4 Musa 15
15
Hatoren tersèngèt pèlèen
1Iberèken Jahowa mo taba si Musa 2hatoren-hatoren ènda sikennah ulaenken bangsa Israel i nagerri sinaing iberèken Jahowa bai kalak i. 3Mahan pèlèen situtungen barang pèlèen penggarar sienggo iharkatken barang pèlèen lemmo atè barang pè pèlèen ibas pèsta-pèsta biasa, ndorok ngo pèlènken ndènè bai Jahowa: Lembu tonggal, biri-biri tonggal, biri-biri barang kambing. Huap baungkus pèlèen idi pesennangken atè Jahowa. 4-5Barang isè memèlèken biri-biri barang kambing mahan pèlèen situtungen bai Jahowa, kennah iembah ma ngo rebbak dekket pinakan i, sada kilo nditak isakkor sada sellup minak zaitun mahan pèlèen hantaren, dekket sada sellup laè anggur. 6Mula sinipèlèken idi sada biri-biri tonggal, kennah ipèlèken ma ngo dua kilo nditak isakkor dekket tellu gantang minak zaitun mahan pèlèen hantaren, 7dekket tellu gantang laè anggur. Bau pèlèen idi pesennangken atè Jahowa. 8Mula sinipèlèken idi sada lembu tonggal mahan pèlèen situtungen barang pè pèlèen penggarar sienggo iniatken kin barang pèlèen perdamèen, 9kennah ipèlèken ma ngo tellu kilo nditak isakkor dekket dua sellup minak Zaitun mahan pèlèen hantaren, dekket dua sellup laè anggur. 10Bau pèlèen idi mo pesennangken atè Jahowa.
11Idi mo kennah ipèlèken rebbakken dekket gennep lembu tonggal, biri-biri tonggal, biri-biri barang kambing. 12Mula sinipèlèken idi lebbih daripada sada pinakan, nai pèlèen nditak, minak dekket laè anggur idi pè kennah itambahi ngo asa ulang tèlpang. 13Kennah iulaken karina kalak Israel ngo sibagidi tikan memèlèken pèlèen ia. Bau huap pèlèen i mo pesennangken atè Jahowa. 14Kalak sidèban simerian i tengah-tengah ndènè, barang lako sigejap sambing barang pè lako menettap i sidi, kennah iuèi ngo karina hatoren idi mula memèlèken pèlèen sipanganen ia, bau huapna i pesennangken atè Jahowa. 15-16#3 Ms. 24:22 Karina pati-patiin dekket hatoren dos ngo i bai ndènè dekket bai kalak sidèban simerian i tengah-tengah ndènè, kumerna dos ngo kènè dekket kalak i i hadeppen Jahowa. Janah merdalan mo hatoren i soh sidekkah-dekkahna.
17Iberèken Jahowa mo hatoren èn bai si Musa 18sikennah ulaenken bangsa Israel i nagerri sinaing berènken Jahowa bai kalak i. 19Mula enggo mulai naing ipangan kènè barang kadè sinihasilken nagerri idi, kennah pejaèen ndènè ngo dèba i sidi nai mahan pèlèen hujuen bai Jahowa. 20Mula memanggang roti kènè ibas pagè siperlebbè ipotik kènè nai, kennah ipèlèken ngo roti i sikira pèlèen merkedekoen bai Jahowa. Cara memèlèken, dos ngo dekket carana memèlèken pagè perlebbè sinitutu ndènè. 21Soh seggen mo gennep roti ibas pagè siperlebbè ipotik idi nai kennah berènken ndènè mahan pèlèen merkedekoen bai Jahowa.
22-24Mula lot kènè lupa ibas sada bagè hatoren-hatoren sienggo iberèken Jahowa bai si Musa i tapi oda inakkati, mungkah i ari Jahowa memerèken hatoren idi nai turun-tumurun, janah kesalahen idi iulaken kumerna oda ibettoh bangsa i hatoren idi, kennah karina mo bangsa i memèlèken sada lembu tonggal mahan pèlèen situtungen. Rebbak dekket i kennah ipèlèken ngo pèlèen hantaren dekket laè anggur bagè sienggo ihatorken. Baungkus huap pèlèen idi mo pesennangken atè Jahowa. Laènkenna i kennah ipèlèken ngo sada biri-biri tonggal mahan pèlèen kesasaen dosa. 25Nai kennah imam ngo mahanken kerja mengido kesasaen dosa lako bai bangsa i. Nai iampuni mo dosa kalak i kumerna oda ngo isengaja kalak idi mengulaken kesalahen i, janah kumerna enggo iembah kalak i pèlèen kesasaen dosa bak pèlèen situtungen bai Jahowa. 26Isasa mo dosa karina bangsa Israel dekket dosa kalak sidèban simerian i tengah-tengah kalak i, kumerna karinana ngo kenna ibas kesalahen siso isengaja idi.
27 #
3 Ms. 4:27-31
Mula sada kalak sambing ngo merdosa merkitè oda isengaja, kennah ipèlèken mo sada kambing berru-berru merumur sitahun mahan pèlèen kesasaen dosana. 28Kennah imam ngo mengulaken kerja mengido kesasaen dosa i lebbè Jahowa, asa isasa dosana. 29Merdalan ngo hatoren i barang bai isè sambing simengulaken dosa siso isengaja, tah kalak Israel pè i barang kalak sidèban simerian i tengah-tengah ndènè.
30Tapi mula lot sada kalak Israel barang sada kalak sidèban isengaja mengulaken dosa, pelèaken Jahowa ngo ia i si. Kennah ihukum matè ngo kalak sibagidi, 31kumerna ialo Jahowa janah isengaja mengelausi perèntah Jahowa. Matè mo kalak sibagidi kumernaken salahna sendiri.
Kalak simengelausi hatoren ari Sabat
32Sinderrang merian i gurun pasir kalak Israel, terdapet mo sada kalak anak laki pepulungken sebban tupung ari Sabat. 33Iembah mo ia menghadep si Musa, si Aron dekket karina ummat, 34nai itahan mo ia kumerna oda tangkas dèng barang kennah kekadèen ia. 35Nina Jahowa mo mbang si Musa, “Kennah ihukum matè ngo ia. Kennah iembah mo ia mi ruar perundung-undungen janah i sidi mo karina ummat kennah mengkebekkisa dekket batu soh matè.” 36Nai karina mo ummat i menaransa mi ruar perundung-undungen idi janah mengkebekkisa dekket batu soh matè, bagè siniperèntahken Jahowa.
Hatoren tersèngèt rambu oles
37-38 #
5 Ms. 22:12
Idokken Jahowa mo mbang si Musa asa idokken bai bangsa Israel, “Bakin mo rambu ipunca oles ndènè janah angitken mo bennang meratah i gennep rambu. Kennah bakinen ndènè ngo idi soh turun-tumurun. 39Mahan pernèngèten ngo rambu-rambu idi: Gennep idah kènè idi, èngèten ndènè mo karina perèntahKu janah menguèisa. Janah merkitè bagidi oda nèngè mo lupanken ndènè Aku lako menguèi cubellek dekket sinipergeddo ukur ndènè sambing. 40Rambu-rambu idi mo pesèngètken kènè lako menguèi perèntahKu, gabè tuhu-tuhu mo kènè milikKu. 41Aku ngo Jahowa Dèbata ndènè; Aku ngo mengarak kènè mbungkas i Mesir nai asa Aku gabè Dèbata ndènè. Aku ngo Jahowa.”
Currently Selected:
4 Musa 15: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
