SADEONG 89
89
Nyanyian doi tempo kanakonan silakaan
1 #
1Tom. 4:31
Etan Ezrahi mianno, nanyanyian otunggul.
Temeneno Mo Balakuasa Tuuno Nasotian
2 Temeneno, luwedoi mumaasi, sio kumanyanyikene sidutu,
komu setiaan naikon yaku babilitakene tulun-tomulun.
3Sabab yaku toiyo komu maasi sidutu-posidutukon,
komu setiaan moonggol pokakana kotimbu.
4Ikoo bantile, “Yaku lapamo mokubai perjanjian
tukon mian Kuililik
Yaku lapamo batotopi doi Daud, Kupeleleani:
5 #
2Sam. 7:12-16; 1Tund. 17:11-14; Sad. 132:11; Kis. R. 2:30 ‘Komu batomundoan yaku pertahantanggene tuuk sidutu-posidutukon,
turun-temurun mupau tumbu naikon komo dudukiyo.’ ”
6Korapat doi surgaa nggaale komu kokubai-kokubai mominasaindinggon,
tukon manyanyikene Komusetiaan, Temeneno.
7Doi timbu akiyo komo pokakana Ikoo, oh Temeneno,
akiyo komahluk surgaa komo buno Ikoo.
8Ikoo inodotii doi sasaibino komo moliyous,
minatakuton labian luwedoi sasaibino komo daano doi mupotikunggonan.
9 Temeneno, Mian Bisa Mo Babasal Konakuasa, indekai komo pokakana kona bukuanan Ikoo?
Ikoo setia doi sasaibino kolangge langge lalomo oh Temeneno.
10Ikoo kuasaiyo kotobun mo liyookon,
tukon akateyo kobokolo mo babasal.
11Rahab, naga tobun, Ikoo patele tukon Ikoo akateyo,
tukon limamu bukuan Ikoo lungguiyo Komu musuh-musuh.
12Ko timbu tukon dunia daanokai Mulangge,
kodunia tukon sasaibino koantoko Ikoo komo pasitakayo.
13Ikookai komo tealakene kolembet tukon lalom,
ko Bunggul Tabor tukon Hermon
pokoku-kokuweisi doi Ikoo.
14Tutuu babasal Komukuasa,
tukon tutuu hebat Komubukuanan!
15Kokaadilan tukon hukum daanokai dasar Mubatomundoan,
komaasi tukon kesatiaan jelas potingonu doi sasaibino Komu tindakan.
16Kinatauwankai kobangsa mo bakaleda tukon laba,
motubo doi Mudaanoan lalomo laango, Temeneno.
17Po pupuson kooloyo yanila labalaba tukon tataap moonggol,
sabab Mumonondokan.
18Ikoo beena kami manaangan mo monondok tuuno,
sabab tongo Mumonondokankai kami malaat mananangan.
19Sabab komai padagai doiyamo mian Ikoo mopiliyomo, oh Temeneno;
komai tomundo daanokai Israel miano na Mian Bisa Moliyous konoano.
Mian Bisa najanji doi Daud
20Doi loonu loolukon doi meeng komokitaan lalomo,
Ikoo bantile doi Mupeleleyani mo molole,
“Yaku lapamo tulungiyo komeeng kotalenga,
meeng komian Yaku molilikemo luwedoi rayat malapamo Kukatandake.
21 #
1Sam. 13:14, 16:12; Kis. R. 13:22 Yaku lapamo pososuung Daud, Kupeleleyani,
tukon Yaku lantike yana tukon lisison bakolobokiyan.
22Daku bukuanan sedutu lindungiyo yana,
Daku kuasa naikon tealikene yana bukuan.
23Yana aki naikon nalinunggui musuh,
tukon aki naikon mian lokis nalailainggene.
24Sasaibino kona musuh naikon Yaku olupuwo,
Yaku akateyo indee tolong komo mosikitene yana.
25Yaku naikon tataap mamaasikene yana tukon setia doiyana,
tukon Yaku kubaiyo yana pololokon berkuasa.
26Kona batomundoan naikon Yaku ekebelane,
luwedoi Tobun Tangano polong doi Efrat Paisunobatango.
27Yana naikon bantile doiya-Ku,
‘Ikoo ko Tamanggu,
ku Mian Bisa, padagai tukon kupasalamat.’
28 #
Ink. 1:5
Yaku naikon tealikene yana kumalane langgongo,
mo babasal tuuno doi antara sasaibino ko tomundo.
29Yana naikon tataap Yaku mamaasikene polong posidutukon,
Daku perjanjian tukon yana tataap moonggol.
30Kona kursi batomundoan Yaku pertahankanggene selama kotimbu daanoon doi dunia bunggono,
turun-temurun pau natumbu naikon komo dudukiyo.
31Bai kalu kona katulunan lumbaiyo Daku hukum,
tukon lailainggene Daku parenta,
32kalu yanila aki napusinggene Daku katataapan,
tukon lailainggene Daku aturan,
33Yanila Yaku ukume tukon pongumbas sabab napo palanggaran,
tukon Yaku tepokiiyo balaa sabab na dosa-dosa.
34Bai Yaku tataap mamaasikene Daud,
tukon aki naikon Kuakiyenggene Dakusetiaan.
35Daku perjanjian tukon yana aki Kuebetele,
luwedoi Kujanji akiyokai komeeng Yaku mobubute koikoidan.
36Tongo idan luunggun tuuk posidutukon Daku bototopian
tukon Kosambunggu mo moliyous;
Yaku akikai Kubakalakala doi Daud.
37Kona kursi batomundoan naikon bataanggon kalu kooloyo matano tataap daanoon,
turunan paisobolii koturunan pauna tumbu naikon komo osulongiiyo.
38Kona batomundoan tataap daano pokakana kobituwon,
sakisii mosetia doi bunom-bonum.”
Mandaungan luwe tomundo linungguian
39Bai budodoiya Ikoo nggimoliiyo kotomundo,
Ikoo sakukene tukon tolayo komian Mulinilik.
40Ikoo ebetele Komu perjanjian tukon Mupeleani,
kona songko batomundoan Ikoo sakukene doi lapetak lalomo.
41Ikoo lubange konakota betoon-betoono,
kona benteng-benteng Ikoo tealikene potimbuni.
42Sasaibino komian moala lambase konalangge,
yana teali salita pototulay doi napololanikonan.
43Ikoo beena manaangan doi namusuh-musuh,
tukon kubaiyo sasaibino konalawan labalaba.
44Tukon koidan konasinapan Ikoo tealikene kiyo kotakoso,
Ikoo aki mutulungiyo yana doi polobosian lalomo.
45Ikoo opupuse kona kuasa mohebat,
kona kursi batomundoan Ikoo sakukene doi buta.
46Ikoo ekependeyo kona loonu tabokonan,
tukon tutupiyo yana mamawan.
Sambeang makabian tosodiian
47Oh Temeneno, polong oila kotempono Komu basookonan?
Polong oila kotempono Komu nggimalan modulep pokakana kobilat?
48Neneokakukai bulando kona palusan daku tuboan nia,
Ikoo positakayo kobangkapi salaku langge motubo moakiyo kotakoso.
49Indeekai komo moola tubo banggadudul tukon aki namate?
Indeekai komo moola luput luwedoi tinadinan?
50Oh Temeneno, inaadokai kopalooseno Komumaasi motumbe-tumbeno,
Ikoo mo janjikene doi Daud luwedoi Mukosetiaan?
51Oh Temeneno, neneekekai bulaandokai namupeleleani nia mo tinotulai,
yaku tanggunge kobangsa badaang napototulai.
52Oh Temeneno, komu musuh-musuh totulaiyo kotombuno mulinilik,
totulaiyo yana doiyaandomo tolong kona tausan.
53Nggaalekai ko Temeneno tuuk sidutu-posidutukon.
Natealikene bunodoiya! Amin!
Currently Selected:
SADEONG 89: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
