ROMA 12

Kankenem faro Allah

12:1-21

1Naek srar! Allah ḇaḇye ḇyedi ibakaku maḇeko. Eḇedari yor kaku ḇeri insa naek srar mkoḇuk mankunmkoḇe farsarser ḇekenem oso ḇardi faro Allah ḇefrur sneprei Allah kada. Ikada ḇaḇeari ḇekakuya. 2Mkoso awer nyan famfnom ro supswan ine. Naek buk mankundaw fa Allah ifrur fa babo wer, insa beḇesadwer. Rarirya naek wafawi Allah marisen ḇyena – isoine rosai ḇeḇye ma ḇefrur sneprei Allah ma ḇemnis.

3Allah ḇyuk fakamaman ḇyedi kwar maḇe aya. Eḇedari yanun naek srar mkokam: Mkoḇaḇir mankunmko mkokaki syadi awer ro roi ḇekakuna. Iḇye syadi naek kwara ma rwun mankundaw; oser-oser kyara mankundi, imnis raris Allah kakyar ḇyuk faroiya. 4#1 Kor. 12:12Baken koḇena nna kina nabor. Kina oser-oser fararur ḇyedi isya ḇardi. 5Rarirya kuker ko kako, kobor rariso wer, ḇape koḇe baken oser snar koḇe oser kuker Kristus. Ma koḇe oser kuker ḇesesya, raris kina ro baken oser. 6#1 Kor. 14:4-11Ko oser-oser nya fakamaman ḇesisye. Fakamaman anna Allah ḇyuk na maḇeko raris saswar ḇyedi. Rarirya kona fakamaman anna. Snonkaku ḇena fakamaman fa ḇeḇaryas Allah wos ḇyena, snonkaku ani ḇyardi ḇararyas ro Allah raris kakyar ismaya. 7Snonkaku ḇena fakamaman fa ḇefnoḇek snonkaku ḇese, snonkaku ani ifnoḇek kaku ḇeri snonkaku ḇese kuker kaku. Snonkaku ḇena fakamaman fa ḇeḇuk farkarkor, iḇyekada ḇyuk farkarkor kuker kaku. 8Snonkaku ḇena fakamaman fa ḇeḇuk wos raryaḇ faro snonkaku ḇese, kaku ḇeri snonkaku ani ḇyuk wos raryaḇ faro snonkaku ḇese. Snonkaku ḇena fakamaman fa ḇeḇuk faro snonkaku ḇese rosai nyana, snonkaku ani ifrur fararur ani kuker snemura kuker napnapes. Snonkaku ḇena fakamaman fa ḇyemanfarkin, kaku ḇeri snonkaku ani ḇyemanfarkin ḇekaku ma ḇemyaren kada. Snonkaku ḇena fakamaman fa ḇefasna saswar faro snonkaku ḇese, snonkaku ani ifrur fararur ani kuker marisen.

9Mkosaswar kuker sne ḇenapes. Mkayin roi ḇeḇarḇor na, ma mkoserepen mko ro roi ḇeḇye. 10Iḇye syadi naek srar mkoswar yae mko oser ḇe oser imnis manbekanaek ro kina oser, ma iḇyekada oser-oser iwarpon min ḇyedi ro ḇaḇearooya. 11Mkofararur kuker mayaryaren. Mkopapum awer. Mkofararur faro Manseren kuker raryaḇ ro Allah Rur ḇyedi. 12Naek srar mkokyar faro Manseren kuker raryaḇ, ma mkokḇaḇ ro ḇaḇekandera, ma mkofarmku ro nadiya. 13Mkofnoḇek mnis ḇaḇefandun ro snonkaku ḇekyar faro Allah ma mkorepen si kuker sne ḇemarisen ro rum mkoḇena.

14 # Mat. 5:44; Luk. 6:28 Mkor faro Allah insa ḇyeḇok snonkaku ḇeḇarḇor faro mkonsya. Mboi, mkor fa Allah ḇyeḇoksi, ma mkofras awersi. 15Mkoryaḇ fnoḇek snonkaku ḇeryaḇsya, ma mkokanes fnoḇek snonkaku ḇekanes. 16#Ams. 3:7Mkokenem kuker ḇaḇeoser rofandu mko. Mkokara awer roi ḇekakibur fawawi mkoḇena, ḇape mkorun mankun mko faro roi ḇekur kankenem ras-ras. Mboi mkokara mkofawi syadi awer!

17Rofyor ono sifrur sasar faro naek srar mkoido, mkomunsu awer na kuker ḇarḇor. Mboi mkofrur rosai snonkakusyakam skara ḇeḇyena. 18Ro ḇar mkoḇedi, mkosewar fa mkokenem kuker aski faro snonkakusya kam. 19#Ul. 32:35 Naek srar yesi! Mkomunsu awer swarapepen mkadu, snar Allah nari ḇeḇuk samamyaiya. Snar ro Refo sfas radine, “Ayaiso nari ḇemunsuya. Ayaiso nari ḇeḇuk samamyaiya, ine Manseren wos ḇyedi.” 20#Ams. 25:21-22Iḇyekada fan mbroḇ besi rofyor sibiser; ma buk aninem farosi, rofyor simbrow. Snar wafrur rarirya, irya wafrur mamyaisi. 21Mkomam monda ḇo ḇarḇorya kyafyo awer mko, mboi iḇyekada naek srar mkokafyo ḇarḇorya kuker ḇaḇyeya.

Currently Selected:

ROMA 12: LAIBHW

Highlight

Copy