GALATIA 5

Kristensya makakei sena

5:1-15

1Baboine komkei, snar Kristus ḇyuk makakei maḇe ko kwar! Inja mkufnako ro ḇaḇemkei mkoḇedi ma mkomarisen fasrir awer kamnam ḇaḇemanfyan ani wer.

2Kaku ḇeri, aya, Paulus, yakofen faro mko: rofyor mkor famkosma sofakfuk ido, Kristus ḇyefainda faro mkoḇa. 3Yakofen wer faro snonkaku mansei ḇeyor faḇesma sofakfuk, insa sifrur sasoser ḇeḇor kam ḇero Refo Yahudi na. 4Ḇaḇeoser mkoḇedi kuker Kristus imuk, rofyor mkokyar ḇaḇenapnapes sasoser Refo Yahudiya; nari mkokenem ro ḇandibur saswar-fakamaman Allahya. 5Snar fafnoḇek Rurya, ma snar kakyarya faro Kristus, kowaf ḇaḇenapnapes, koswarmura roya. 6Snar kuker Kristus, ḇaḇesofakfuk ro baken, nefandunḇa, mboi fararur kakyarya kuker saswar monda.

7Ro ḇeponiwara mkofaḇri naḇye kwar. Baboine mansei ḇedwarek mko wer, isof mkoso napnapesya wer ḇa? 8Dafdif faro mkoso si wer ndama ro Allah ḇeyor mko kwar aniḇa. 9#1 Kor. 5:6Mur kermkun ifrur faterigu amek oser ipisen. 10Snar koḇeoser kuker Manseren, inja yakyar mkosma swaruser ḇesebur swaruser ineḇa. Ḇape manseirya wer kako ḇefrur ḇirḇar mko nari isma samamyaiya, ro Allah.

11Ma aya ine wer, naek srar, rofafisu yaḇaryas kaker sofakfuk ani, ḇyefandun, snaro sewayam aya kaker? Rarirya ido, aprop ani ḇyekarui karkar werḇa. 12Iḇyesyadi ḇefrur ḇirḇar mko ansi skar mankunsi monda!

13Naek srar, mkoḇe ḇeyor kwar famkomkei. Ḇape mkona ḇaḇemkei ani imnis fafisu fa mkoḇuki ifrur marisen kankenem ḇesasar awer, mboi iḇye mkuffarmyan yae mko kuker saswar. 14#Im. 19:18Snar sasoser Refo Yahudi nakam neknam ro wos oser ine, isoine: “Waswar min ḇesi snonkaku ḇese imnis waswar mankundaw!” 15Ḇape rofyor mkarek yae ma mkoren yae mko ido, mko swarepen naḇye, insa mkofarmambri yae awer.

Koso rmomen Rur roḇa rmomen baken

5:16-26

16Kakara yedi radine: mkokenem kuker Rurya kada, nari mkoso kankenem rmomen krafya ḇa. 17#Rm. 7:15-23Snar rmomen krafya fyamfaḇri kuker rmomen Rurya ma rmomen Rurya fyamfaḇri kuker rmomen krafya – snar sukam sufamfaḇriyae – isof ro rarwan ono mkofrur rosai mkomarisen naba. 18Ḇape rofyor Rurya ikfin, mko nari mkokenem ro sasoser Refo Yahudiya ḇa.

19Fararur krafya isna kwar, isoine: farbuk, mamas, rmomen, 20ḇaḇesyom amfyanir, mon, mbroḇ, fadḇan, masasor ro sne, msor, fandun mankun, rakrakrok, rur-makakok, 21ayin, masaser, munara marares, ma ḇese na. Nane kam yaḇuk swarepen faro mko – imnis yaḇuk swarepen ro ḇepon kwar – mboi mansei ḇefrur roi ḇerarirya, nari isma rarwas ro Allah Ḇaḇesasoser ḇyedi ḇa.

22Ḇape rofyor Rurya ikfin ido bon ḇyena isoine: saswar, raryaḇ, aski, ḇaḇekaḇaḇaḇ, ḇaḇenaḇye, ḇaḇeuser, ḇaḇesyowi, 23ḇaḇerandun sne, ḇaḇefarmku mankun. Roi ḇeradine sasoser oso isyaḇa faisampum na. 24Yesus Kristus nya manseirya kwar ido, nari myun kraf kuker nafsu ḇeḇor ma rmomen ḇyena kam. 25Rofyor kokenem kuker Rurya, iḇye wer Rur ani ikfin kankenem koḇena kako, 26inja komararesḇa, kosampumyae ḇa ma kayinyae awer ko.

Currently Selected:

GALATIA 5: LAIBHW

Highlight

Copy