ROMA 14

Buk sasar faro naek srar besi awer

14:1-12

1 # Kol. 2:16 Snonkaku kakyar ḇedworenḇasya mkonasi kuker ḇaḇye rofandu naek srar. Mkorakrakrok awer kukersi snar swaruser sena. 2Snonkaku ono skara sima san famfnom monda. Ḇape snonkaku ono ḇese kakyar sena nadworenḇa; inja skara sima san wei monda. 3Snonkaku ḇeyan famfnom, skoryaye awer snonkaku ḇeyakan famfnomḇasya; ma snonkaku ḇeyan famfnomḇasya, skoryaye awer snonkaku ḇeyan famfnomsya, snar Allah nyasikam kwar. 4Manseiso naek srar isof mkoḇe mkoḇemankara snonkaku ḇesesya manfamyan sesi? Manfamyan ani isapi roḇa dores afuf, ikada tuan ḇyedi nari ḇekara faroi. Ma manfamyan ani nari dores afuf, snar Manseren iso ḇepok ḇeḇawesi fa dores afufya.

5Snonkaku ono skara ras ono nefandun syadi ro ras ḇesena, ḇape snonkaku ono ḇese wer skara rasras anna namniskam monda. Iḇye snonkaku oser-oser kyara raris mankundi kakara ḇyena. 6Snonkaku ḇekara ras ono nbefandun syadi, snonkaku ansi skara rarirya faro sikḇesyowi Manseren. Snonkaku ḇeyan famfnom ansya, sifrur rarirya fa sikḇesyowi Manseren, ma sikofen kasumasa faro Allah snar roḇean anna. Rarirya kako faro snonkaku ḇeyan famfnomḇa ansi; snonkaku ansi kako sḇesyowi Manseren ma sikofen kasumasa faro Allah. 7Snonkaku oso ḇaḇeri ro ko, ikenem faro mankundi; ma snonkaku oso ḇaḇeri ro ko ḇemar faro mankundi. 8Rofyor kokenem, kokenem faro Manseren, ma rofyor komar, komar kako faro Manseren. Inja, kankenem roḇa marmarya, Manseren iso ḇenakonya. 9Kristus imar kwar ma ikenem kaḇer wer. Eḇedari ḇye Manseren faro snonkaku ḇekenemsya ma faro snonkaku ḇemar kwarsya kako. 10#2 Kor. 5:10Inja, naek srar! Rosai eḇedari mkoḇuk sasar faro naek srar mkoḇesi ḇena kakyar oser? Ma rosai eḇedari naek srar mkorun naek srar mkoḇesi? Kokam nari kosma mankara ro ḇarpon Allah. 11#Yes. 45:23Snar sfas ro Refo radine,

“Manseren ikofen, kaku ḇeri,

snonkaku oser-oser nari ḇyansuba ro ḇarpon ayedi;

ma snonkaku oser-oser nari kyarem mboi Allah risaya.”

12Inja kokam oser-oser nari kyarem fararur ḇeḇor ḇyena faro Allah.

Wafrur fa naek bedi iḇor awer

14:13-23

13Snar rarirya koḇuk sasaryaye awer. Mboi naek srar koḇesewar insa kofrur awer roi oso, ḇefrur fa naek ḇena kakyar oser isma fafrowes ma isapi ro sasar. 14Snar yaḇeoser kuker Manseren Yesus, inja yakyar kaku roi osoḇaḇeri fa ifrur ayin; ḇape roi ani ifrur ayin faro snonkaku oser-oser rofyor kyara iḇe roi ḇefrur ayin. 15Ḇape rofyor naek wan roi oso ḇefrur fa naek ḇena kakyar oser imsor, rarirya wakenem kuker saswar werḇa. Rofyor Yesus imar kwar snar snonkaku oso, mam monda ḇo imar awer snar roi wan na. 16Inja mam monda awer roi ḇeḇye faro aw, ḇape snonkaku ḇese skara naḇe roi ḇeḇyeḇa. 17Snar ro Allah ḇaḇesasoser ḇyedi, rosai snonkakusya san ma sinem, naiso ḇeḇefandun wer naḇa. Mboi roi ḇeḇefandun kakuya isoine, snonkakusya siso user Allah marisen ḇyedi, fa sisma aski ma marisen ḇeba Allah Rur ḇyedi ḇyuk farosi kwarya. 18Snonkaku ḇeyuffarmyan Yesus rarirya, sifrur sneprei Allah, ma sisma syowi ro snonkaku ḇesesya.

19Rarirya komarisen kokenem ro ḇaḇeoser ma kofarkoryaye ko. 20Ma snar roḇean, nafnai fa naek kwakok awer, rosai Allah ifrur kwar na. Roḇean nakam nasren fa neḇeyan; ḇape rosai wan fa ḇefnai snonkaku ḇese fa sisapi ro sasar, rarirya naek swasar. 21Iḇye syadi wan awer manfnai roḇa winem awer anggur roḇa wafrur rosai wer, rofyor nafrur fa naek oso ḇena kakyar oser ḇyesasar. 22Mboi rosai naek wakyarya, wafruri ro Allah ḇarpon ḇyedi monda faro mankundaw ḇardi. Snonkaku ḇeḇaḇir knam osoḇa fa ḇyesasar faro roi skara ḇekaku, snon ani isma aski. 23Ḇape snonkaku ḇekara ma ḇeḇe ḇirḇar ḇeyan roi oso, ḇape ḇarpurya dan roḇeyan ani, Allah ḇyuk sasar faroi; snar snon ani ifrur mnis kakyar ḇyedi faro Allahḇa. Ma rosairya wer ifrur kuker kakyarḇa, irya syasar.

Currently Selected:

ROMA 14: LAIBHW

Highlight

Copy