tungke olokolo'é kuwaro. Sininna wanuwaéro, polé ri kota Téman lettu ri kota Dédan, Upancajiwi masino-sino; matéi matu ra'ya'na ri laleng ammusurengngé. 14Upakéi matu bangsa-Ku Israélié untu' makkabale lao ri Edom, narigaukeng matu Edom situru serona cai-Ku. Naissengngi matu Edom pékkugi rasana mancaji attujuwanna cai-Ku. Iyya Puwang Iya Pommatanré pura mabbicara.”

Boto passalenna pahukkungengngé untu' Filistin

15Makkedai Puwang Iya Pommatanré, “Purani makkabale sining tau Filistingngé sibawa mabecco lao ri bali massossorenna mennang nenniya paccappui mennang sibawa penno paccéccé. 16Rimakkuwannanaro Uwappallebbangengngi makkedaé Ugasai matu sining tau Filistingngé sibawa paccappui mennang. Tungke tau iya nasésaé mupa ri daéra wiring tasi'na Filistin Uwunoi matu. 17Uhukkungngi matu mennang sibawa matane senna nenniya pallessui pakkabale'-Ku narapi cau-Ka. Rékko napérasai mennang cai-Ku, naissennitu mennang makkedaé Iyya ritu Puwang.”

Currently Selected:

YEHEZKIEL 25: LAIBUG

Highlight

Copy

Compare