3 Musa 14
14
Kerja menguras enggo kessa malum i sakit puru merbahaya nai
1Iberèken Jahowa mo hatoren ènda bai si Musa 2#Mat. 8:4; Mrk. 1:44; Luk. 5:14, 17:14 imo tersèngèt kerja me- nguras enggo kessa malum ipas sakit puru merbahaya nai. Tupung ari naing magahkensa gabè mpanting, kennah iembah ngo ia mendahi imam, 3janah iembah imam mo ia mi ruar perundung-undungen. Mula mengèkutken pemerèsoenna enggo malum iakap jelma i, 4idokken imam mo ia merembah dua manuk-manuk nggelluh siso haram, dekket simpenggel kayu sempènur, sirambar tinali mbara dekket sintangkè hisop. 5Sada manuk-manuk i kennah iseat i babo serruam tanoh sin laè mbersih sinitaku i mata mul nai. 6Manuk-manuk sisada nai dekket kayu sempènur, bennang mbara dekket sintangkè hisop i kennah isernepken imam mi daroh manuk-manuk sienggo isèat i. 7Ipispisken imam mo daroh manuk-manuk i pitu kali bai kalak sienggo malum idi, janah mendokken enggo mbersih ia. Nai manuk-manuk singgelluh i dèng kennah ipaluah i rambah. 8Enggo kessa i kennah itaptapi kalak i mo pakèenna, icukkur karina bukna, janah meridi. Nai mbersih mo ia, janah ndorok mbengket mi perundung-undungen, tapi sidekkah pitu ari nai oda ndorok dèng ia mbengket mi sapona sendiri. 9Ibas ari pepituken kennah icukkur karina bukna, bagi ma bak janggutna, cilèbenna bak karina buk silot i dagingna. Nai kennah itaptapi pakèenna janah meridi ia. Enggo kessa bagi pè asa mbersih ia.
10Ibas ari peualuhken kennah iembah kalak i ngo dua anak biri-biri tonggal dekket sada anak biri-biri berru-berru merumur sitahun, janah siso mertikas. Adumna i nola ma, tellu kilo nditak sienggo i sakkor dekket minak zaitun bak sipertellu sellup minak zaitun. 11Nai kennah iarahken imam mo ia merembah pèlèenna idi mi lebbè pèntu Undung-undung Jahowa. 12Kennah ibuat imam mo anak biri-biri tonggal sisada i dekket sipertellu sellup minak zaitun mahan pèlèen gancih kerogien, janah memèlèken sikira pèlèen hujuen bai Jahowa. 13Kennah isèat ngo anak biri-biri i i bekkas penèaten pinakan mahan pèlèen pengampunen dosa dekket pèlèen situtungen. Kennah i sidi ngo isèat biri-biri i kumerna mbadia kalohon ngo pèlèen gancih kerogien dekket pèlèen pe- ngampunen dosa janah gabè jambar imam. 14Kennah ibuat imam ngo situk daroh anak biri-biri i nai idalisken mi coping kamuhun, mi kekambal tangan kamuhun dekket mi kikambal nèhè kamuhun kalak sinaing dokenken mbersih idi. 15Nai ibuat imam mo situk minak zaitun janah iarirken mi tapak tanganna sendiri tan kambirang. 16Enggo kessa isornepken jari-jari tangan kamuhunna mi bagasen minak, janah memispiskensa pitu kali i bagasen Undung-undung Jahowa. 17Nai minak sisituk silot i tanganna kennah idalisken mi bekkas-bekkas sienggo idalisi daroh, imo mi coping kamuhun, mi kekambal tangan kamuhun, dekket kekambal nèhè kamuhun kalak sinaing dokenken panting i. 18Minak silebbihna i kennah iorèken mi babo takal kalak i. Merkitè bagidi mo imam memakin kerja menguras bai jelma i i hadeppen Jahowa.
19Nai kennah ipèlèken imam mo pèlèen pengampunen dosa asa gabè mpanting kalak simelamun idi. Enggo kessa bagi kennah isèat mo pinakan mahan pèlèen situtungen 20janah ipèlèken rebbak dekket pelèen hantaren i babo langgaten. Merkitè bagidi mo imam memaing kerja pengurasen bai kalak i, janah mbersih mo ia.
21Mula ncor ngo kalak i janah oda lot sibaingenna, ndorok mo iembah pellin sada anak biri-biri tonggal sambing mahan pèlèen gancih kerogien, mahan pèlèen hujuen bai Jahowa. Laènkenna i nola sada kilo nditak icampur dekket minak zaitun mahan pèlèen hantaren, dekket sipertellu sellup minak zaitun. 22Kennah iembah dèng ma mo dua nai ndarapati anè-anè barang pè kerap anè-anè: sada mahan pèlèen pengampunen dosa janah sada nai mahan pèlèen situtungen. 23Karinana pèlèen idi kennah iembah taba imam i lebbè pèntu Undung-undung Jahowa i ari peualuhken kerja menguras dirina i. 24Ibuat imam mo anak biri-biri dekket minak zaitun idi janah ipèlèken sikira pèlèen hujuen bai Jahowa, janah idi mo jambar imam. 25Nai kennah isèat imam mo anak biri-biri i janah idalisken situk darohna i mi coping kamuhun, kikambal tangan kamuhun dekket kikambal nèhè kamuhun kalak sinaing dokenken mbersih i. 26Kennah iarirken imam mo situk minak i mi tapap tanganna kambirang 27janah merkitè jari-jari tangan kamuhunna ipispisken mo minak idi pitu kali i bagasen Undung-undung Jahowa. 28Nai minak sisituk silot i tanganna i kennah idalisken mi bekkas-bekkas sienggo idalisi daroh, imo mi coping kamuhun, kekambal tangan kamuhun dekket kekambal nèhè kamuhun kalak sinaing mpanting i. 29Minak sitadingna dèng kennah iorèken mi babo takal kalak i mahan kerja menguras dirina i hadeppen Jahowa.
30Nai nola ma kennah ipèlèken imam mo sada ndarapati anè-anè barang pè kèrap anè-anè, 31mahan pèlèen pengampunen dosa, janah sisada nai mahan pèlèen situtungen rebbak dekket pèlèen hantaren. Merkitè bagidi mo imam memahanken kerja menguras kalak i i hadeppen Jahowa.
32Idi mo hatoren tersèngèt kerja menguras enggo kessa kenna sakit puru merbahaya bai kalak sincor.
Sapo mocip
33Iberèken Jahowa mo bai si Musa dekket si Aron 34hatoren tersèngèt sapo sienggo terlangketten mocip merkuraraten. Hatoren ènda merdalan enggo kessa ibengketti bangsa Israel tanoh Kanaan, nagerri siniberèken Jahowa bai kalak i. 35Barang isè mengidah lot mocip i sapona, kennah ibagahken taba imam. 36Sinderrang madèng roh imam lako memerèso simocip i, kennah iperèntahken asa ikaruarken karina silot i sapo idi nai. Mula oda gabè melamun mo barang kadè sambing silot i sapo idi. Nai kennah roh mo imam 37lako memerèso simocip idi. Mula lot mertiktik bagè bagè narih meratah barang narih mbara-mbara janah bagè menap soh mi dingding, 38kennah itadingken imam lebbè sapo i janah ibelli mo konci sidekkah pitu ari. 39I ari pepituken kennah roh nola mo ia lako memerèso. Mula makin rarat ngo simocip i, 40-41kennah iperèntahken asa irontas batu-batu dingding sienggo mocip idi, janah karina dingding kettan bagasen asa ikiskis. Pengkiskisen plester dekket batu-batu i kennah iambongken mi sada bekkas si melamun i ruar kuta i. 42Nai kennah igancihi mo batu-batu sinirontasken idi dekket batu-batu sirembaru.
43Mula dak tong dèng mengolihi simocip i, tukasi pè enggo igancihi batu-batu sapo i janah dingding batuna pè enggo ikiskis janah ipelèster mengolihi, 44kennah roh nola ngo imam lako memerèso sapo idi. Mula dak rarat ngo si mocip idi melamun mo enggo sapo idi 45janah kennah irumpakken. Karina batu, kayu bak pelèsterna kennah iembah mi bekkas simelamun i ruar kuta i. 46Sinderrang madèng i, barang isè simbengket mi bagasen sapo i gabè melamun ngo soh mi sundut mataniari. 47Barang isè meddem barang mangan i sapo i kennah itaptapi ngo geddana.
48Tapi mula enggo roh imam janah mengèkutken pemerèsoenna oda nè lot masa mocip enggo kessa iplèster nola sapo idi, kennah idokken ngo mbersih sapo i, kumarna enggo patè karina simocip i. 49Lako menguras sapo i, kennah buaten imam mo dua manuk-manuk, kayu sempènur, bennang mbara dekket sintangkè hisop. 50Sada manuk-manuk i kennah i sèat i babo saruam sienggo sin laè i mata mul nai. 51Nai isernepken mo kayu sempènur, bennang mbara, hisop, dekket manuk-manuk singgelluh i mi bagasen daroh manuk-manuk sienggo isèat dekket mi bagasen laè malum i. Enggo kessa bagi kennah ipispisi mo sapo i pitu kali. 52-53Manuk-manuk singgelluh i kennah ipekabang i rambah i ruar kuta i. Merkitè bagi mo imam memahanken kerja menguras sapo, nai gabè mbersih mo sapo i.
54Idi mo hatoren tersèngèt sakit puru sintengam i, 55-56tersèngèt bandul-bandul, buruk barang pè riap-riap mbentar barang mbessar ibas daging, dekket tersèngèt mocip ipas pakèen barang sapo. 57Guna hatoren-hatoren i imo lako menentuken tah mbersih ngo sada-sada haliu barang melamun.
Currently Selected:
3 Musa 14: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
