ROMA 5

Kosma kankenem ḇeḇye kaḇer kuker Allah

5:1-11

1Baboine kosma kankenem ḇeḇye kaḇer kuker Allah snar kakyar koḇena. Ma eḇedari kokenem ro aski kuker Allah snar Yesus Kristus Manseren koḇedi. 2Snar kokyar Yesus ḇyuk fa kosma Allah saswar ḇyedi, eḇedari kokenem isof baboine. Rarirya komarisen snar kokyar kaku nari koḇaḇir baba Allah ḇyuk maḇekonya. 3Ma isyadi wer, kokako koryaḇ rofandu kandera koḇena snar kofawi nafrur fa kofarmku, 4ma ḇaḇe farmku ani ḇyuk fa kodworen ro manasnasen; mnuk ine iso ḇeḇuk saneraroya. 5Saneraro ḇeradineya nari ḇyefromo faro koba, snar kosnesna neḇeser kwar kuker Allah saswar ḇyena. Allah ifrur roi nanekam kuker fafnoḇek Rur ḇyedi, ḇyukmabeko kwar ani.

6Rofyor kosambraḇ ḇa kwar, Kristus imarwarek ko, rofafisu ḇemnis, Allah ḇyardi kwarya; snar rorandakya koḇinkwan kakubur Allah. 7Syamswen kaku faro snonkaku ḇemarisen ḇemar sadwer snonkaku ḇenapes oso, mboi faro snonkaku ḇeḇye ono sisya simarisen fa simar sadwer snon ani rofyor snon ani kyaku. 8Ḇape Allah fyasna saswar ḇyedi maroko rofyor Yesus imar warek ko, rofyor koisya roi sasarya kaker! 9Baboine kosma kankenem ḇeḇye kaḇer kuker Allah snar Kristus marmar ḇyedi, inja nari kosma fasparbur Allah masasor ḇyedi snar Yesus Kristus. 10Ma rofafisu koḇembroḇ kuker Allah, kosma ḇaḇedasi kuker marmar ro Rumkun ḇyedi, isyadi wer baboine koḇye kaḇer kuker Allah kwar inja kokako nari kosma koreri snar kankenem Yesus Kristus. 11Ma isyadi wer ro roi ḇeḇesya ani, koryaḇ kako snar Allah ḇaḇye ḇyedi fyasna maḇeko ro Manseren koḇedi Yesus Kristus. Snar kuker Kristus, ro baboine kosma ḇaḇeoser koḇedi kuker Allah.

Adam ma Kristus

5:12-21

12 # Kej. 3:6 Sasarya ssyunḇe supswan ine snar snonkaku oser, ma snar sasar ani, ifnai marmarya. Eḇedari marmarya iduḇ faro snonkakusyakam, snar snonkakusyakam sifrur sasar kwar. 13Rofyor sasoser agama Yahudi neḇeḇuk ḇaim, sasarya isya kwar ro supswan ine. Ḇape sasar anna neḇeyawḇa, snar sasoser ono naisya fa neḇeḇeyuk ḇaim. 14Rarirya, marmarya daḇen snonkakusyakam ro awar Adam isof ro Moses. Ḇape snonkaku ḇeyakḇeyuk roi Adam ḇyeyuknaḇasya kako marmarya deksi.

Snar Adam ḇyefarari snonkaku nari ḇeramumaya. 15Ḇape snonkaku ansuya sumamnisḇa; snar Allah saswar ḇyedi iba syadi wer ro Adam sasar ḇyena. Ḇaḇeyuk ro snonkaku oser ifnai fa snonkakusyakam simar. Ḇape saswar ma aski Allah ḇyena naba syadi wer snar snonkaku sne ḇeḇye oser, isoine Yesus Kristus, faro snonkakusyakam. 16Fakamaman ma ḇaḇenaḇye Allah ḇyedi kako ibasyadi wer faro sasar snonkaku oser ani. Snar rofyor snonkaku oser ḇyeyuk ido, skara “iḇe ḇesasar”. Ḇape rofyor snonkakusya sibor sifrur sasar kwar, saswar Allah ryama fyasna ḇadir, “sasaro isyaḇa kwar”. 17Snar ḇaḇeyuk ro snonkaku oser, marmar iduḇ ḇemoḇ nakam snar snonkaku oser ani. Rarirya kosma fararwe snar fararur ro snonkaku oser ḇese, isoine Yesus Kristus, faro snonkakusyakam. Nari Allah ḇyuk farsbawer monda fakamaman ḇyedi waworek farosi insa siḇye kaḇer wer faro Allah; ma nari sisma papoik ro supswan ine snar Yesus Kristus.

18Inja, raris ḇaḇeyuk snonkaku oser ifnai fa snonkaku ḇeborsyakam sisma samamyai, rarirya kako fararur snonkaku oser ḇeḇeyuser Allah marisen ḇyena, ḇyedar fa snonkakusyakam sisma fasaspar ro sasar sena ma sisma kankenemya. 19Ma raris snonkaku sibor sḇesasar snar snonkaku oser ḇaḇeyuk ḇyena, rarirya kako nari snonkaku sibor sikenem imnis Allah marisen ḇyedi, snar snonkaku oser ḇeḇeyuser Allah marisen ḇyena.

20Ḇeḇuk sasoser agama Yahudina isoine Allah mankundi. Ḇape rofyor snonkakusya sḇesewar fa sḇeuser sasoser anna, rofyor ani kako sḇeyuk syadi wer ro sasoser anna ma sḇesasar faro Allah. Rofyor snonkaku ansi sḇesasar syadi wer, Allah fyasna iswar syadisi wer. 21Inja, imnis komar snar kofrur sasar, rarirya kako Allah ḇyuk nyan maḇeko insa koḇye kaḇer wer kuker Allah snar saswar ḇyeja ḇeko. Ma snar ḇaḇeoser koḇedi kuker Allah, iḇye kaḇer kwar ma ḇyuk kako kankenem fyoro-fyoroya maḇeko snar Manseren koḇedi Yesus Kristus.

Currently Selected:

ROMA 5: LAIBHW

Highlight

Copy