KOLOSE 2
2
1Ne'e b̄a nahu nggomid̄oho b̄ademu b̄uneku hebana nahu usaha kapodaku ade ru'umu ro d̄i ru'u siad̄oho d̄i Laodikia ro sara'a dou-dou ma wati pata nahu sacara weki. 2Sara'ana ake karawikai b̄a nahu loakud̄u ade siad̄oho ndad̄i tenggo ro siad̄oho cua meci ra ca'u angi ndad̄ina siad̄oho rapu ndad̄i sab̄ua weki. Ade ndedekaina siad̄oho poda-poda loa ka'ao ro imbi poda ro pata rahasia Ruma Hatalla, eded̄u ndai Al Masih. 3Al Masih ma rahenggana samenana timba ra lemba ro loa ra tingi Ruma Hatalla ma ili weki ntoina.
4Nahu ngoakaiku ake loakud̄u nggomid̄oho aina tipu b̄a cou-cou rau, ma maci asa d̄i nggomid̄oho. 5Konena nahu d̄o'o lab̄o nggomid̄oho, wi'ikaipu nahu wara d̄i woha nggomid̄oho. Ro nahu neo adeku edaku nggomid̄oho sab̄ua ade ro tenggo imbimu d̄i Al Masih.
Mori ra woko masampuruna
6Cina ra angi wa'ura tarimamu Isa Al Masih kai Ruma kaina. B̄ara ndedena pab̄uapu nggomid̄oho mori sab̄ua lab̄o Sia, 7ro tenggo ra walemu ramaina rad̄i Sia. Pab̄uapu nggomid̄oho tu'umu morimu d̄i Al Masih kai dasana. Pab̄uapu nggomid̄oho naha imbi d̄i Al Masih, b̄atu b̄une au rawa'u teikai d̄i nggomid̄oho. Ro pab̄uapu ademu kapoda-poda kai renta tarima kasi.
8Pab̄uapu nggomid̄oho aina kabare, aina sampe warakaina ma godana nggomid̄oho kai ngoa ra tei rad̄i manusia ma wati wara onena, malaisi nakasantudampa. Nggahi ra eli ede laina rad̄i Al Masih, malaisi ranggahi manusiampa ro rad̄i roh-roh makuasakai dunia. 9B̄ara samenana tabe'a Ruma Hatalla nangge'e d̄i Al Masih, eded̄u d̄i ade ka'ada'an manusia kai-Na. 10Ro b̄ara mori sab̄ua lab̄o Al Masih, nggomid̄oho rau d̄i mbei mori masapodakaina. B̄ara Al Masih eded̄u mana'ekaina d̄i sanikina roh ma ntau kuasa ro ma parenta.
11B̄ara kasab̄ua weki lab̄o Al Masih, nggomid̄oho wa'ura suna, laina suna rakarawi b̄a manusia, malaisi kai suna, rakarawi b̄a Al Masih, marahori kalosa nggomid̄oho rad̄i kuasa tabe'a ma dosa. 12#Rm. 6:4 B̄ara aipu wakatu nggomid̄oho kasab̄ua lab̄o Al Masih, nggomid̄oho ra'umbu sama-sama lab̄o Al Masih; ro kai kandeu karaso ede rau, nggomid̄oho b̄atu kamori mbali sama-sama lab̄o Al Masih b̄ara nggomid̄oho imbimu d̄i kuasa Ruma Hatalla ma wa'ura kamori mbali Al Masih rad̄i madena. 13#Ef. 2:1-5 Ntoina, nggomid̄oho wa'ura made sacara ade maraso b̄ara nggomid̄oho madosa, ro b̄ara nggomid̄oho watira suna kai sarumbu. Pala ake Ruma Hatalla kamori mbalina nggomid̄oho sama-sama lab̄o Al Masih. Ruma Hatalla wa'ura kangampu wea samenana dosa ndaita, 14#Ef. 2:15 ro furana sura nconggo d̄i ndaita, ma kadahuna ndaita kai sara-sara ma tani. Kai salibna sura ede d̄i haju salib, Ruma Hatalla kamborana sara'a lo'o ra b̄ab̄u d̄i ru'u ndaita. 15D̄i salib ede Al Masih kandad̄ina samenana roh-roh ma parenta ro makuasa ndad̄i watid̄u wa'u walina. Siad̄oho kandad̄ikai d̄i ntanda b̄a dou mamboto d̄i wakatu Al Masih mawa'ana siad̄oho kai dou rataha ade pawe ngolukai-Na.
16 #
Rm. 14:1-6
B̄ara ndedena aina co'omu dou kancarana nggomid̄oho mab̄oha ngaha atao nono, ro mab̄oha ainaina-ainaina aruraja agama, atao kandiha-ndiha wura b̄ou, atao mab̄oha ainaina Sabat. 17Samenana ede cuma ninumpa rad̄i lampa rawi d̄imamai, pala matada rad̄i lampa rawi ede eded̄u Al Masih! 18Aina nggomid̄oho co'omu wekimu d̄i karugi b̄a dou ma coro-coro ka'awa weki ro ma nemba mala'eka-mala'eka. Dou ede nasombo kai fiki ra kananuna ma b̄atu dunia ro nakabanggaku weki ra'eda madana rakarongga b̄a Ruma malai ndaina, 19#Ef. 4:16 ndad̄ina watid̄u nenti walina d̄i Al Masih ma ndad̄i mana'ekaina. D̄i ade parentakai b̄a Al Masih, sara'a sarumbu rajaga kataho lab̄o rakasab̄ua b̄a puru-puruna, ro woko b̄atu kane'e Ruma Hatalla.
Made ro mori sama-sama lab̄o Al Masih
20Nggomid̄oho wa'ura made sama-sama lab̄o Al Masih, ro wa'ura hori kalosa wea rad̄i roh-roh ma kuasakai isi dunia ake. B̄ab̄auku nggomid̄oho morikaimu b̄une dou ma mbuipu kuasakai b̄a dunia ake? B̄ab̄auku nggomid̄oho b̄atukaimu d̄i atora-atora b̄une ake. 21”Aina d̄amamu ake”, ”Aina tab̄aimu ede”, ”Aina tudumu ake”? 22Samenana atora ede eded̄u mab̄oha lampa rawi ma ndede d̄i kani watid̄u wara one walina. Ede cuma atora-atora ro ngoa ra tei randawi b̄a manusia. 23Poda romo lampa rawi ede naloa timba ra lemba, kai parentana loakud̄u dou manemba mala'eka, ka'awa weki lab̄o kancoki weki; pala samenana ede wati wara onena d̄imatapana nawasu manusia.
Currently Selected:
KOLOSE 2: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
