2 ARUNG-NGARUNG 15

Uzia arunna Yéhuda

(2 Taw. 26:1-23)

1Ri taung maduwappuloé pitu apparéntanna Arung Yérobéam Maduwaé ri Israél, Uzia ana' Amazia mancaji arunna Yéhuda. 2Iyaro wettué umuru'na 16 taung namapparéntai ri Yérusalém 52 taung ittana. Indo'na riyasengngi Yékholya, makkunrai Yérusalém. 3Pada-pada ambo'na, napogau' towi Uzia iya sennangiyéngngi atinna Puwangnge. 4Iyakiya sayangngi, dé' naancuru'i onrong-ngonrong assompang déwataé, angkanna tette'i ra'ya'é makkasuwiyangeng akkarobangeng sibawa mattunu dupa kuwaro. 5Puwangnge mébbui nakenna lasa oli iya mappakatau-taué, nanarapi maté, iyaro lasana dé' najjappa. Ripassalai riséddié bola sibawa ripaleppe polé ri jama-jamanna. Yotam ana' worowanéna paréntai ra'ya'é selaku wakkélé'na.

6Curita laingngé passalenna Arung Uzia riyokii ri laleng kitta Sejarana Arung-ngarunna Yéhuda. 7Maténi Uzia sibawa rikuburu'i ri kuburu'na arung-ngarungngé ri Kota Daud. Yotam ana' worowanéna mancaji arung sulléiwi.

Zakharia arunna Israélié

8Ri taung matelluppuloé aruwa apparéntanna Arung Uzia ri Yéhuda, Zakharia ana' Yérobéam Maduwaé mancaji arunna Israél sibawa mapparéntai ri Samaria enneng uleng ittana. 9Pada-pada muto arung-ngarung iya mapparéntaé ri yolona, madosa towi lao ri Puwangnge. Naccowériwi jana Arung Yérobéam Mammulangngé, iya puraé mébbui Israélié madosa. 10Salum ana' Yabés sikongkolo méwai Arung Zakharia, nanaunoi ri Yibléam, nainappa mancaji arung sulléiwi.

11-12Nanallalengini nakajajiyang aga pura najjanciyang Puwangnge lao ri Arung Yéhu makkedaé ana' eppona lettu ri wija-wijanna maeppaé#wija-wijanna maeppaé: Zakharia iyanaritu ana' polé ri nénéna Yéhu. mancajiwi matu arunna Israélié. Curita laingngé passalenna Arung Zakharia, riyokii ri laleng kitta Sejarana Arung-ngarunna Israélié.

Salum arunna Israélié

13Ri taung matelluppuloé aséra apparéntanna Arung Uzia ri Yéhuda, Salum ana'na Yabés mancaji arunna Israélié. Mapparéntai ri Samaria banna siuleng 14nasaba Menahém ana' Gadi laowi ri Samaria polé ri Tirza, nanaunoi Salum, namancaji arung sulléiwi.

15-16Ri laleng allalengenna polé ri Tirza, naancuru sisengngi Menahém kota Tifsah sibawa daéra-daéra seddéna enrengngé paccappui sininna pabbanuwana. Nasaba iyaro kotaé dé' namaélo manyara lao ri aléna, nanapuwé'ni babuwana sining makkunrai mattampu'é ri kotaéro. Curita laingngé passalenna Arung Salum, muttama'ni assikongkolokenna ricata'i ri laleng kitta Sejarana Arung-ngarunna Israélié.

Menahém arunna Israélié

17Ri taung matelluppuloé aséra apparéntanna Arung Uzia ri Yéhuda, Menahém ana' Gadi mancaji arunna Israélié, sibawa mapparéntai ri Samaria 10 taung ittana. 18Sillampé umuru'na madosai lao ri Puwangnge nasaba naturusiwi jana Arung Yérobéam Mammulangngé, iya mébbuéngngi tau Israélié madosa. 19Wettunna Pul#Pul: Padai sibawa Tiglat-Piléser. arung Asyur gasai Israélié, Menahém mpéréngngi 34.000 kilo péra' kuwammengngi nabantui pakkasse'i akuwasanna Menahém ri Israélié. 20Carana Menahén lolongengngi iyaro dowié iyanaritu passai sining tau sugié ri Israél mabbéré limappulo dowi péra' tungke' tau. Rimakkuwannanaro nasalaini Pul iyaro wanuwaé sibawa lisu ri wanuwanna muto.

21Curita laingngé passalenna Arung Menahém riyokii ri laleng kitta Sejarana Arung-ngarunna Israélié. 22Matéi sibawa rikuburu, nainappa Pékahya ana'na mancaji arung sulléiwi.

Pékahya arunna Israélié

23Ri taung malimappuloé apparéntanna Arung Uzia ri Yéhuda, Pékahya ana' Menahém mancaji arunna Israélié sibawa mapparéntai ri Samaria duwattaung ittana. 24Madosai lao ri Puwangnge nasaba naccowériwi jana Arung Yérobéam Mammulangngé, iya mébbuéngngi tau Israélié madosa. 25Sala séddinna polé risining parawirana, iyanaritu Pékah ana' Rémalya, sikongkolo'i sibawa 50 tau polé ri Giléad. Na ri laleng séddié bénténg ri saorajaé ri Samaria naunoi mennang Pékahya silaong duwa tau laing iya riyasengngé Argob sibawa Aryé. Nainappa Pékah mancaji arung sulléiwi Pékahya.

26Curita laingngé passalenna Arung Pékahya riyokii ri laleng kitta Sejarana Arung-ngarunna Israélié.

Pékah arunna Israélié

27Ri taung malippuloé duwa apparéntanna Arung Uzia ri Yéhuda, Pékah ana' Rémalya mancaji arunna Israélié. Mapparéntai ri Samaria 20 taung ittana. 28Madosai lao ri Puwangnge nasaba naccowériwi jana Arung Yérobéam Mammulangngé iya mébbuéngngi Israélié madosa.

29Ri wettu apparéntanna Pékah, Tiglat-Piléser arung Asyur sittaiwi kota Iyon, Abél-Bét-Maakha, Yanoah, Kédés, Hazor, daérana Giléad, Galiléa sibawa Naftali. Natiwi towi pabbanuwana selaku tawangeng lao ri Asyur.

30Ri taung maduwappuloé apparéntanna Arung Yotam ana' Uzia ri Yéhuda, Hoséa ana' Ela massikongkolo méwai Arung Pékah sibawa mpunoi, nainappa mancaji arung sulléiwi.

31Curita laingngé passalenna Arung Pékah riyokii ri laleng kitta Sejarana Arung-ngarunna Israélié.

Yotam arunna Yéhuda

(2 Taw. 27:1-9)

32Ri taung maduwaé apparéntanna Arung Pékah ana' Rémalya ri Israélié, Yotam ana' Uzia mancaji arunna Yéhuda. 33Iyaro wettué makkéumuru'i 25 taung sibawa mapparéntai ri Yérusalém 16 taung ittana. Indo'na iyanaritu Yérusa ana' Zadok. 34Napogau'i Yotam iya sennangiyéngngi atinna Puwangnge, pada-pada Uzia ambo'na. 35Iyakiya sayangngi, onrong-ngonrong assompang déwataé dé' naancuru'i angkanna matterui ra'ya'é makkasuwiyangeng akkarobangeng sibawa mattunu dupa kuwaro. Yotam ritu patettongngi Pintu Gerbang Manorangngé ri Bolana Puwangnge.

36-37Ri wettu apparéntanna Yotam, mappammulai Puwangnge kiringngi Rézim arung Siria sibawa Pékah arung Israélié untu' gasai Yéhuda.

Curita laingngé passalenna Arung Yotam riyokii ri laleng kitta Sejarana Arung-ngarunna Yéhuda. 38Matéi sibawa rikuburu ri kuburu'na arung-ngarungngé ri Kota Daud. Ahas ana'na mancaji arung sulléiwi.

Currently Selected:

2 ARUNG-NGARUNG 15: LAIBUG

Highlight

Copy