FARFYAR RO MANWAWANSYA 11

Petrus ḇyesano kuker Kornelius masisren ḇyedi ro Yerusalem

11:1-18

1Manwawan ansi ma naek srar ro sup Yudea simnaf, er-er ḇese sya saksma kako Allah wos ya. 2Fafisu Petrus ryama kwar ro Yerusalem, kawasa ro rari sofakfuk sfamfaḇri swaruser kukeri. 3Sikofen, ḇo soḇo: “Au ine swun kwar ro rum snonkaku ḇesofuk ḇaim, ma wanan fnoḇek si.” 4Ḇape Petrus fyar asuser farosi roi ḇeḇesya anna kam, doḇo:

5“Aya isya yaḇenadi ro mnu Yope, kniko rur yedi kyanosen kuker samambraḇ Allah ma yamam mamam oso: roi oso kyaf imnis kruḇen ḇeḇam ḇyeḇefes ro dopir rifiak, ikyu ro nanki isof ro ḇarpon ayedi. 6Yaknower i ma yamam ro dori aiwan syoso-syoso ḇeḇewemin rifiak ma ḇerafdi ma ḇeyanawer ma man sya. 7Raimnai yamnaf mkaren ḇekofen ḇeaya: Ne, Petrus, wakḇok ma kwawuk si ḇo wansi! 8Ḇape yakofen: Roḇa Manseren, rariryaḇa, snar roi ḇefor ma ḇemamas naksun ro sbari ḇaim. 9Ḇape ro rarwan ḇeḇesuru ya mkaren ḇeraker nanki ani ikofen wer faro aya: Rosai Manseren fyasren kwar, wapok befornaḇa! 10Mamam ani imbran rarwan rikior, insape ḇyeḇeyer kaḇer ḇe nanki. 11Ro fafisu ya kako snon rikior skores ro ḇarpon rum, inkenef roya; siwan si ker Kaisarea yoḇ aya. 12Ma rurya ikofen faro aya: Rwa wasosi ḇo beḇirḇar awer! Ma naek riwonem skoine skoso aya. Nkosun ro snon ani rum ḇyedi, 13ma fyawar faro inko, rariso myam malaikat oso, dores ro rum ḇyedi ma ikofen faroi: Wawan snon ono ḇe Yope fa ssun Simon sniri kako ḇe Petrus. 14Iso nari ḇeyun ḇaryas faro mko, nari ḇeḇuk aski faro au ma faro kina ḇero rum bedi ḇesiper. 15Ma ro fafisu yarandak yawawos, Rur Ḇesren ya dado faro si, imnis raris dado ḇepon kwar faro ko. 16#Kis. 1:5Inja yaswarepen Manseren ikofen kwar: ‘Yohanes ḇyuk masasi kuker war, ḇape mko nari mkokada mkosma masi sren kuker Rur Ḇesren.’ 17Inja rofyor Allah ḇyuk kwar saswar ḇyedi farosi raris ḇyuk faro ko ro fafisu korandak ko kyar Yesus Kristus, raris si nari yamrer Allah marisen ḇyedi?” 18Ro fafisu simnaf roi ḇeḇesya anna kam, inja sikam siknon, ma sisandik Allah, soḇo: “Inja faro er-er ḇese kako Allah ḇyuk farosi marandor ḇefarkin si faro kankenem ya.”

Barnabas ma Saulus suraḇe Antiokhia

11:19-30

19 # Kis. 8:1-4 Ro fafisu ya naek srar sibor skakek snar marindi ḇekur si rofyor sḇuk samamyai marmar faro Stefanus kwar. Sibur skakek isof ro Fenisia, Siprus ma Antiokhia; fama sḇaryas Ankankinem Ḇeḇye ya monda faro snonkaku Yahudisya serer. 20Mboi ro fandusi snonkaku Siprus ma Kirene ono ḇerama ro Antiokhia ma ḇewawos kako faro snonkaku Yunani ma ḇeḇaryas Ankankinem Ḇeḇye, isoine Yesus irya Manseren. 21Ma Manseren ifnoḇek si inja snonkaku sibor kaku sikyar ma skaḇer faro Manseren.

22Rarirya sḇesno faro jemaat Yerusalem, inja jemaat ani siwan Barnabas ḇe Antiokhia. 23Rofyor Barnabas ryama kwar ma myam saswar ma fakamaman Allah, imarisen naba kaku. Ḇyuk swarepen farosi insa skain nadworen faro Manseren, 24snar Barnabas snonkaku ḇepyum, ḇefo kuker Rur Ḇesren ma ḇekyar. Dun snonkaku sibor faro Manseren.

25Raimnai Barnabas ryaḇe Tarsus fa syewar Saulus; ma isrowi kwar, duni ḇe Antiokhia. 26Sukain kuker jemaat ani ḇewampasi wambarek oser, ma suḇuk farkarkor faro kawasa sibor. Ro Antiokhia manfamyan ansi sap randak siḇe Kristen.

27Rofyor ani nabi ono srama ker Yerusalem ḇe Antiokhia. 28#Kis. 21:10Snonkaku oso ro si ḇenir Agabus iyori ma kuker papoik Rur Ḇesren ikofen, nari andoḇa ḇebayo myun supswan ḇesiper. Roi ḇeḇesya ani myun kako ro fafisu Klaudius. 29Inja kawasa Kristen ansi sawfa siryur fafnoḇek ono raris oser-oser mankundi samambraḇ ḇyedi ma sfarem na faro naek srar ḇekain ro Yudea si. 30Inja sifrur rarirya kako ma sfarem nafa Barnabas ma Saulus suyun na faro penatua-penatua sya.

Currently Selected:

FARFYAR RO MANWAWANSYA 11: LAIBHW

Highlight

Copy