ROMA 2
2
Hukuma Ruma Hatalla
1 #
Mat. 7:1, Luk. 6:37 B̄ara ndedena, Cina ra angi, cousi nggomid̄oho d̄i ne'ekaimu kancara dou makalai? Nggomid̄oho wati ntaumu au-au d̄i horukaimu weki! B̄ara nggara makancarasi dou makalai, sapodakaina ndai nggomid̄oho makarawiku rawi ma sama b̄une siad̄oho, ndad̄i nggomid̄oho mab̄ab̄ukaiku hukuma d̄i weki ndai raumu. 2Ndai tab̄adeku b̄a one nggara Ruma Hatalla nab̄ab̄ukaisi hukuma d̄i dou-dou ma karawi ruku ra rawi b̄une ede, kaputusa Ruma Hatalla ede ncihi. 3Pala nggomid̄oho, cina ra angi, makarawi b̄a ndai raumu lampa rawi rab̄ab̄u ra lo'okai b̄a nggomid̄oho d̄i dou-dou makalai! Kai kananu b̄a nggomid̄oho ma loa hori weki d̄i hukuma b̄a Ruma Hatalla? 4Atao nggomid̄oho ma wi'ikaimpa mod̄ana ncera ra mbura ade Ruma Hatalla ro saba ro lembo ade Ruma Hatalla ma ndede na'e? Pasti b̄ade b̄a nggomid̄oho b̄a one Ruma Hatalla naturu teiku taho ade-Na b̄ara ne'e b̄a Sia loakud̄u nggomid̄oho tobamu rad̄i dosa-dosamu. 5Pala nggomid̄oho tera tutamu ro wati ne'emu rungka rawimu. B̄ara ndedena ndai nggomid̄oho ma ndawi hukuma d̄i ru'u ndaimu ndad̄i tamba tani d̄i Ainaina Kiama, Ruma Hatalla nakatadasi mbani-Na ro nab̄ab̄ukaiku hukuma ma adi. 6#Mzm. 62:13, Ams. 24:12 B̄ara Ruma Hatalla d̄imacolana d̄i sanikina dou mancihi ncao lab̄o rawina. 7Ruma Hatalla mambei mori masapodakaina ro ma'ederahid̄i d̄i siad̄oho ma caha karawi mataho d̄i rakakaina ma d̄ese ra ntasa, ro lia ra horoma ro ma'ederahid̄i. 8Pala dou-dou ma kapenti ru'u ndaina ro wati ne'ena to'a d̄i Ruma Hatalla, malaisi nab̄atuku ma dab̄ae, dou-dou ede d̄i mbani podakai b̄a Ruma Hatalla. 9Sanikina dou ma ca'u karawi madab̄ae d̄imancoki ro susa ra darura; saramba-rambakaina dou Yahudi, ro bangsa-bangsa makalai rau. 10Pala samenana dou ma ca'u karawi mataho d̄i mbei d̄ese ra ntasa ro d̄i lia ra horoma ro taho ra ntai b̄a Ruma Hatalla; saramba-rambakaina dou Yahudi, ndede rau d̄iru'u b̄a bangsa-bangsa makalai. 11#Ul. 10:17 B̄ara Ruma Hatalla wati ntanda kalaina d̄i samenana dou.
12Dou-dou bangsa makali madosa wati b̄adena hukum Taurat. Ndad̄i siad̄oho d̄ihukum ari mai b̄a hukum ede. Pala dou-dou Yahudi wa'ura dosa sawa'u b̄a b̄adena hukum ede; b̄ara ndedena siad̄oho d̄i tuntu rau kai dasa hukum ede. 13B̄ara dou taho mbalina lab̄o Ruma Hatalla, laina b̄ara dou ede wa'ura b̄adena Hukum Taurat, malaisi b̄ara karawi b̄a sia au ratunti ade hukum ede. 14Dou-dou bangsa makalai wati patana Hukum Taurat. Pala siad̄oho nggara kai ne'esi b̄a ndaina karawi au raparentakai b̄a hukum ede, ade ndai siad̄oho ramandad̄i hukum ru'u b̄a siad̄oho, konena wati pata b̄a siad̄oho Hukum Taurat. 15Ruku ra rawi siad̄oho naturuteiku b̄a one au raparentakai b̄a hukum ede ratunti d̄ei ade siad̄oho. Ade mpida siad̄oho rau mabukutina lampa rawi ede, b̄ara ndai siad̄oho wara rau kancarana ro wara rau kancihina b̄a fiki ra kananu siad̄oho. 16Ndedeku d̄imandad̄i peade d̄i ainaina rawa'u katantukai ede. D̄i'ainaina ede – b̄une ranggahi Haba Mataho rangoa ra kahaba b̄a nahu – Ruma Hatalla kai ncai Ruma Isa Al Masih, d̄imaparesa ncihi ra ncarad̄i samenana rahasia ade ro fiki ra kananu samenana dou.
Dou Yahudi ro hukum Taurat
17Pala ake b̄uneku lab̄o ndai nggomid̄oho? Nggomid̄oho makanahu weki dou Yahudi. Nggomid̄oho mawi'i weki d̄i hukum Taurat ro nggomid̄oho ma banggakaiku b̄a hubungamu lab̄o Ruma Hatalla. 18Nggomid̄oho marakaku ngoa ra tei kataho rad̄i hukum ede, ndad̄ina nggomid̄oho mab̄adeku kane'e Ruma Hatalla ro mab̄adeku katantu b̄e ma taho. 19Nggomid̄oho ma'imbi podaku b̄ara nggomid̄oho eded̄u dou mana'ekai dou-dou mambuda ro taroa d̄iru'u b̄a siad̄oho ma wara d̄i ade marindi; 20Nggomid̄oho eded̄u dou mangoa ra tei kataho dou-dou masampula. Nggomid̄oho ma'imbiku b̄a one d̄i ade Hukum Taurat, nggomid̄oho mantau sara'a loa ra tingi ro ngoa ra tei ma poda. 21Nggomid̄oho mateiku dou makalai; b̄ab̄auku nggomid̄oho wati ngoa ra teimu weki ndaimu? Nggomid̄oho mangoa ra teiku dou aina mpanga, sapodakaina ndai nggomid̄oho mampanga! 22Nggomid̄oho mangoa ra teiku dou aina jina, sapodakaina nggomid̄oho majina! Nggomid̄oho wati ca'umu eda berhala, sapodakaina ndai nggomid̄oho mawehaku barang-barang d̄i ade uma-uma berhala. 23Nggomid̄oho makabangga-banggaku wekimu b̄a one ntaumu Hukum Taurat, sapodakaina nggomid̄oho makatuna ra kab̄awaku Ruma Hatalla kai wati b̄atumu hukum Allah. 24#Yes. 52:5 D̄i ade Alkitab ratunti ndake, ”B̄ara nggomi, dou-dou Yahudi, ndad̄i ngara Ruma Hatalla d̄i nuntu ka'iha d̄i ade woha bangsa-bangsa makalai.”
25Nggara nggomid̄oho mato'asi d̄i hukum Taurat, ndad̄i suna nggomid̄oho wara one rauna. Pala nggara nggomid̄oho watisi loamu kalampa lampa rawi-lampa rawi rakaukai d̄i ade hukum ede, ndad̄i suna nggomid̄oho wati ntauna one. 26Nggara sab̄ua dou laina dou Yahudi ma wati rasuna b̄atuna Hukum Taurat, sab̄ua laina Ruma Hatalla mawi'ikaina dou ma wa'ura suna? 27Ro dou-dou rawati suna ede d̄imakancarana nggomid̄oho dou Yahudi, b̄ara nggomid̄oho mantau Hukum Taurat ro nggomid̄oho rasuna, pala nggomid̄oho masapaku hukum ede. Siad̄oho wati rasuna, pala siad̄ohoku mato'a kalampa hukum Taurat. 28B̄ara dou Yahudi ma sapodakaina laina dou cuma ngara mpoana dou Yahudi; ro dou mapoda-poda rasuna laina dou rasuna sacara sarumbu mpoana. 29#Ul. 30:6 Pala, dou Yahudi mapoda-poda eded̄u dou ma ade ra nawana Yahudi; ro suna mapoda-poda eded̄u suna d̄i adena rakarawi b̄a Roh Allah, laina ratunti ade buku. Dou b̄une ede natarimaku roi b̄a Ruma Hatalla, laina rad̄i manusia.
@LAI 2001