TITUS 1
1
1Anaku Titus! Nahu, la Paulus matunti sura ake kai ada Ruma Hatalla ro rasu Isa Al Masih. Nahu rakad̄ale ro rakau lao d̄imabantuna dou-dou rakad̄ale b̄a Ruma Hatalla loakud̄u mandad̄i tenggo d̄i ade imbikai siad̄oho. Nahu rau pab̄uaku d̄ende ra wa'ana siad̄oho loakud̄u patana ngoa ra tei ma poda ratei b̄a agama ndaita. 2Ngoa ra tei ede kai dasa rane'eta b̄a one ndaita d̄imatarima mori masapodakaina ro ma'ederahid̄i. Ruma Hatalla wa'ura sakena mori ede sawatipu b̄a saramba jamana – ro Ruma Hatalla wati d̄imanuntu cowa. 3D̄i wakatu ma ncihi ncao, Ruma Hatalla d̄imakatadana rasakena ede d̄i ade rangoa-Na. Rangoana ede wa'ura imbikaina d̄i nahu, ro nahu mangoa ra kahabana kai rakaukai b̄a Ruma Hatalla makasalamana ndaita.
4 #
2Kor. 8:23, Gal. 2:3, 2Tim. 4:10 Titus, nggomi eded̄u poda-poda ana nahu, b̄ara nggomi ro nahu sama-sama wa'ura imbi d̄i Al Masih.
Ne'e poda b̄a nahu raho-raho to'impa Ruma Hatalla Ama ndaita ro Ruma Isa Al Masih Sangaji Mambei salama ndai, mambei bareka ro taho ra ntai d̄i nggomi.
Karawi la Titus d̄i Kreta
5Nahu tu'u wi'iku nggomi d̄i Kreta loakud̄u nggomi kanggori katahomu lampa rawi-lampa rawi ma mbuipu paralu d̄i'ato. Ro loakud̄u nggomi hanta raumu dou-dou d̄imana'ekaina ela Ruma d̄i sanikina kota. Ro kawarapu d̄i ngoa ra tei-ngoa ra tei b̄a nahu ake: 6#1Tim. 3:2-7 Sab̄ua dou mana'ekai ela Ruma pab̄uaku dou ma wati wara ma'ihana; sia pab̄uaku ntauna wei sab̄uampa, ana-anana pab̄uaku wa'ura imbi d̄i Al Masih ro laina d̄ib̄ade b̄a dou kai ana mataki rewo ro ma wati wa'u d̄i ngoa ra tei. 7Dou mana'ekai ela Ruma eded̄u dou ma uru wea karawi Ruma Hatalla, sia wati loana wara ma'iha. Sia wati loana sombo atao ca'u mbani, atao maca'u nono d̄i mawukai, atao maca'u ncao, atao mana'e ade d̄i piti. 8Sia pab̄uaku ca'una tarima dou d̄i'umana, ca'u d̄i lampa rawi-lampa rawi ma taho, mawa'u pi'i ade, rombo ra ntiri, raso ro mori ra wokona mataho. 9Sia pab̄uaku nenti kaciana d̄i ngoa ra tei ma loa d̄i'imbi, b̄une rawa'u ngoa ra tei d̄i sia. Kai ndedena sia nawa'uku ngoa ra tei kataho dou kai dasa ngoa ra tei mapoda, ro katadana rawi ncara dou-dou ma aona.
10B̄ara mboto dou ma ca'u baronta, mapenti poda dou-dou ma akana ma'agama Yahudi; siad̄oho tipuna dou makalai kai nuntu lab̄o nggahi cowa siad̄oho. 11Dou-dou mab̄une ede pab̄uaku d̄ikapu wea asanab̄ara siad̄oho kakacona mboto kaluarga kai ngoa ra tei-ngoa ra tei ma dancihi ncao. Siad̄oho karawikaina ede b̄ara ne'ena ngupa laba ma wati ncihi ncaompa. 12Parana sab̄ua nabi ndai siad̄oho, ma rad̄i Kreta rau, manggahi, ”Dou-dou Kreta naca'u nuntu cowa, ro b̄une binata manggange ma na'e ngaha ro d̄aju.” 13Au ranggahi b̄a nabi ede napodaku. B̄ara ndedena nggomi pab̄uapu rojo kapoda d̄i siad̄oho; loakud̄u siad̄oho ngge'empa nentina d̄i ngoa ra tei ma poda 14ro wati walira nentina d̄i mpama-mpama Yahudi atao atora-atora randawi b̄a dou-dou ma tula d̄i ngoa ra tei ma poda ede. 15Samenana mawara eded̄u raso d̄iru'u b̄a dou-dou ma raso. Pala d̄iru'u b̄a dou-dou ma ntau kananu masampu ro ma wati ntau imbi, wati kone wara au-au ma raso, b̄ara kananu ro ade mpida siad̄oho wa'ura sampu! 16Nggahi siad̄oho b̄a one siad̄oho napataku Ruma Hatalla, sapodakaina ruku ra rawi siad̄oho makawatina. Siad̄oho d̄i ni'ikai ade, ro siad̄oho wati ngawana to'a; siad̄oho eded̄u dou-dou ma wati wa'u karawi au-au ma taho.
Currently Selected:
TITUS 1: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
