GALATIA 2

Manwawan ansi skarem Paulus

2:1-10

1 # Kis. 11:30, 15:2 Ḇarpur ro wampasi wambarek samfur seser rifiak besyof kwar, aya kuker Barnabas nura ḇe Yerusalem wer ma yun Titus kako. 2Yara snar fasasna oso. Ma yafar farosi Ankankinem Ḇeḇye yaḇaryas faro er-er ḇese ḇeḇe Yahudiḇa – yawawos ḇardi kuker ḇefawisya serer, – insa fararur yafrur ḇepon ma yafrur wer na nefromoḇa. 3Rariryano Titus, ḇewarpu aya ani, ikada snon Yunani rirya, ḇape ḇyeḇedif faifrur sofakfuk ḇyediḇa. 4Mboi kaku naek ḇesararer ono sisya ssun fasis fa sidafdif, isoine ḇesun fasis faḇedwarek ḇaḇemkei koḇedi kosma ro Yesus Kristus, insa kuker nyan ine sewayam ko wer. 5Ḇape fafisu oso ḇaḇeri fa komarisen kosusu ma kokunem farosi insa Ankankinem Ḇeḇye ḇekakuya kyain faswef faro mko.

6 # Ul. 10:17 Ma faro si kokara ḇefawi ansi rariso kankain ḇepon sena, faro aya nefandunḇa, snar Allah myam ḇaḇekaryerḇa – ḇefawi ansi rariso wer kako, nari sedafdifer aya kuker roi oso ḇeseḇa. 7Ḇape rarirya roḇarya, fafisu smam kwar mboi faro aya ssḇuk kakyar kwar ro ḇaḇeḇaryas Ankankinem Ḇeḇye faro kawasa ḇesma ḇaḇesofakfuk ḇasya, imnis raris Petrus faro ḇesma ḇaḇesofakfuksya 8– snar Allah ḇeḇuk kwar samambraḇ mufaḇe Petrus fa ḇyemanwawan faro snonkaku ḇesma sofakfuksya, Allah ani kako ḇyuk kwar samambraḇ maḇe aya faro snonkaku ḇeyaksma sofakfuk ḇaimsya. 9Ma smam saswar-fakamaman ḇeḇuk kwar maḇe aya, inja Yakobus, Kefas ma Yohanes, smam imnis ḇeḇe manfarkin jemaat, sedasi kuker aya ma Barnabas imnis aḇyair ḇaḇeoser, insa nkora mura ḇe snonkaku ḇesma sofakfuk ḇaimsya ma sikada sra faro snonkaku ḇesma sofakfuk kwarsya; 10mboi nkoswarepen kaku snonkaku ḇesaḇararsya ma iso yamarisen yaḇesewar kaku ḇeri fayafrurya.

Paulus fyamfaḇri kuker Petrus

2:11-14

11Rofafisu Kefas ryama ḇe Antiokhia, kuker fababa yasampumi snar ikada syasar. 12Snar snonkaku ono ro ḇar Yakobus srama ḇaim, Petrus danan kuker naek ḇeyaksma sofakfuk ḇaimsya, ḇape srama kwar, isusu ma ḇyinkwanbur si snar imkak kawasa ḇesma sofakfuk kwarsya. 13Ma kawasa Yahudi ḇesesya sifrur ankar kako kuker i, isof Barnabas dakso ankarkar sena kako. 14Ḇape rofyor yamam, mboi kankenem sena namnis kuker Ankankinem Ḇeḇye ḇekakuyaḇa, yakofen bos kaku mufaḇe Kefas ro ḇarpon sena kam: “Rofyor aw, snon Yahudi oso, wakenem imnis korwar ma wakenem imnis Yahudiḇa, rariso nari wadafdif naek ḇeyakso sofakfuk ḇasya fasikenem imnis snonkaku Yahudi?”

Snon Yahudi ma kawasa ḇeḇe Yahudiḇasya sisma koreri snar sikyar faro Yesus

2:15-21

15Koḇe ḇeyaḇen imnis snon Yahudi ma komnis snon ḇesasar ro er-er ḇesesyaḇa. 16#Mzm. 143:2; Rm. 3:20, 22Mkofawi, mboi snonkaku osero ḇaḇeri sbuk napnapes faroi snar ḇyeuser sasoser Refo Yahudiya, ḇape snar kakyar faro Yesus Kristus monda. Eḇedari nko kako nkokyar faro Yesus Kristus kwar, insa nkosma ḇaḇenapnapesya snar kakyar faro Kristus. Mboi snar ḇaḇeuser sasoser Refo Yahudiyaḇa. 17Ḇape rofyor mankun nko ḇardi, nkoḇesewar insa ssḇuk ḇaḇenapnapesya maḇe nko ro Kristus, rofyor ani nkofawi nko snonkaku ḇesasar, rarirya ido roi ḇeradine fyasna inja Kristus duffarmyan sasar na ke? Oroḇaḇeri. 18Ḇape aya ine yafasna mankundaya imnis snon ḇeḇeyuk sasoser Refo Yahudi, rofyor yaḇawes kaḇer rosai yakakok kwar na. 19Ḇape yamar kwar faro sasoser agama anna – inja sasoser anna naiso ḇemun aya – insa yakenem kuker Allah. Spai epen aya ro aprop kuker Kristus kwar; 20rariryano yakenem, ḇape yakenem ro mankundaya ḇa, mboi Kristus ikenem fnoḇek aya. Ma kankenem ayedi yakenem kuker baken ro baboine, irya kankenem ro kakyarya faro Allah Rumkun ḇyedi ḇeswar aya kwar ma ḇyuk mankundi ḇefarsarser maro aya. 21Nari yapampum saswar-fakamaman Allah ḇyena ḇa. Snar rofyor ḇaḇenapnapes isya ro sasoser Refo Yahudi ido, nari Kristus ḇaḇemarmar ḇyedi ḇyefromo monda.

Currently Selected:

GALATIA 2: LAIBHW

Highlight

Copy