ROMA 3
3
1Kalu buno doiya, oilakai kountungo moteali Yahudi miano? Tukon oila kogunano mololoi kosunat aturano? 2Tutuu badaang kogunano! Tumbe-tumbeno, sabab doi Yahudi miano ko Mian Bisa monggianggakene kona bantilan-bantilan. 3Bai bulaando kai kalu kosoobos ko Yahudi miano aki nataatiyo? Oilakai tobikon doiya ko Mian Bisa aki nateali taatiyo? 4#Sad. 51:4 Tantu aki! Sabab tontongo ko Mian Bisa sidutu bisa, mau kai nasasamba komian bakokolii. Doi Kitab Moliyous lalomo totulis,
“Siokai Ikoo mutotoi bisa oilamo komo binantil doi lalom,
tukon Ikoo manaang salataa Ikoo hinakimi.”
5Bai kalu ko Mian Bisa nakaadilan teali tokita pololokon, tobikon kita kubaiyo komo aki nakana; oilamo komo moola kita bantile? Baikon ko Mian Bisa aki naadil kalu Yana ukume kita? (Takainomo napasadai nia moola secara banggapi.) 6Takainomo aki! Sabab kalu ko Mian Bisa aki naadil, bulaandomo kai Yana momoola hakimiyo nadunia nia?
7Bai kalu takainomo kokubai mo aki nakana, oila komo kana tentang Mian Bisa pololokon totingonii tobikon Yana ngginaal, bulaando komian mo kubaiyo kolokisoo daano moinasalakon buno mian mobaladosa? 8Tukon bulaando kita aki namoola mobantile, “Tadukai kita mokubai lokis sulano nasumbut komo monondok?” Takainomo daano komian mo totulaiyo yaku tukon bantile baikon yaku lapamo bantile buno doiya. Komian mobuno doiya pantaso Mian Bisa naukume.
Akiyo komeeng komian mo lakukanggene ko Mian Bisa namongiasan
9Nah, oilamo kai konda kadudukan buno Yahudi miano lobian kona monondokan kona kadudukan doi bangsa bailon? Tutuu aki! Lapamo yaku lolukenggene baikon mau Yahudi miano mau kai bangsa bailon, sasaibino lapamo dosa kuasaiyo. 10#Sad. 14:1-3, 53:1-3 Bunomo mo totulis doi Kitab Moliyous lalomo,
“Akiyo komeeng komian mo talakana,
11akiyo komeeng komian mo mangalati tukon akiyo komeeng komian mo sosubaiyo ko Mian Bisa.
12Sasaibino komian lapamo dedeenggene kobutongo doi Mian Bisa;
sasaibino lapamo tapa.
Akiyo komeeng komian nakokubai mo kana; mau meeng komian aki!
13 #
Sad. 5:9, 140:3 Yanila kekeoko buno kibul mo tobuka.
Batipuan lomba doi yanila alepo,
tukon yanila suungo bibilo sumbetene kobakala-kalaan, buno binda upaso.
14 #
Sad. 10:7
Yanila suungo moono tukon kutuk tukon ngginimoliiyan.
15Yanila nanggaisonan mosobit kalu yasemo momasakisaa tukon mangakate mian.
16Kona manasan tukon susaan, yanila sabukene doi yayaa.
17Yanila piit doi loloon momonondok,
18 #
Sad. 36:1
tukon aki naodotiiyo ko Mian Bisa.”
19Diabudodoo kita toiyo baikon sasaibino komo totulis doi agama Yahudi aturano lalomo, daano motuuk doi mian mo daano doi ukumoo nakakuasaan. Tukon bunomo doiya akiyo komeeng komian momoola mebeekon alasan oioila koidan tukon posaapon kodunia moola Mian Bisa natuntute. 20#Sad. 143:2; Gal. 2:16 Sabab akiyo komeeng komian mominoolakon pomondokon tukon Mian Bisa sabab do mianoo kubaiyo kolangge-langge mo talaat doi aturan agama lalomo. Bai do aturano tongo otudoikene doi banggapi baikon kobanggapi baladosa.
Bulaando ko Mian Bisa momoolakene kobanggapi pomondokon tukon Yana
21Bai diabudodoo ko Mian Bisa lapamo otudoikene kololoon bulaando kobanggapi pomondokon tukon Yana; tukon nacaradoo akiyo kona potoikonan tukon aturan agama Yahudi. Buku-buku Musa tukon buku-buku nabi-nabi okitakene do langgedoo, 22#Gal. 2:16 baikon ko Mian Bisa moolakene kobanggapi pomondokon tukon Yana; tongo kalu banggapi mangangga doi Yesus Kristus. Mian Bisa kubaiyo naiya tuuk sasaibino komian mo mangangga doi Kristus; sabab akiyo kona posasalaan: 23Sasaibino komian lapamo baladosa tukon odoono doi Mian Bisa mo salamatene yanila. 24Tongo tobikon Mian Bisa namaasi tolong mo beekene tukon cuma-cuma, banggapi napotaamian tukon Mian Bisa teali monondok koidan; kona cara doiyamo: Yesus Kristus sodiiyomo kobanggapi. 25Mian Bisa kulbankanggene Yesus Kristus sulano tukon dona mateanoo kobanggapi inokitakon tosodiimo doi kasalaan kalu yanila mangangga doi Yana. Mian Bisa kubaiyo buno doiya sulano tudoikene kona kaadilan. Sabab doi lounu loolukoo ko Mian Bisa lapamo okitakene kona sabalan doi banggapi nalalim-lalim tobikon Yana aki naukume yanila. 26Bai diabudodoo Yana tindokiiyo kolalim sulano okitakene kona adilan. Tukon cara doiya Yana otudoikene baikon kobutongo bisa; tukon sasamba komian mo mangangga doi Yesus, inokitakon pokakana komian mo lapamo pokindok koidan tukon Mian Bisa.
27Tobikon doiya akiyono koidan konda alasan sulano nda banggal-banggaal. Bulaando mobuno doiya? Oilakai ugaate kita molakukanggene komo totulis doi agama Yahudi aturano? Bolikon. Bai tobikon kita manganggamo. 28Sabab kona dumbakan daano buno naiya: Mian moinokitakon pokindok koidan tukon Mian Bisa, bolikon sabab Yana lakukanggene oila komo totulis doi aturan agama Yahudi, bai kai sabab Yana mangangga doi Yesus Kristus.
29Kai naaki do Mian Bisadoo Mian Bisa Yahudi miano tolong? Bolikon kai Yana Mian Bisa bangsa bailon koidan? Oode, takainomo Yana bangsa bailon na Mian Bisa koidan! 30#Kua. 6:4; Gal. 3:20 Sabab ko Mian Bisa tongo meeng. Yanamo komo moolakene ko Yahudi miano pokindok koidan tukon Mian Bisa sabab yanila manganggamo. Tukon Yanamo koidan komo moolakene kobangsa bailon pokindokon koidan tukon Mian Bisa; doiya koidan sabab yanila manganggamo. 31Oilakai naiya koalatino baikon sabab kita mangangga doi Kristus, kita sakukene koagama Yahudi naaturan? Aki natutuu! Tongo kai tukon nda manganggaanoo, kita odotiiyo do aturano.
Currently Selected:
ROMA 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
