3 Musa 2
2
Pèlèen hantaren
1Mula lot kalak memèlèken pèlèen hantaren bai Jahowa, kennah nditak simendèna kalohon ngo pèlèen i sinisakkor dekket minak zaitun janah ibakin kemènjen i babona. 2Kennah iembah ngo i taba imam-imam pinempar si Aron. Kennah ibuat imam simerkebbas ngo singkupul ibas nditak idi nai bagi dekket minak zaitun dekket karina kemènjenna, nai itutung mo i babo langgaten sikira tanda magahken enggo karina ipèlèken bai Jahowa. Bau pèlèen sipanganen idi pesennangken atè Jahowa. 3Pèlèen hantaren sitadingna idi mo bai imam. Mbadia kalohon ngo pèlèen idi kumarna ibuat ibas pangaen sienggo ipèlèken bai Jahowa nai.
4Mula sinipèlèken idi roti sinitutung ibas penutungen, kennah ngo ulang meragi roti i. Ndorok ngo ngkapal roti i, ibahan ibas nditak melemet sienggo isakkor dekket minak zaitun, ndorok ma ngo kuè pellin idalisi dekket minak zaitun.
5Mula roti sinipanggang ibas panggangen ngo sinipèlèken idi, kennah ibahan ibas nditak melèmet dekket minak zaitun nai ngo roti i, tapi oda meragi. 6Kennah ibellah-bellah ngo roti sinipèlèken i, nai ilapui dekket minak zaitun.
7Mula sinipèlèken idi itasak ibas saruam, kennah ipas nditak melèmet dekket minak zaitun nai ngo roti i ibahan. 8Roti sinibahan bagidi kennah ipèlèken bai Jahowa janah isohken taba imam asa iembah mi langgaten. 9Ibuat imam mo dèba ibas roti idi nai janah itutung mo i babo langgaten i sikira tanda magahken karina enggo ipèlèken bai Jahowa. Bauna i mo pesennangken atè Jahowa. 10Sitadingna idi mo lako bai imam. Mbadia kalohon ngo roti i kumerna ibuat ibas pangaen sienggo ipèlèken bai Jahowa.
11Pèlèen hantaren bai Jahowa oda ndorok icampur dekket tenggoli barang pè ragi kumerna tenggoli dekket ragi oda ndorok itutung mahan pèlèen bai Jahowa. 12Ibas hasil perlebbè juma nai gennep tahun, kennah ipèlèken ngo dèba bai Jahowa, tapi ulang itutung i babo langgaten. 13Karina pèlèen hantaren kennah isirai, kumerna sira ngo tanda perpadanen Dèbata dekket kènè. Nai karina pèlèen kennah isirai. 14Mula ipèlèken kènè pagè perlebbè ipotik bai Jahowa, embah mo pagè rembaru sienggo itutu melèmet barang ipanggang. 15Kennah iarirken ngo minak zaitun janah ibakin kemènjen i babo berras rembaru i. 16Kennah itutung imam mo dèba ibas nditak dekket minak i nai dekket karina kemènjenna, sikira tanda enggo karina ipèlèken bai Jahowa.
Currently Selected:
3 Musa 2: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
