3 Musa 16
16
Ari Raya Kesasaen Dosa
1Enggo kessa matè dukak si Aron duana tikan memèlèken api siso ikelemoken Jahowa, idokken Jahowa mo mbang si Musa, 2#Heb. 6:19 nina mo, “Pesakat mo bai dengngan sibeltekmu si Aron, pellin ibas katika sienggo itentuken ngo kessa ia ndorok memengketti Bilik Simbadia kalohon sinnibellat dekket kirè-kirè, kumerna tupung i ngo Aku pecidahken diringKu ibas hembun i babo Pèti Perpadanen. Mula ilausi si Aron perèntah idi, matè mo ia. 3#Heb. 9:7 Pellin lako memèlèken lembu tonggal bajar mahan pèlèen pengampunen dosa dekket sada biri-biri tonggal mahan pèlèen situtungen ngo kessa ndorok si Aron memengketti Bilik Simbadia kalohon.”
4Nai nola dèng ma kennah iperatè-atèken si Aron ngo hatoren ènda. Sinderrang mak dèng ibengketti Bilik Simbadia kalohon, kennah meridi ngo ia lebbèken, nai ipakkè mo pakèen imam, imo baju, selabal joppok, tali abak dekket sorban, karinana idi ipas linen nai.
5Nai kennah ipesakat bangsa Israel mo bai si Aron dua kambing tonggal mahan pèlèen kesasaen dosa dekket sada biri-biri tonggal mahan pèlèen situtungen. 6Kennah ipèlèken si Aron ngo sada lembu tonggal mahan pèlèen kasasaen dosana sendiri dekket sisimpangansa. 7Kambing sidua bai bangsa Israel idi nai kennah iembah mi lebbè pèntu Undung-undung Jahowa. 8Mertendung mo ia i sidi merkitè dua batu, sada ibakin tandana “lako bai Jahowa” janah sada nai “bai si Azazel”. 9Kambing siterpilih bai Jahowa kennah ipèlèken mahan pengampunen dosa. 10Kambing siterpilih bai si Azazel kennah i iring gelluh-gelluhen mi hadeppen Jahowa nai ipelaus mo mi rambah bai si Azazel, asa isasa dosa-dosa bangsa Israel.
11Enggo kessa isèat janah ipèlèken si Aron lembu tonggal i mahan pèlèen kesasaen dosana sendiri dekket mi sisimpangansa, 12kennah ibuat mo bekkas api i langgaten i nai janah idomi dekket rara api dekket dua ngkupul dahupa melèmet, nai iembah mo i mi Bilik Simbadia kalohon. 13Kennah itutung ngo dahupa idi i lebbè Pèti Perpadanen, asa isangkemmi cèmpul cemberna i tutup Pèti Perpadanen i, gabè oda idah si Aron nèngè, kumerna mula iidah ngo, matè mo ia. 14Nai kennah ibuat si Aron mo cituk daroh lembu i, janah ipispisken mo merkitè jari-jarina daroh i mi lumpak kettan lebbè tutup Pèti Perpadanen i janah pitu kali mi lebbè Pèti i.
15 #
Heb. 9:12
Enggo kessa bagi kennah isèat si Aron mo kambing mahan pèlèen kesasaen dosa bangsa Israel. Kennah iembah ngo daroh kambing idi mi Bilik Simbadia kalohon, nai ipispisken mo mi lebbè tutup Pèti Perpadanen i dekket mi lebbè Pèti i, tosè bagè sienggo nibakinna dekket daroh lembu tonggal i. 16Merkitè bagidi mo ia pebadiaken Bilik Simbadia kalohon ibas kinimelamun bangsa Israel nai dekket ibas karinana dosa kalak idi nai. Kennah ipepanting ngo Undung-undung Jahowa kumerna merbekkas i tengah-tengah perundung-undungen bangsa Israel janah kenna simelamun kalak i. 17Mungkah kessa ibengketti si Aron nai Bilik Simbadia kalohon i lako mengulaken kerja menguras soh mi karuar ia, sada kalak poda ndorok lot ibagasen Undung-undung idi. Enggo kessa dung mengulaken kerja mi dirina sendiri, bai sisimpangansa dekket mi karina bangsa Israel, 18kennah karuar mo si Aron janah laus mi langgaten pemèlèen situtungen lako menguras langgaten idi. Kennah ibuat mo situk daroh lembu dekket daroh kambing, janah idalisken mi tanduk-tanduk i soki-soki langgaten i. 19Ipispisken mo daroh i merkitè jari-jarina pitu kali mi babo langgaten i. Merkitè bagidi mo ia menguras langgaten i i simelamun bangsa Israel nai, asa gabè mpanting.
Kambing mbèrèng
20Enggo kessa dung ibaing Kerja menguras Bilik Simbadia kalohon dekket i bekkas sidèbanna i Undung-undung Jahowa bak langgatenna, kennah ipèlèken si Aron bai Jahowa kambing nggelluh sinipilih bai Azazel. 21Kennah iampèken tanganna duana i babo takal kambing i, ninganna mengakui karina kesalahen dosa dekket pengelausien bangsa Israel. Merkitè bagidi karina kesalahen bangsa Israel iompat mi babo takal kambing i. Nai sada kalak sienggo ipilih kennah mengalai kambing idi mi rambah kelongoen. 22Kambing i mo merembah karina dosa bangsa Israel mi bekkas dakkir siso i iani janah kennah ipejalang ngo mi kelongoen.
23 #
Hes. 44:19
Enggo kessa bagi kennah mbengket mo si Aron mi bagasen Undung-undung, menalkasi pakèen imam sinipakkèna tikan mbegket ia mi Bilik Simbadia kalohoen, janah itadingken mo pakèen idi i sidi. 24Nai kennah meridi mo ia i sada bekkas sienggo merkedekoen janah menelluk pakènna kin. Kessa pul i kennah mi ruar mo ia janah memèlèken pèlèen situtungen mahan kesasaen dosana sendiri dekket dosa bangsa Israel. 25Kennah itutung ngo pessoh pinakan pèlèen kesasaen dosa i i langgaten.
26Kalak sipaluahken kambing bai si Azazel i kelongoen kennah itaptapi pakèenna janah meridi sinderrang makdèng balik ia mi perundung-undungen. 27#Heb. 13:11 Lembu tonggal dekket kambing mahan pèlèen kesasaen dosa i, siniembah darohna mbengket mi bilik Simbadia kalohon mahan kesasaen dosa, kennah iembah mi ruar perundung-undungen janah itutung. Koling, suka dekket bitukana kennah itutung karina. 28Kalak simenutung idi kennah itaptapi olesna janah meridi sinderrang makdèng balik mi perundung-undungen.
Cara memèstaken ari kesasaen dosa
29-31 #
3 Ms. 23:26-32; 4 Ms. 29:7-11 Kennah iuèi ngo hatoren èn soh mi sidekkah-dekkahna. I ari sipuluh bulan pekepitu, kennah puasa ngo kalak Israel dekket kalak sidèban simerian i tengah-tengah kalak i janah igerra mahan bahaen, kumerna mbadia kalohon ngo ari i. Tupung ari i kennah ibahan ngo Kerja lako menguras bangsa Israel ibas nasa dosa kalak i nai asa mpanting kalak i. 32Imam huntuen, sienggo ipebangkit janah ihujuken bai Dèbata lako menggancih bapana, kennah ia mo mengulaken kerja menguras i. Kennah ipakkè mo pakèen simerkedekoen, 33ninganna mengkebasken kerja menguras Bilik Simbadia kalohoen, bagi ma dekket bekkas sidèbanna ibas Undung-undung Jahowa, langgaten imam-imam dekket karina bangsa Israel. 34Kennah ulanken ngo Kerja idi sikali sitahun lako menguras bangsa Israel ibas nasa dosa kalak i nai. Imo hatoren sikennah iuèi soh mi sidekkah-dekkahna.
Ibahanken si Musa mo bagè sinidokken Jahowa mbangsa i.
Currently Selected:
3 Musa 16: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
