2 KORINTUS 12

Allah ḇyuk fasasna ma mamam ono faro Paulus

12:1-10

1Kakuḇaḇoi fainda oso ro masasikyaḇa. Ḇape yamarisen yaḇaryas kako Allah rosai ḇyuk maḇe aya ro fasasna ma mamam oso. 2Ro wampasi wambarek samfur seser rifiak ḇesyonde yamam snon Kristen oso ḇyeḇekanow ḇesyos ḇeḇekior ro Firdaus (Yafawiḇa baken ḇyedi ḇyeḇekanow kaku roḇa ine mamam oso monda – Allah i ḇefawi mondaya). 3-4Yakofen ḇeosero wer yafawi mboi snon ine ḇyeḇekanow ḇe Firdaus (Yafawiḇa baken ḇyedi ḇyeḇekanow kaku roḇa ine mamam oso monda – Allah i ḇefawi mondaya). Rodiwa snon ani imnaf roi ono snonkakusya sifawi skara naba ma ssḇuk fa snonkakusya sawos naba. 5Snonkaku ani iso eḇedari yamarisen yamsikya, mboi mankundayaḇa. Faro mankundaya, yawos monda roi ḇeḇor ḇekur samambraḇ ḇa ayena, iso eḇedari yamarisen yamsikya. 6Imnis raris yamarisen yamsik ro roi oso kako, ḇape yamewer yaḇe mandawri; mboi nari yakofen roi ḇenapes. Ḇape yafarmkuser aya, snar yamewer snonkaku ono skara ayaḇe ḇesyadi ro rosai smam yafrur kwar roḇa rosai simnaf yakofen kwar.

7Ḇape insa yamarares mankenem awer snar mamam ḇefrur kanandor anna inja skuk baken ayedi kuker borek oso imnis malaikat Ibirisya ḇyaserpum aya. Dafduf ani ḇyeḇeḇuk faiprer aya insa yamararesḇa. 8Yaḇenadi ḇerarwan rikior faro Manseren ro dafduf ani. Yor fa Manseren imarisen ido ikanow dafduf anibur aya. 9Ḇape Manseren kyarem, “Yaswar aw inja imnis mufa ḇeaw; snar papoik ayena nsambraḇ syadi rofyor awsya rwoi samambraḇ ḇaya.” Iso eḇedari yamarisen yamsik ro samambraḇ ḇayena, snar rofyor yasambraḇ ḇa, rofafisu ani yaḇaḇir Kristus samambraḇ ḇyedi fyadiren aya. 10Inja yaryaḇ kako kuker samambraḇ ḇa ayena. Yaryaḇ rofyor sonef aya, rofyor yasma kandera, rofyor siyawyaw aya ma rofyor yasma kandera snar Kristus. Snar rofyor yasambraḇ ḇa, rofafisu ani yapok kaku.

Paulus imames warek kawasa Korintus

12:11-21

11Kaku ḇeri yafrur imnis snonkaku ḇefawi royoḇa – ḇape naek srar mkoiso ḇefrur fa yararirya. Inja yafawi mkoiso ḇesandik aya. Mboi yaḇe maejaḇa rariso wer, nari yakafyoḇa faro manwawan ḇebasyadi mkoḇesi! 12Aḇyair-aḇyair kanandor ma papoik yafasna ro fararur ḇeba kuker kabaḇaḇ mufaḇe naek srar fa nfasna aya ine manwawan oso. 13Ma rosaiso nkomam mankunba ro mko, rofyor nkoḇuk kakara kuker kawasa Kristen ḇese? Mboi roi oser monda isoine: Yafrur kandera faro naek srar mkoḇa famkoḇak warek aya. Mkoḇuk maaf ro sasar aninekada.

14Baboine yafasos ḇerarwan ḇeḇekiorya fa yara kaki mko. Ma yamewer yafrur kandera mko, snar roi yamarisenya arasa mkoḇenaḇa, mboi mankun mko. Snar romawa siso ḇesewar arasa faro sinan sesiḇa, ḇape sinan ansiso ḇesewar arasa faro romawa sesya. 15Snar naek srar mkoi eḇedari kuker sne ḇeryaḇ yamarisen fayaḇuk roi ḇeḇor kam, mboi isof yamarisen yaḇuk mankundaya kako faro naek srar mko. Rofyor yaswar mko rarirya, rosai eḇedari naek srar mkoswar mankun ayaḇa?

16Inja, naek srar mkokofen mankundaya yafrur kandera mkoḇa. Ḇape ono sisya sikofen aya ine yafawi yasararer; inja yasma ḇaḇefainda ro naek srar mko snar kakara sararer ayena. 17Rariryaḇa! Inja ḇaḇefainda rosai yasma ro naek srar ro snonkaku yawan faro mkonsya? 18Yawan Titus ma naek Kristen ḇese ansi kwar fa srakaki mko. Inja Titus dun ḇaḇefainda ono ro mkoke? Ḇape Titus ma aya nufararur kam kuker rur ḇemamnis ma nuso wewur oser!

19Inja mkokara mkoḇo fafisu ine nuḇesewar fa nuḇesano warek nu faro mkoke? Roḇaḇeri! Naek srar nuswar kaku, Allah ifawi roi nkokofen anna kam kada namnis Kristus marisen ḇyedi. Ma roi ḇeḇor nkofrur annakada nkoḇukḇawes kankenem rur ro naek srar. 20Yamames warek imbude rofafisu yarakaki naek srar, nari yasrow naek srar mko imnis moḇ yakyar rayaḇari, ma naek srar kako nari mkosrow aya imnis moḇ mkokyar rayaḇari. Imḇude kosrow ko kuker rakrakrok, sasurem, dosam, rmomen arasa, anonefyae, sikofenyae, marares ma anunḇesisye. 21Yamkak warek imbude Allah ayedi ryun aya wer ro ḇarpon naek srar rofafisu yaramufa ḇemko. Yamames warek kako roḇepon iwara naek srar ono ḇefrur sasar kwar, nari sifrur fayakanes snar simbror baim ma simnaiba ro sifrur farbuk, roi bemamas ma roi ḇemnisḇa.

Currently Selected:

2 KORINTUS 12: LAIBHW

Highlight

Copy