1 KORINTUS 16
16
Sumbanga ru'u bantukai sama-sama ela Al Masih
1 #
Rm. 15:25-26
Ake mab̄oha piti d̄i ne'e b̄a nggomid̄oho bantukai sama dou ela Al Masih, kau b̄a nahu loakud̄u nggomid̄oho karawimu b̄une rakaukai ngoa b̄a nahu d̄i ru'u ela-ela Ruma d̄i Galatia. 2D̄i ainaina saramba sanikina minggu, pab̄uapu nggomid̄oho wi'i kalaimu piti, cua-cua mancihi ncao lab̄o arujiki ndaina. Wi'ipu piti ede sampe mai nahu, loakud̄u wunga wakatu ede wati paralu walina kab̄oro. 3Pea wa'usi rongga nahu, nahu d̄imanggadu dou-dou rawa'u ngawakai b̄a nggomid̄oho. Nahu d̄imambei siad̄oho sura ma'otona, loakud̄u siad̄oho wa'ana piti sumbanga ede aka Yerusalem, 4ro nggara natahosi b̄a one nahu d̄imalao rau lab̄o siad̄oho, ndad̄i nahu d̄imalao sama lab̄o siad̄oho.
Nia la Paulus
5 #
Kis. 19:21
Nahu d̄imamai lamba nggomid̄oho sawa'u b̄a kalaloku Makedonia, b̄ara nahu niaku lampa sai ta aka. 6Loa ndad̄i nahu ngge'e sama lab̄o nggomid̄oho samporo, kombi santoi oru b̄usi. Sawa'u b̄a ede nggomid̄oho maloa bantu nahu lampa lao waliku aka hid̄i makentona. 7Nahu wati ne'eku mai lamba nggomid̄oho cuma saimpa. Nggara kane'esi b̄a Ruma, nahu kane'e ngge'e ntoi nari lab̄o nggomid̄oho.
8 #
Im. 23:15-21, Ul. 16:9-11 #Kis. 19:8-10 Wunga ede nahu d̄imangge'e d̄i kota ake, d̄i Efesus, sampe ainaina Pentakosta. 9Mboto wakatu ta ake d̄i karawi kai ma ntau one, konena mboto rau dou ma daca'u.
10 #
1Kor. 4:17
Nggara maisi la Timotius, weha ao katahopu sia loakud̄u sia ngina d̄i woha nggomid̄oho, b̄ara sia b̄une nahu rau karawi d̄i ru'u Ruma. 11Ai to'ina warakai ma dakaco'i sia. Bantupu sia loakud̄u lampa ntuwuna mai mbali d̄i nahu kai salama, b̄ara nahu mangena maina lab̄o cina ra angi makalai.
12Mab̄oha cina ndai la Apolos, wa'ura pila-pila kali kau b̄a nahu sia loakud̄u sia lampa sama lab̄o cinata ma kalai lao lamba nggomid̄oho. Pala sia watipu imbi adena b̄a one sia pab̄ua lao ake. Pala nawarasi wakatu peade, tantu sia d̄imamai.
B̄ontokai sura
13Pab̄uapu nggomid̄oho jaga-jaga ro tenggo d̄ei mori ra wokomu kai dou ela Al Masih. Karawipu kai disa ro ndad̄ipu tenggo. 14Samenana rakarawi b̄a nggomid̄oho, karawipu kai meci ra ca'u.
15 #
1Kor. 1:16
Nggomid̄oho tantu mapataku la Stefanus ro iwa ra wekina; siad̄oho masaramba-rambana ndad̄i ela Al Masih d̄i Akhaya. Siad̄oho kai kapoda ade karawina d̄i ru'u b̄a ela Ruma Hatalla mpoampa. 16Nahu maraho poda-poda loakud̄u nggomid̄oho b̄atumu d̄anda ra wa'a b̄a dou-dou ma b̄une ede, ro dou-dou ma kalai makarawi sama ro karawi wea lab̄o siad̄oho.
17Nahu neo adeku mai la Stefanus, Fortunatus, ro la Akhaikus. Siad̄oho eded̄u macepena nggomid̄oho ru'u nahu. 18Siad̄oho wa'ura kaneo weana ade nahu, b̄une siad̄oho kad̄ihi weana ade nggomid̄oho. Dou-dou b̄une ede pab̄uaku d̄i kaco'i.
19 #
Kis. 18:2
Ela-ela Ruma d̄i Asia karonggana salam do'a siad̄oho d̄i nggomid̄oho. Akwila ro Priskila ro ela Ruma ma kab̄oro weki d̄i uma siad̄oho rau nggaduna salam d̄i ade ngara Ruma. 20Sara'a cina ra angi ta ake karonggana salam d̄i nggomid̄oho.
Cua salam meci-meci angi kai cina ra angi kai sama-sama ela Al Masih.
21Sala'i b̄a nahu ta ake salam ratunti b̄a ndai nahu: Salam rad̄i nahu, Paulus.
22Dou ma wati meci ra ca'u Ruma, co'opu sia hina b̄a'a b̄a Ruma!
Maranata – Ruma madad̄oho maira!
23Raho-raho to'impa Ruma Isa mbeina bareka nggomid̄oho.
24Meci ra ca'u d̄i ru'u samenana cina ra angi ma sab̄ua lab̄o Ruma Isa Al Masih.
Salam do'a nami, Paulus
Currently Selected:
1 KORINTUS 16: LAIBHP
Highlight
Copy
Compare
Share
Want to have your highlights saved across all your devices? Sign up or sign in
@LAI 2001
