1 TESALONIKA 5
5
Sadiapu d̄imaikai Ruma
1Cina ra angi, wati paraluna nami matunti d̄i nggomid̄oho b̄une aiku wakatuna ma pasti lampa rawi ede d̄i ndad̄ikaina. 2#Mat. 24:43, Luk. 12:39, 2Ptr. 3:10 B̄ara ndai nggomid̄oho mab̄ade podaku b̄a one Ainaina maikai Ruma ede d̄imamai b̄une dou mamai mpanga d̄i aimangad̄i. 3Nanggahisi b̄a dou, ”Sara'ana wati wara ngango ro taho-tahompa,” ndad̄i wakatu edeku wed̄i lalompa siad̄oho d̄imab̄oha b̄a iha leli, ro wati kone sab̄ua dou d̄imasalama. Lampa rawi ede d̄imandad̄i sadeka, b̄une iu pili nggana mab̄oa dou siwe ma ne'e nggana. 4Pala nggomid̄oho laina dou ma mori d̄i ade rindikaina, ndad̄ina ainaina ede nakawed̄iku nggomid̄oho b̄une mai dou mampanga. 5Nggomid̄oho sara'ana eded̄u dou ma mori d̄i ade taroakaina; nggomid̄oho lu'u d̄i ade golonga aimarai ma taroa. Ndai laina dou ma mori d̄i ade rindikaina, atao ma lu'u d̄i ade golonga aimangad̄i ma rindi. 6B̄ara ndedena ndai wati loata maru-maru mpoa b̄une dou makalai. Ndai pab̄uaku jaga-jaga ro fiki ra kananu ndai pab̄uaku taroana. 7D̄i aimangad̄i dou namaru, ro d̄i aimangad̄i rau dou nandad̄i mawu. 8#Yes. 59:17, Ef. 6:13-17 Pala ndai ake dou-dou ma lu'ukai d̄i ade golonga aimarai ma taroa; b̄ara ndedena fiki ra kananu ndai pab̄uaku taroana. Ndai pab̄uaku imbi ncau d̄i Ruma ro meci ra ca'u dou-dou makalai lab̄o imbi poda b̄a one Ruma Hatalla d̄imakasalama ndaita. Edeku d̄aha d̄imahoruna ndai d̄i ade lewa ra laka d̄i aokai lab̄o marindina. 9Ruma Hatalla kad̄alena ndai laina d̄i hukumna, pala d̄i kasalamana kai ncai Ruma ndai Isa Al Masih. 10Sia madena d̄i ru'u b̄a ndaita loakud̄u wakatu mai kai Sia peade – nataho ndai mbuipu mori, ro nataho ndai wa'ura made – ndai taloaku mori sama lab̄o Sia. 11B̄ara ndedena, pab̄uapu nggomid̄oho rundu kali cempe angi ro cua-cua katenggo angi, sama b̄une ma wunga karawi b̄a nggomid̄oho ake.
Ngoa ra tei-ngoa ra tei cumpukaina ro salam
12Cina ra angi, nami maraho poda-podamu loakud̄u nggomid̄oho kaco'imu d̄i dou-dou ma karawi d̄i woha nggomid̄oho; eded̄u siad̄oho rawa'u kad̄ale b̄a Ruma d̄imana'ekaina ro d̄imangoa ra tei kataho nggomid̄oho. 13Karawipu d̄i siad̄oho kai lia ra horoma podapu lab̄o kai meci ra ca'u b̄ara kawaramu au rakarawi b̄a siad̄oho. Mori ncaupu kai mataho.
14Nami maraho rau, cina ra angi, rojo katahopu dou ma wati ngawa karawi; kaupu kalembo ade d̄i dou ma dahu; bantupu dou ma paralu d̄i bantu ro sabakaipu d̄i sara'ana dou. 15Jagapu loakud̄u aina wara ma cepe rawi ma'iha kai rawi ma'iha wali. Usaha ncaupu d̄i karawikaimu mataho, sab̄ua d̄isab̄ua dou ro d̄i samenana dou.
16Pab̄uapu nggomid̄oho neo ade ncau, 17ro do'a ntuwupu. 18D̄i ade sara'a ka'ada'ana pab̄uapu nggomid̄oho syuku, b̄ara edeku d̄i ne'e b̄a Ruma Hatalla rad̄i nggomid̄oho kai dou ma mori sab̄ua lab̄o Ruma Isa Al Masih.
19Aina tapamu Roh Allah. 20Aina wi'ikaimu mod̄ana haba-haba rambei b̄a Roh Allah. 21Samenana au-au pab̄uaku d̄i uji, ro ma taho pab̄uaku d̄i b̄atu. 22Kad̄o'o lab̄opu samenana lampa rawi madab̄ae.
23Raho-raho to'impa ndai Ruma Hatalla ma mbeina ndai taho ra ntai, kandad̄ina nggomid̄oho dou-dou ma poda-poda mori d̄i ru'u Ruma Hatalla mpoampa. Raho-raho to'impa Ruma Hatalla majaga weki ndaimu sara'ana, nataho roh, nawa ro sarumbumu, ndad̄ina wati wara ma'iha d̄i wakatu Ruma ndaita Isa Al Masih mai mbalina. 24Ruma Hatalla, ma wa'ura ou nggomid̄oho, d̄imakarawina lampa rawi ede b̄ara Sia nato'a.
25Do'a weapu d̄i ru'u b̄a nami, cina ra angi!
26Cua mbeipu salam kai meci poda angimu kai sa'e ra ari ela Al Masih.
27Kai kuasa Ruma, nahu maraho poda-podamu loakud̄u nggomid̄oho bacamu sura ake d̄i sara'ana cina ra angi ma sama-sama imbi.
28Raho-raho to'impa Ruma ndaita Isa Al Masih mambei anugera d̄i nggomid̄oho.
Salam do'a nami, Paulus
Currently Selected:
1 TESALONIKA 5: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
