1 Musa 39
39
Si Josep dekket sinibages si Potifar
1Ukum si Josep iembah kalak Ismael ngo mi Mesir janah idèa bai si Potifar, sada kalak èkuten pengabal istana. 2#Ul. 7:9 Dak iurupi Jahowa ngo si Josep, gabè dak merhasil ngo karina nibahanna. Merian i bages indukna ngo ia imo kalak Mesir i. 3Idah indukna ngo dak iurupi Jahowa ngo si Josep janah kemulihkenna i dak selloh merhasil karina ndiulana. 4Ngkelleng ngo atè si Potifar midah si Josep, gabè ipebangkit mo ia mahan pengkebasi mi dirina; nai gabè ibaing mo si Josep mengurus bagesna dekket karina milikna. 5Mulai i sidi nai kumernaken si Josep gabè ipasu-pasu Jahowa mo pendirien kalak Mesir i dekket karina silot bana i bages bang pè silot i juma. 6Karinana silot harta si Potifar isohken ngo bai si Josep. Merkitè bagidi oda pella nèngè ipikirken tersèngèt mengurus bagesna, laènken panganna.
Ukum si Josep i maholi ngo. 7Enggo kessa barang sadikè dekkah, gabè laèn mo penèngen sinibages si Potifar taba si Josep, gabè iarahken mo ia asa rebbak meddem kalak i. 8Tapi oda ngo uè si Josep janah idokken mo ranana, “Sintabi mo nangè, enggo tok atè indukku si Potifar janah ipesakat karinana hartana bangku. Oda nè pella ipikirken barang kadè i bages èn. 9Ukum isèn dos ngo kuasangku dekket kuasana. Kadè poda mak enggo ipessoh taba aku, kènè nai ngo kessa mada. Mèter bakunè nola mo uè aku mengulaken ulaen jahat i, janah gabè merdosa aku taba Dèbata?” 10Tukasi pè ièlèk-èlèk sinibages si Potifar si Josep i gennep ari, tapi laju ngo oda uè ia rebbak meddem dekketsa.
11Tikan sidari nderrang masuk si Josep mi bages lako mengulaken bahanna, isè poda i sidi. 12Mèter icèkèpi sinibages si Potifar mo jubah si Josep ninganna idokken, “Arko mo rebbak meddem kita.” Nai gumalèsang mo si Josep, maluah mo ia janah lojang mo ia mi ruar. Tapi ukum jubahna, tading ngo itangan daberru i. 13Idah sinibages si Potifar kessa mo enggo lojang si Josep keppè jubahna tading, 14idiloi mo naposona janah idokken mo, “Tengen kènè mo. Kalak Heber siniembah sinibalèngku mi bages èn mengelèai aku. Masuk ngo ia mi bilikku janah naing irampok aku, tapi mersurak mo aku nggang kalohon. 15Kerna idengkoh mersurak aku, gabè lojang mo ia mi ruar, tapi jubahna tading ngo.”
16Nai iboniken sinibages si Potifar mo jubah i pèma balik sinibalèna. 17Balik kessa mo sinibalèna, isukutken mo simasa i tabasa, nina mo, “Kalak Heber siniembahmu misèn, masuk mi bilikku, naing mengelèai aku. 18Tapi kumarna mersurak aku, gabè lojang mo ia mi ruar, janah tading mo jubahna.”
19Melaga kalohon ngo si Potifar. 20Iperèntahken mo asa ndor itangkup si Josep janah ikurung mi bekkas kurungen raja. 21#Ul. 7:9 Tapi dak iurupi Jahowa ngo si Josep janah masèh atèna bana, gabè ngkelleng mo atè èkuten kurungen i bana. 22Ipesakat mo taba si Josep kalak sinikurungen sidèbanna i, janah taba si Josep ngo isohken karina bahaen siniulaken ibas kurungen i. 23Oda nè pella iperdimata huntuen kurungen i karina sienggo ipercayaken bai si Josep, kumarna dak idengani Jahowa ngo ia dak merhasil ibas karina bahanna.
Currently Selected:
1 Musa 39: LAIBTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
